ل كەمپا باجدكەندال هێشتا قوتابیێن دوازدێ ئامادەیی دەوام نەكرینە
تۆرا لالش یا راگەهاندنێ
ژبەر نەبوونا میلاكێ مامۆستایان ل كەمپا باجدكەندال،قوتابیێن قۆناغا دوازدێ ئامادەیی یێن پرۆگرامێ كوردی سەر ب قوتابخانێن هەرێمێ ڤە هێشتا دەوام نەكرینە.
“حسێن خدر”رێڤەبەرێ پەروەردا شنگال یا زمانێ كوردی بۆ رۆژناما دەنگێ لالش خویاكر:” ژبەر نەبوونا میلاكێ مامۆستایێن پسپۆریا بابەتان ل كەمپا باجدكەندال،قوتابیێن قۆناغا دوازدێ ئامادەیی یێن پرۆگرامێ كوردی سەر ب هەرێمێ ڤە هێشتا دەوام نەكرینە ,ئەڤێ چەندێ دێ كارتێكرنا خۆ ل سەر قوتابیان هەبت،چنكو ئەڤە پتر ژ هەیڤەكێ یە دەوام ل هەموو قوتابخانێن كوردستانێ دەست پێكریە چ نەمایە دێ دەست ب ئەزموونێن كۆرسێ ئێكێ ژی ئێتەكرن و گۆت:”ژبۆ چارەسەركرنا ڤێ ئاریشەیا قوتابیان ئەم ناچارن هندەك وانەبێژان پەیدابكن ژبۆ وێ یەكێ دەست ب دەواما خۆ بكن،داكو ئەڤ سالە ژ كیستێ وان نەچت ،چنكو قوناغا دوازدێ ئامادەیی گەلەكا گرنگە پاشەرۆژا قوتابیان و هەموو زەحمەتا وان یا هژدە سالان ل ڤێ قوناغێدا دیاردبت و دڤێت ئەم گەلەگ گرنگیێ ب وان بدن و هەر تشتەكی پێتڤی بوون بۆ وان بێتە دابینكرن،ژبەركو قوتابی پاشەرۆژا وەلاتێ مەنە و جهێ سەربلندی و سەرفەرازیا مەنە”.
ناڤبری ئەو چەندە ژی دیاركر:” هژمارا وان قوتابیێن قوناغا دوازدێ ئامادەیی ل كەمپا باجدكەندال گەلەك بوون , لێ هندەك ژوان چوونە چەند كەمپ و دەڤەرێن دیتری مینا كەمپا(چەم مشكۆ،خانكێ،شاریا) دخوینن ئەڤێن ماین ژی ژبەر لاوازیا بارێ وان یێ ئابووری نكارینە هەرنە چ جهێن دیتر بخویینن و نێزیكترین جه بۆ وان ئامادەیا دێرەبوونێ بوویە،بەلێ وان ژی ژبەر نەبوونا جهی و زۆریا قوتابیان نكارینە وەربگرن”.
تُتاح هذه الصورة أيضا في: کوردی