نەبوونا ئاڤا ڤەخوارنێ ل كۆمەلگەها بابیرێ بوویە ئاریشەكا مەزن
تۆرا لالش یا راگەهاندنێ
نەبوونا ئاڤا پێتڤی یا ڤەخوارنێ ل كۆمەلگەها بابیرێ بوویە ئاریشەكا مەزن ل دەڤەرێ،ب ناچاری خەلك ب بەهایێ 10هەزار دیناران تانكێ ئاڤا ڤەخوارنێ دكرن و یێن نكارن بكرن ئاڤا بیرا ڤەدخۆن كو رێژەیەكا زۆر یا خۆیێ تێدایە،وەلاتی داخوازێ ژ حكوومەتا هەرێمێ دكن ئەڤ كێشە بێتە چارەسەركرن.
ئاڤا ڤەخوارنێ ژ گوندێ خەتارێ بۆ كۆمەلگەها بابیرێ دئێت لێ بكێر ڤەخوارنێ نائێت،ژبەركو رێژەیەكا زۆرا خۆیێ تێدایە،وەلاتیێن وێ دەڤەرێ دلگرانیا خۆ ل هەمبەر ڤێ كێشەیێ دیاردكن و داخوازێ ژ حكوومەتا هەرێما كوردستانێ دكن چارەیەك بۆ ڤێ ئاریشێ بێتە دیتن.
سماعیل فەرحان،بەرپرسێ بەشێ رەوشەنبیری ل نڤیسینگەها لالش ل كۆمەلگەها بابیرێ ب دەنگێ لالش راگەهاند:”ژبۆ چارەسەركرنا ئاڤا ڤەخوارنێ چەندین جاران مە سەرەدانا رێڤەبەریا ئاڤێ ل ناوچەدارییا ئەلقوش كریە ،لێ چ ئەنجام ب دەست نەكەفتن و ئاریشا ئاڤێ ب ئاریشەیەكا مەزن دئێتە دانان ل دەڤەرێ و گۆت:”بەری سالا2003ێ ئاڤا بابیرێ ژ بەنداڤا مووسلێ دهات،لێ پشتی وێ سالێ هەتا نۆكە نەبوونا ئاڤا پێتڤی یا ڤەخوارنێ بوویە ئاریشە ل دەڤەرێ،ب ناچاری خەلك ب بەهایێ 10هەزار دیناران تانكێ ئاڤا ڤەخوارنێ دكرن و یێن نكارن بكرن ئاڤا بیرا ڤەدخۆن كو رێژەیەكا زۆر یا خۆیێ تێدایە و بۆ ساخلەمیێ نەیا باشە”.
فەرحان دا زانین ژبەر نەبوونا ئاڤێ پشكەك ژ خەلكێ كۆمەلگەهێ بەرێ خۆ دایە كۆمەلگەهێن شاریا و خانكێ و لێ ئاكنجی بووینە.
تُتاح هذه الصورة أيضا في: کوردی