چیرۆكا زارۆكەكێ سێویێ گوندێ كۆچۆ
هەڤال عەلۆ ساڤارا
كۆچۆ مەزنترین گوندە كو كۆمەكوژی تێدا هاتی ئەنجامدان، كو سەرژمێریا ئەوی گوندی نێزیكی 1700 كەس بووینە، رۆژا 3/8/2014 دكەڤیتە بن دەستهەلاتا رێكخراوا تیرۆرستی ل عیراق و شامێ یا ناڤدار ب داعش، دەولەتا ناڤبری گەلەك چیرۆك و تراژیدیایێن مەزن ئەنجامدان ل گوند و كۆمولگەهێن شنگالێ. زەلامەك زارۆكەكی ژ گوندێ كۆچۆ رزگار دكەت و دگەهینە سەرێ چیایێ شنگالێ و خودان دكەت بێ دایك و باب دمینت، پشتی سێ سالان كۆچۆ دهێتە رزگاركرن ئەو زەلامە دگەل زارۆكێ سێوی قەستا گوندێ خۆ كۆچۆ دكەن و دناڤ مال و تاخێن گوندی دا دیالۆكەك دناڤبەرا هەردووكان دا چێدبیت.
زارۆكێ سێوی دبێژیت: باب ئەڤە چ سەردەمە مرۆڤ ل ئەڤی گوندی ناژین هەر مال و تاخەكی ئەز بچمێ دار و بەر هەموو ل سەر هەڤدوودا هلۆشیانە و تالان و وێران كرنە و ئاگر بەردانە هەموویێ ؟
بابێ زارۆكی ئانكو زەلامێ خودان كری دبێژیتێ: كورێ من توو ل خەونەكێ دایی!!!
زارۆك دبێژیت: هەر دۆل و نەوالەكا ئەز بچمێ یە پرە ژ هەستی و كەلەخێن مرۆڤان ئەز دناڤ بێنا وان دا كەر و لال و گێژ دبم ؟
باب بەرسڤا وی دا و گۆتێ: كورێ من پەزەكی بێ شڤان هەبوو گورگ هاتن و ل دەوروبەرێن گوندی هەموو خوارن و تالان كرن!!!
زارۆك دگەل ئەوی زەلامی دناڤ گوندی دگەرن لێ هەر ئەو زارۆك بیرهاتن ل بیرا وی تێن و پرسار ژ بابێ خوە دكەت و دبێژیت: باب ئەڤ وارگەهێ نهۆ ئەم ل ناڤ دگەرن یێ ڤالایە و بەری نهۆ بێهنا مرۆڤاتیێ ژێ دهات ل داوەت و سەیرانگەها كەسی كەس نەدیت، دایك و بابێن من پارە ل سەر من و خوشكێن من دا دابەشدكرن و دگەل هەڤالێن خۆ ئەم دچوونە دناڤ یاریێن زارۆكان دا كا ئەو ژی دیار نینن ؟ ئەو نەخوشخانا مە سەرەدانا وێ دكر نەمایە كو برینێن مە چارەسەر دكرن ؟
باب سەرێ خوە هەژاند و گۆتێ: كورێ من دڤێت ئەز تە بمە جەم نۆژدارەكی دەروونی تە دەروونێ خوە تێكدایە.
زارۆك جارەك دن گۆتە بابێ خو ئەڤە ئەو قوتابخانا ئەز دچوومێ یە پر بوو ژ قووتابی و مامۆستایان وانێن مە لێ دخواندن وەكو مافێ مرۆڤ و پێكڤە ژیان ئەو ژی نەماینە ؟ ل رۆژەكێ دا كۆمبوونا سەمیانێ قوتابیان بوو د ئەڤێ قوتابخانێ دا دایك و بابێن من ژی د ئامەدەبوون خەلكێ گوندێ مە هەموویێ قەستا ئەڤێ قوتابخانێ دكرن ل ئەز مرۆڤەكی ژ ئەوان ژی نابینم ؟
باب ب چاڤەكی پری هێستر و خەمگین و دل ب كۆڤان بەرسڤا وی ددە و دبێژتێ: ئەڤە ئەو جهە یێ كو ژیانا گوندێ من تێدا ب داوی هاتی و مرۆڤایەتی ژی هاتە بن پێ كرن و شەرەف و كەرامەتا مرۆڤاتیێ تێدا هاتی شكاندن، ل ئەڤی جهی داعش ب دارێ زۆرێ خەلك كۆم دكرن و كوشتن تالانكرنا مە حەلال كرن و كەچ و ژن ژی ل بازارێن تەلەعفەر و مووسل و رەقایی دەست درێژی و كرین و فرۆشتن پێ دهاتە كرن، ئەو هەستی و كەلەخێن توو دبینی هەموو مرۆڤ بوون كورێن گوندێ مەبوون ئەو وارگەهێ شەوتی و تالان كری دبینی مالا من و تەیە، ئەو پیكڤە ژیانا توو دبێژی هەموو كریڤێن مە بوون و ل مە بوونە دوژمن و ئەو مافێ تو دبێژی بوویە پارە و ل دەست و بەریكێن بازرگان و بەرپرسا دە كرین و فرۆشتنێ ب مە دكرن، ئەو كەلەخێن توو ل قوتابخانێ دا دبیی یێ دایك و باب و تەنە . ئەز ب كارێ خودان كرنا تە رابوویمە ل ژێر خیڤەتگەها سەرما و زڤستانا سالێ و گەرما هاڤینێ من توو خودانكری هەتا كو توژی بەدەوامیێ ب ژیانا خۆ بدەی.
تُتاح هذه الصورة أيضا في: کوردی