WAAR-دهۆك:

كۆمسیۆنا بلندا سه‌ربه‌خوه‌ یا هه‌لبژارتن و راپرسیێن هه‌رێما كوردستانێ راگه‌هاند؛ بۆ ریفراندۆمێ، 6 ملیۆن كه‌سان مافێ ده‌نگدانێ هه‌یه‌ و ده‌نگدانا ریفراندۆمێ ب كارتا بایۆمه‌تری نابیت.
شێروان زراری په‌یڤدارێ كۆمسیۆنا سه‌ربه‌خوه‌ یا هه‌لبژارتن و راپرسیێن هه‌رێمێ گۆت: بۆ ریفراندۆم و هه‌لبژارتنێن ناڤخوه‌یا هه‌رێمێ، كۆمسیۆن دێ پشتبه‌ستنێ ل سه‌ر تۆمارا ده‌نگده‌رێن ئیراقی كه‌ت، لێ ژبۆ پشتراستبوونێ، تیمێن وان دێ ده‌ست ب سه‌ره‌دانا ده‌ڤه‌ر و باژارێن هه‌رێمێ كه‌ن و داتا و زانیاریێن نوو كۆمكه‌ن.
گۆت ژی: رێژه‌یا ده‌نگده‌ران ژبۆ ریفراندۆمێ، ل باژارێن هه‌رێمێ، 3 ملیۆن و 300 هزار كه‌سن و ل ده‌ڤه‌رێن كوردستانی یێن ژ ده‌رڤه‌یی ئیداره‌یا هه‌رێمێ ژی، 2 ملیۆن و 500 هزار كه‌سن و ب هه‌ڤڕا، دبنه‌ نزیكی 6 ملیۆن ده‌نگده‌ران.
په‌یڤدارێ كۆمسیۆنێ دا زانین ژی: دروستكرنا كارتا ئه‌لكترۆنی و خوه‌ تۆماركرنا نها دناڤا سیسته‌مێ بایۆمه‌تری دا، چ په‌یوه‌ندی ب ریفراندۆمێ ڤه‌ نینه‌، به‌لكو كارتا سیسته‌مێ بایۆمه‌تری، ب تنێ بۆ هه‌لبژارتنێن ناڤخوه‌ و ئیراقێ یه‌.
ئه‌ڤه‌ د ده‌مه‌كی دایه‌ كو ل 7 ڤێ مه‌هێ، ئالییێن سیاسی یێن هه‌رێما كوردستانێ، ب سه‌رپه‌رشتییا مه‌سعوود بارزانی سه‌رۆكێ هه‌رێما كوردستانێ كۆمببوون و بریاردابوون، ل 25 مه‌ها ئیلۆنا ئه‌ڤ ساله‌، ریفراندۆما سه‌رخوه‌بوونا هه‌رێما كوردستانێ بهێته‌ كرن.