وهزارهتا پێشمهرگهی: بڕیارا عهبادی یا پارچه زهڤییان بۆ پێشمهرگهی گۆتنه
WAAR-دهۆك:
وهزارهتا پێشمهرگهی بۆ وار راگههاند؛ گۆتنا حهیدهر عهبادی یا دابهشكرنا پارچه زهڤییان بۆ شههید و بریندارێن شهڕێ داعشێ، نهبوویه بڕیار و هێشتا چ رێنماییهك پێ دهرنهكهفتییه.
لیوا روكن بهخیتار محهمهد سهعید، راوێژكارێ وهزیرێ پێشمهرگهی بۆ وار راگههاند؛ حهیدر عهبادی سهرۆكوهزیرێن ئیراقێ، د داوی كۆمبوونا جڤاتا وهزیران دا، گۆتییه كو دێ پارچه زهڤی ب شههید و بریندارێن شهڕێ داعشێ هێنه دان و پێشمهرگه ژی دێ مفادار بیت.
گۆت ژی: ئهو یهك هێشتا نهبوویه بڕیار و دیار نینه میكانزما بجهئینانا وێ دێ ب چ رهنگی بیت، كانێ ئهو پارچه زهڤی دێ ژ ئالیێ حكومهتا ههرێمێ ڤه هێنه دان، یان حكومهتا ئیراقێ دێ ل ناوچهیێن بن دهستههلاتا خوه دهت.
راوێژكارێ وهزارهتا پێشمهرگهی گۆت ژی: وهزارهتا پێشمهرگهی بهری سالهكێ ب ههڤكاری دگهل وهزارهتا ئاڤهدانكرن و كاروبارێن شههید و ئهنفالكرییان، دهست ب ئاڤاكرنا دو هزار خانییان بۆ شههید و بریندارێن پێشمهرگهی یێن شهڕێ داعشێ كرییه و نێزیكه دێ ب داوی هێن.
ههروهسا دیاركر، حكومهتا ههرێما كوردستانێ ژی بهری حكومهتا ئیراقێ بیر ل پێدانا پارچه زهڤییان بۆ شههید و بریندارێن پێشمهرگهی كرییه و بڕیار ژی پێ دهركهفتییه.
تُتاح هذه الصورة أيضا في: کوردی