رێڤەبەر و مامۆستا و قوتابیێن قوتابخانێن “التاخی” ب قەڤدەكا گولێن رەنگین ب رێکا بەرێز”شێخ شامۆ” سلاڤ و سوپاسیێن خوە ئاراستەیی سەرۆک وەزیران رێزدار “نێچیرڤان بارزانی” دكن
تۆرا لالش یا راگەهاندنێ/دهۆك
رێڤەبەر و مامۆستا و نوونەرێن قوتابیێن هەرسێ قوتابخانێن التاخی،ئیرۆ رۆژا شەمبوویێ 5تەباخا 2017ێ،سەرەدانا دەستەیا بلندا بنگەهێ لالش ل دهۆكێ كرن و ژلایێ بەرێز”شێخ شامۆ”سەرۆكێ بنگەهی ڤە هاتنە پێشوازیكرن.
دڤێ سەرەدانێ دا رێڤەبەر و مامۆستا و نوونەرێن قوتابیان ب رێکا بەرێز”شێخ شامۆ” ب قەڤدەكا گولێن رەنگین سلاڤ و سوپاسیێن خوە ئاراستەیی سەرۆک وەزیران رێزدار “نێچیرڤان بارزانی” کرن،ژبۆ پشتەڤانیا وان یا بەردەوام بۆ قوتابخانێن التاخی ،زێدەباری سوپاسیێن خۆ ئاراستەی”شێخ شامۆ” كرن بۆ بزاڤ و هەولێن وی یێن بەردەوام بۆ سەرخستنا پرۆسسا پەروەردێ ل ڤان قوتابخانان.
ل بەرانبەر دا شێخی ب گەرمی بخێرئانینا مامۆستایان كر و دیاركر كو ڤەكرنا ڤان قوتابخانان ب پشتەڤانیا سەرۆكێ حكومەتا هەرێمێ ڤە پێنگاڤەكا پیرۆز بوو،كو دڤێ قۆناغا پەریشانیێ دا چارەنڤیسێ پتری سێ هەزار قوتابیان د دووسالێن بۆری دا هاتە قورتالكرن و ب پلەیێن هەری باش ل زانكۆ و پەیمانگەهێن هەرێمێ هاتینە وەرگرتن.
هەروەسا شێخی ب درێژی بەحسێ رۆل و خزمەت و هەولێن بنگەهێ لالش دچەند سالێن بۆری دا كر بۆ پشتەڤانیكرنا قوتابیێن ئێزدی،ب تایبەتی پشتی سالا 2006ێ قوتابیێن ئێزدی ل مووسلێ قوتبوون ژبەر گەڤێن تیرۆرستان،ژ هنگی وەرە ب بریارا جەنابێ سەرۆک بارزانی و رێزدار نێچیرڤان بارزانی ژمارا قوتابیێن مە یێن ژ زانكۆ و پەیمانگەهێن عێراقێ بۆ یێن هەرێمێ هاتینە ڤەگوهاستن گەهشتینە 10هەزار قوتابیان و ب دەستكەفتەكێ هەرە مەزن و ژبۆ پاشەرۆژەکا گەش بۆ جڤاکا ئێزدیان ل قەلەم دا،پاش بەحس ل رۆلێ مامۆستایان كر كو ژدەستپێكا ڤەكرنا ڤان قوتابخانان خۆبەخشانە دەوام كرن داكو قوتابیێن مە ژ كاروانێ خووندنێ نە شوندە نەمینە و بكارن داویێ ب قۆناغا دوازدێ ئامادەیێ بینن.
هەر ژلایێ خۆڤە شێخی سۆزدا كو ئەوا دشیان دا بت دپاشەرۆژێ دا بۆ قوتابی و مامۆستایێن خۆ تەخسیریێ نەكەین،ژبۆ چارەسەركرنا گرفتێن وان بۆ سەركەفتنا پرۆسا خووندنێ ل هەر ئاستەكی لناڤ جڤاکا ئێزدیان ل کوردستانێ.
هێژایی گۆتنێ یە دڤان دوو سالێن بۆری دا ب پشتەڤانیا سەرۆكێ حكومەتا هەرێمێ و ب دووڤچوون و بزاڤێن سەرۆكێ بنگەهێ لالش ب هەماهەنگی دگەل رێڤەبەریا گشتی یا پەروەردا پارێزگەها دهۆكێ و پەروەردا قەزا شنگالێ،قوتابخانێن التاخی ئێك ل قەزا زاخۆ و ئێك ل كۆمەلگەهێن خانكێ و شاریا هاتنە ڤەكرن،كو سێ هەزار قوتابیان قۆناغا ئامادەیی ب داوی ئینان و ل زانكۆ و پەیمانگەهێن هەرێمێ هاتنە وەرگرتن.
تُتاح هذه الصورة أيضا في: کوردی