كۆمكوژیا ئێزدیان بەردەوامە
بەختیار قادر
ل رێككەفتی 3/8/2014ێ كوردێن ئێزدی ل قەزا شنگالێ تووشی كۆمكوژیێ بوون لسەر دەستێ رێكخراوا تیرۆرستیا داعشێ،دئەنجام دا ب سەدان وەلاتیێن ئێزدی هاتنە كوشتن و گرتن و كچ و ژن هاتنە سەبیكرن و ب هەزاران ئاوارە وكۆچبەر بوون،هەروەسا رێككەفتی 3/8/2017ێ دبتە سێ سال لسەر دەربازبوونا جینۆسایدێ كو هەتا نهۆ یا بەردەوامە،هەڤدەم رەوشا شنگالێ ب گشتی پتر ئالۆز بوویە و بوویە گۆرەپانا هەڤركیێن سیاسی و خەلكێ وێ هێشتا دسەخترین رەوش ل كەمپان دا دژین،پشتی هاتیە رزگاركرن ژ دەستێن داعشێ.
پشتی جینۆسایدێ ئۆمێدا خەلكێ شنگالێ ئەو بوو ئەو گرتیێن مایین و شنگال بێتە رزگاركرن ژ دەستێن داعش و ئەڤ كەیسە ب جینۆساید بێتە ناساندن،ئیرۆ ب سایا هێزێن پێشمەرگەیێ كوردستانێ و چەند هێزێن دیتر قەزا هاتیە رزگاركرن و شنگال دبن سیبەرا ئالایێ كوردستانێ دایە و خەلكێ وێ هێدی هێدی یێ ڤەدگەرتە سەر مال و جیێن خۆ،دیسان ئیرۆ بەحس ل چارەنڤیسێ وێ یێ هەلاویستی دئێتە كرن كو هێشتا گەلەك گۆرێن بكۆمێن قوربانیان نەهاتینە ڤەكرن و مەترسیا ژ ناڤچوونا وان دئێتە كرن ئەگەر وەسان بمینن كو دێ كارتێكرنا خۆ لسەر جینۆسایدێ هەبت بۆ ب دەست ڤە ئینانا بەلگەیان ژلایێ جیێن شۆلەژێ ڤە،ل دووڤ ئاماران پتر ژ سێ هەزار گرتییان ژ دەستێ تیرۆرستان هاتینە ئازادكرن و هێشتا پتری سێ هەزارێن دی گرتینە،دیسان قەزا هێشتا نەهاتیە ئاڤەدانكرن و قایممقامێ شنگالێ ژی راگەهاندیە كو ماستەر پلانا ئاڤەدانكرنێ هاتیە دانان،خالا هەرە سەرەكی هەبوونا هەڤركیێن سیاسی یە دناڤبەرا پارتێن سیاسی دا ل دەڤەرێ دا كو جۆرە نە ئارامیەك پەیداكریە و خەلكێ بێ گونەه ژلایێ كەسێن نەنیاس هاتینە كوشتن ب ڤێ یەكێ خەلكێ نكاریە ب ئێكجاری ڤەگەرت.
خەلكێ شنگالێ ئیرۆ چاڤەرێ یە كەیسا وان لسەر ئاستێ نێڤ دەولەتی ب جینۆساید بێتە ناساندن و كەسێن ئەڤ تاوان ئەنجام داین و ب تایبەت ئەرەبێن دەردۆرا وێ بگەهنە سزایێ خۆ و گرەنتی هەبت جارەكا دی ئەڤ كۆمكوژی ددەرهەقێ وان دا دووبارە نەبن،هەتا كو بكارن جارەكا دی ڤەگەرن و لگەل كەسێن دەوروبەرێن خۆ پێكڤە بژین.
هەروەسان دبینم یا گرنگە بۆ قۆناغا داهاتی ب ئاشكەرایی چارەنڤیسێ قەزایێ یێ هەلاویستی بێتە راگەهاندن،وەكی دیار و تەماشە دكەم كو خەلكێ وێ خویا دكن وان دڤێت بێنە سەر باوەشا هەرێما كوردستانێ،داكو ئێدی تووشی چ فەرمان و كۆمكوژیێن دی نەبن لسەر دەستێ دوژمنێن گەلێ كورد.
تُتاح هذه الصورة أيضا في: کوردی