شنگال و ململانێن سیاسی
لەید حسێن
پشتی كارەساتا شنگالێ ئەوا ل 3ی تەباخا 2014ێ،چەندین هێزا رەوشا پەریشانە ل وێرێ بۆ خۆ كرە دەرفەت و ل وێدەرێ ئاكنجیبوون و قوربانیێن ئێكێ ژی هەردەم ژ وێ چەندێ گەلێ ئێزدی یە،ئەڤە دەمەكە و پشتی رزگاركرنا شنگال و سنوونێ هەتا نهۆ پتر ژ دەه كەسان ب دەستێن كەسێن نەنیاس هاتینە كوشتن و گرتن و چارەنڤیسێ ژمارەكا وان دیار نینە.
هەر دیسان ژ بەر وێ نە ئێكلایكرنا سیاسی چ كەسێ ئێزدی نكارت ژ گوندەكی بۆ یێ دی بچتە جەم كەس وكارێن خۆ،ژبەر ئیرۆ رۆژ هەر گوند و كۆمەلگەهەكا ئێزدیان ل شنگالێ هێز و لایەنەكی ب هەست و دروشمێن جودا جودا برێڤە دبەت،بڤە شێوەی چ كەس نكارت ب زڤرە دەڤەرێن خۆ و ژبەر ڤێ چەندێ خەلكێ ئێزدی دڵگران بوویە و دبێژن ژیان و ئارامی و تەناهی بوونا مە بڤی شێوەی مەحالە و دخوازن كو ب زووترین دەم هەردوو حكومەتێن بەغدا و هەولێر و ئێكەتیا ئەورۆپا خۆ ل مللەتێ ئێزدی بكەنە خودان و ڤێ ئاریشێ چارەبكن و داخواز ژ هێزێن نە یاسایی و یێن نە خەلكێ وێدەرێ بكن كو ب رێككەفتن وان ئاریشان چارەبكن و هەر هێزەكێ بتنێ مافێ وی بۆ بێتە دان و بچت دەڤەرا خۆ و ئاگەه ژێ هەبت و ل وێدەرێ خۆ بكە خودان دەستهەلات و بچت دەڤەرێن خۆ ب رێڤە ببەت،داكو ئێدی بەس خەلكێ سڤیل ببتە قوربانی.
ژبەر ڤێ نەخۆشی و دەردەسەری و مال وێرانیا خەلكێ ئێزدیێن شنگالێ ژ حكومەتا بەغدا دیتی،خەلكێ مە ل هیڤیا 25ی ئەیلونا ئەڤ سالانە داكو دەنگ ل چارەنڤیسێ خۆ بدەن و ب زڤرنە هەمبێزا كوردستانا دایك،كو ئێدی وەكو هەر كوردەكی ژیانا خۆ ب تەناهی ب رێڤەببن و مافێ وان هندا نەبت و دەڤەرێن وان جارەكا دی بێنە ئاڤەدانكرن.
تُتاح هذه الصورة أيضا في: کوردی