پهیڤدارێ پارتی: سوبه دێ دگهل گۆڕانێ كۆمبین
WAAR – دهۆک:
بریاره سوبه پارتی دیموكراتی كوردستان و تهڤگهڕا گۆڕان ل سهر ئاستێن بلند كۆمببن، پهیڤدارێ پارتی ژی دبێژیت: د كۆمبوونا سوبه دا، دێ دگهل گۆڕانێ ل سهر كارنامهیا دانوستاندنان رێككهڤن.
مهحموود محهمهد پهیڤدارێ پارتی بۆ مالپهرێ فهرمی یێ پارتی گۆت: پشتی خانهیا راپهراندنا گۆڕانێ پهیوهندیی ب فازل میرانی سكرتێرێ مهكتهبا سیاسی یا پارتی كری و ئامادهییا خوه بۆ كۆمبوونێ نیشاندای، سوبه رۆژا دوشهمبی، پارتی ل باژارێ سلێمانیێ دێ دگهل عومهرێ سهید عهلی رێكخهرێ گشتی و جڤاتا نشتیمانی یا وێ تهڤگهرێ كۆمبیت.
شاندا پارتی دێ ب سهرۆكاتییا فازل میرانی سكرتێرێ مهكتهبا سیاسی یا پارتی و ئازاد بهرواری، مهحموود محهمهد، جهعفهر ئیبراهیم، عزهدین بهرواری و رێبوار یهلدا، ئهندامێن مهكتهبا سیاسی یا وێ حزبێ پێكدهێت.
پهیڤدارێ پارتی دا زانین: وهكو عورفێ سیاسی، د كۆمبوونا سوبه دا، پارتی و گۆڕان دێ دانوستاندنێ ل سهر كارنامهیا روونشتنێن خوه كهن و ل سهر فورمهكێ دانوستاندنان رێككهڤن و ئێك ب ئێك دانوستاندنێ ل سهر خالێن چارهكرنا كێشهیان كهن.
ل گۆری زانیاریێن وار، ئهڤرۆ مهكتهبا سیاسی یا پارتی كۆمبوویه و فۆرما دانوستاندنێن خوه دگهل گۆڕانێ بهرههڤكرییه و پێشتر ژی گۆڕانێ پێنج خال بۆ دانوستاندنا دگهل پارتی بهرههڤكرینه.
تُتاح هذه الصورة أيضا في: کوردی