پارتى روونكرنه‌كێ لدۆر چه‌ند پرسێن گرنگ دده‌ت
WAAR-دهۆك:
به‌رپرسێ په‌یوه‌ندیێن ناڤخوه یێن پارتی رادگه‌هینیت؛ وان پاكێجه‌ك ئاراسته‌ی گۆرانێ كرییه و هه‌ر ده‌ما رازیبوو گۆتوبێژان ل سه‌ر بكه‌ن، پارتی دێ ئاماده بیت كۆمببنه‌ڤه.
عه‌لی حسێن، به‌رپرسێ په‌یوه‌ندیێن ناڤخوه یێن پارتی دیمۆكراتی كوردستان، ئه‌ڤرۆ د داخۆیانییه‌كێ دا بۆ رۆژنامه‌ڤانان گۆت: پارتی دیمۆكراتی كوردستان به‌رسڤا تێبینێن گۆرانێ ئاماده دكه‌ت، بۆ وێ یه‌كێ دگه‌ل وان دا بهێنه گۆتوبێژ كرن و دیاركر، بۆ كۆمبوونا بهێت، پارتی چاڤه‌ڕێیا گۆرانێ دكه‌ت.
دیار ژی كر، پارتی پاكێجه‌كا شه‌ش خالی ئاراسته‌ی گۆرانێ كرییه و تێبینیێن وان ژی وه‌رگرتینه، هه‌ر ده‌ما ئه‌و ئاماده بوون بۆ كۆمبوونێ و گۆتوبێژان ل سه‌ر وێ پاكێجێ، پارتی دێ ئاماده بیت.
ل دۆر په‌یوه‌ندیێن دگه‌ل كۆمه‌لا ئیسلامی ژی، عه‌لی حسێن ئاماژه كر، پارتی ب نیازه د ڤی ماوه‌ی دا دگه‌ل كۆمه‌لێ كۆمبیت.
ل دۆر گرفتا په‌ڕله‌مانێ كوردستانێ ژی گۆت: بۆچوونێن جودا ل سه‌ر كاراكرنا په‌ڕله‌مانی هه‌نه، لێ په‌رله‌مان نابیته ئه‌گه‌ر كو رێفراندۆم نه‌هێته كرن.
هه‌ر یه‌ك ژ پارتی دیمۆكراتی كوردستان و ته‌ڤگه‌را گۆرانێ ل بیست و ئێكی ڤێ مه‌هێ ل سلێمانیێ كۆمببوون و پارتی پاكێجا شه‌ش خالی د وێ كۆمبوونێ دا ئاراسته‌ی گۆرانێ كرییه.
تُتاح هذه الصورة أيضا في: کوردی