پارێ گهنمێ جۆتیارێن كوردستانێ بوویه سهكێ بانكى و ل نێزیك دێ هێتهدان
ئهڤرۆ نیۆز:
پهرلهمانتارهكا كورد ل پهرلهمانێ عێراقێ ئاشكرا دكهت كو بریارا خهرجكرنا 100 ملیار دینارێن عێراقى یێن پارێ گهنمێ جۆتیارێن كوردستانێ دهرچوویه و سهك ژى هاتینه دروستكرن و ههروهسا سایلۆیێن دهوك و ههولێر و سلێمانیێ ژى هاتینه ئاگههداركرن كو بچن سهكێن خوه وهربگرن.
ئەو ژی گۆت:کو جۆتیارێن دهوكێ دێ 35 ملیار دینارێن عێراقى وهرگرن و یێن ههولێرێ ژى دێ 45 ملیار دینارا وهرگرن و یێن سلێمانیێ ژى دێ 20 ملیار دینارا وهرگرن و گۆت ژى:ههر چهنده گۆژمێ گشتى یێ پارێ گهنمێ جۆتیارێن كوردستانێ ل سالا 2017 دا 149 ملیار دینارێن عێراقینه،لێ دڤێ قۆناغێ دا حوكمهتا عێراقێ دێ 100 ملیار دیناران وهكو شایستێن جۆتیارێن ههرێما كوردستانێ هنێریت،ههر چهنده بریار ل سهر ههموو پاران هاتیهدان و سهدێ سهد دێ هێنه خهرجكرن،لێ نوكه بتنێ دێ حوكمهتا عێراقێ 100 ملیاران دیناران دهت.
ناڤهاتیێ دیاركر ژى:ههردهم ڤهگوهاستنا پارێ گهنمێ جۆتیاران ژ بهغدا بۆ ههرێما كوردستانێ گهلهك گیرو دبیت،لێ ڤێ جارێ گیرو نابیت،ژبهركو پشتى بانكا ناڤهندى یا عێراقێ لقهكێ خوه ل ههرێما كوردستانێ ڤهكرى،ئهڤ چهنده بوویه رێخۆشكهر كو ئێدى پارێن جۆتیارا گیرونابن.
نهجیبا نهجیب ئهو ئهنداما لیژنا دارایى یه ل پهرلهمانێ عێراقێ بۆ ئهڤرۆ نیۆز دبێژیت:ههكه مه دووڤچوونا ڤى بابهتى نهكربا و مه گڤاشتن ل سهر حوكمهتا عێراقێ نهكربا،دا ڤێ جارێ ژى ئهڤ پاره گهلهك گیرو بن،چونكى گهلهك رۆتینیاتێن ئیدارى یێن د بریارا دانا پارێ گهنمێ جۆتیارێن كوردستانێ دا ههین ههتاكو دبیته سهكێ بانكێ،لهورا ب بهردهوامى مه ئهڤ بابهته ل گهل سهرۆك وهزیران و جهێن پهیوهندیدار بهحسكریه و ئهم شیاین زوو ڤى بابهتى بهرئێكڤه بینین،ژبهركو ههردهم غهدر ل جۆتیارێن مه دبیت و پارێ خوه زوو وهرناگرن،لێ ههموو جۆتیارێن عێراقێ پشتى 10 رۆژان ژ تهسلیمكرنا گهنمى پارێن خوه وهرگرتینه و بتنێ یێن كوردستانێ ماینه كو ئهڤه سێ ههیڤه ل هیڤیێ،ههروهسا ژ سهرجهمێ 1 ملیۆن و 260 هزار تهنێن گهنمێ ههرێما كوردستانێ،بتنێ بهغدا گۆژمێ 882 هزار و 645 تهنێن گهنمى وهرگرتینه.
نهجیبا نهجیب زێدهتر دیاركر ژى:پارێ گهنمێ جۆتیارێن ههرێما كوردستانێ یێن سالێن 2014 و 2015 و 2016 پترى 728 ملیار دینارێن عێراقى بۆ هاتینه تهرخانكرن،ههر چهنده ئهڤ گۆژمێ پارهى ژى یێ هاتیه پهسهندكرن،بتنێ یا ماى كو ئهڤ بریاره ل رۆژناما”وهقائیعا عێراقى” بهێته بهلاڤكرن و ههر چهنده مه وهزیرێ دادێ ئاگههداركریه ل سهر ڤى بابهتى كو زوو ڤى گۆژمێ پارهى ژى د رۆژنامێ دا بهلاڤه بكهت،ژ پێخهمهت وهزارهتا دارایى بشێت وى گۆژمێ پارهى ژى بۆ جۆتیارێن ههرێمێ رهوانه بكهت و پشتى بهلاڤكرنێ د رۆژنامێ دا ئهو پاره ژى دێ هێته خهرجكرن،لێ ئهو دێ پشتى تهمامبوونا پارێ سالا 2017 بیت،هێشتا دبێژیت:ههولێن مه د بهردهوامن ژ پێخهمهت پارێن گهنمى یێن ههموو جۆتیارێن كوردستانێ بهێنه خهرجكرن داكو جۆتیارێن مه ژى بگههنه شایستێن خوه یێن دارایى.
تُتاح هذه الصورة أيضا في: کوردی