بەرات دباوەریا ئێزدیان دا
مەهدی حەسەن موراد
بەرات ئێكە ژ نیشانێن پیرۆزێن مە ئێزدیانە ، ژ ئاخا لالشا پیرۆز و ب ئاڤا كانیا سپی و هندەك ماستی وەكی(هێڤێن )ڤەدسترێن و بەراتا ژێ چێدكەن،ل پەرستگەها پیرۆزا لالش و د هندرویێ شكەفتا ئاخا بەراتاندا ، لسەر دەستێ كچ و كورێن ئێزدیان دگەل خلمەتكارێن پەرستگەها لالش ، لبەر رۆناهیا چەقەلتوو و چرا بەراتا چێدكەن ، هەر كەسەكێ قەستا لالش بكت دەمێ زیارەتی دەرچكا دەرگەهێ شیخادی دبت گیانێ من گۆری ئەگەر بڤێت داخوازا بەراتەكێ ژ فەقیرێ مالا شیخادی دكت و بەراتەكێ وەردگرت بۆ مالا خۆ ،گەلەك جارا گوندی و جیرانێن وی كەسی ژی هەق هەیە بەراتەكێ بۆ وان ژی دگەل خۆ بینت ،دیسا دەمێ تاووس دگەرت ل ناڤ ئێزدیان هەر مالەكێ بەراتەكێ ددەنێ و هەر مالەكا شاشی هەبن و پێگیری رێورەسمێن ئێزدیاتیێ نەبت و رێز ل تفاق و تەبایێ و ئێزدیاتیێ نەبن دەمێ بەراتێ دەنێ هوشداریەكێ دەنێ و شەرمەزاردكن دناڤا جڤاكی دا دووبارەنەكەتە ڤە شاشێن خۆ ،ئەڤ پارڤەكرنا بەراتا ل گەرا تاووسێ دئێت پشتی قەوالێن دگەل گەرا تاووسێ شیرەت و تەكبیرا ل ئێزدیان دكن و ئێزدیاتیێ ژ وان را رۆن دكن تفاق و تەبایێ دناڤ وان دا موكوم دكن و بەحسێ هنەر و كەرامەتا شیخادی دكن كو مرۆڤێ ئێزدی نابت ل رێیا شاش و خراب ب رێڤەبچت وهەر كەسەكێ شاشی ژی هەین ل خۆ ب زڤرت و بەراتەكا شیخادی گیانێ من گۆری وەردگرت دگەل خۆ هێدی لسەر رێیا راست و دروست ب رێڤە بچت و فەرزە لسەر مێرێ ئێزدی چ ژن بت یان مێر بت بەراتەك دگەل دا بت.
كەڤناتیا بەراتێ..
دباوەریا مە ئێزدیاندا ،بەرات نیشانەكا كەڤنە ڤەدگەرتە بەری هاتنا شیخادی بۆ ناڤ ئێزدیان.
* ژ قەولێ هەفساری دبێژت
گەلی برا گوه بدێرن علمێ خودێ هەموو نەسیحەت و خێرن
خەت و بەراتێت سلتان ئێزی زێرن
دا مرید بۆ خۆ هلگرن و ڤەشێرن
***********************
*ژ قەولێ قەرفرقان
چی سبەبەكە ژ یێت غروورە
پەدشێ مە بۆ مە نازل كربوون
علم و بەرات وخەت و مشوورە
*******************
چی سبەیەكە ب قیمەتە
پەدشای بۆ مە نازل كربوون
علم و بەرات و مشوور و خەتە
كەنگی و چاوا ئێزدی بەراتێ ب كار دئینن..
1_ نابت هەڤژینێن ئێك بەراتێ ژ دەستێن ئێك وەربگرن لگۆڕ ئەدەبێ ئۆلا ئێزدیان ، بەرات تێت هێڤێنێ ئەردێ یە چنكو ژ ئاخ و ئاڤا لالش تێتە دروستكرن دێ بنە خووشك و برا ، ژبەر هندێ ئەو هێڤێنێ ژ دەستەكی بۆ دەستەكی دی بێتە وەرگرتن هەردوو دەست دێ بنە خودان ئێك هێڤێن، ژبەر هندێ هێڤێنێ خوشك و برا ئێكە،لەوما هەتا ئێرۆ ڕۆژ دناڤ ئۆلا ئێزدیان دا نابت هەڤژینێن ئێك بەراتێ ژ دەستێن ئێك وەرگرن دبنە خووشك برا چنكو بەرات هێڤێنە.
2_ دڤێت هەر مالەكا ئێزدی بەرات لێ هەبن و د جیەكی پاقژدا دهلگرتی بن دباوەریا وان دا دەستورە بۆ سوندا وان و بەرەكەتە بۆ ڕسق و مالێ وان چنكو هێڤێنێ ئەردی یە.
3_كورێ ئێزدی ل دەمێ ژن ئینانێ یە فەرە و فەڕزە شێخەكی یان پیرەكی بخۆ بكەتە برایێ ئاخرەتێ ، دوی دەمی دا ئەو شێخ یان پیر دێ بەراتەكێ ناڤ ئاڤێ كت و دێ وێ ئاڤێ بسەر وی ڤە كەت،مەرەم ژێ دێ بتە برایێ وی یێ ئاخرەتێ، هەروەسا ب وی كاری كچا ئێزدی دەمێ شووكرنێ دێ شێخەكێ یان پیرەكێ دێ كەتە خووشكا خۆ یا ئاخرەتێ ، ئەو كچا شێخ یان پیر دێ بەراتەكێ ناڤ ئاڤێ كت و دێ بسەر ڤەكت و دێ بتە خووشكا وێ یا ئاخرەتێ.
4_ پشتی هەر دوعایەكێ دڤێت ل بەراتێ زیارەتی بین.
5_دەمێ هەر ئێزدیەك دچتە رێ و رێباریان، گەرەكە بەراتەكێ دگەل خۆ هلگرت.
6_ دەمێ ئاریشەكا جڤاكی تێتە چارەسەركرن ب تایبەت ئاریشێن خونداریی هەر دوو ئالی لسەر پێكهاتنێ ب بەراتێ سوند دخۆن و پاشی بەراتێن خۆ پێك دگهۆرن ب مەرەما بەخت و باوەریێن خۆ دانە ئێك.
7_دەمێ كەسێ ئێزدی دچتە بەر دلۆڤانیا خودێ پیرەك یان شێخەك دێ بەراتەكی لسەر چاڤێن وی دانێت ئەو ژی ب مەرەما پیرۆزكرنێ و حەلال كرنا لەشی.
8_ل دەمێ گەرا تاووسێ بۆ ناڤ گوندێن ئێزدیان ئەو كەسێ بڤێت بۆ جارا بێت تاووسێ ل مالا خۆ قۆناغ بكت دێ داخوازا بەراتەكێ ژ فەقیرێ بەر تاووسێ كت،چنكو ئەو بەرات دەستوورە بۆ ئینانا تاووسێ.
9_بەرات بۆ ئێزدیان تەسكەرەیە و بۆ وان مینا پێناسەیەكە.
10_دەمێ زەلامێ ئێزدی ژنكا خۆ بەرددەت ، بەراتەكێ ددەستێ وێ دكت.
11_ئێزدی ب رۆژی بت ، ل دەمێ فتاری دڤێت ل بەراتەكێ زیارەتی بت.
ژێدەر:
_پەروەردا ئێزدیاتی پۆلا دەهێ ئامادەیی
_ل گۆر پەرتۆكا بناڤێ ( ژ پیرۆزیێن ئێزدیان) بەرهەڤكرن ژلایێ ( پیر خەلات ئلیاس جعفو، زهێر عرب سلو).
تُتاح هذه الصورة أيضا في: کوردی