حسێن قائیدی:حكومەتا عێراقێ چوو پلان و پرۆژە بۆ رزگاركرنا گرتیێن ئێزدی ب جه نەئینایە
تۆرا لالش یا راگەهاندنێ
رێڤەبەرێ نڤیسینگەها رزگاركرنا رەڤاندیێن كوردێن ئێزدی ل پارێزگەها دهۆكێ(حسێن قائیدی) د دیدارەكێ دا بۆ رۆژناما دەنگێ لالش دیاركر كو هەتا نهۆ(3244) كەس ژ دەستێن داعش هاتینە رزگاركرن و هێشتا (3173)كەسێن دی ماینە،راگەهاند ژی د پلانا رزگاركرنا باژێرێ مووسل دا هیچ خالەك تێدا نەبوو بەحسێ كچ و ژنێن ئێزدی بێتە كرن،ئەو چەندە ژی ئاشكەراكر حكومەتا عێراقێ چوو پلان و پرۆژە بۆ ئازادكرنا گرتیێن مە ب جه نەئینایە و بتنێ سەرۆكێ حكومەتا هەرێما كوردستانێ پشتەڤانی كریە بۆ رزگاركرنا وان.
سەبارەت ژمارا گرتیێن ئێزدی و كارێ نڤیسینگەهێ بۆ رزگاركرنا وان(قائیدی)ئاشكەراكر،دەستپێكا كارەساتا شنگالێ و هەتا نهۆ(6417)وەلاتیێن كوردێن ئێزدی كەفتنە دەستێن تیرۆرستێن داعشێ دا،ئەو ژی زارۆك و كچ وژن و زەلامن،وەك نڤیسینگەه ل هەیڤا ئوكتوبەرا سالا(2014)ێ مە دەست ب كارێ خۆ كر و ئارمانجا سەرەكی ئەو بوو رزگاركرنا وان كەسان بێتە كرن،كو هندەك تۆر دانان چ ل هەرێما كوردستانێ یان وان جیێن بن كۆنترۆلا داعشێ دا ئەم و ئەو پێكڤە گرێداینە بۆ هندێ ئەم وان كچ و ژنێن گرتی رزگاربكەین،هەر ژ دەستپێكا كارێ مە و هەتا نهۆ(3244) كەس ژ دەستێن داعش هاتینە رزگاركرن و ل گۆری وان ئامارێن دەستێ مەدا (3173)هێشتا گرتینە و هەول و بزاڤێن مە دبەردەوامن ژبۆ رزگاركرنا یێن مایین.
لدۆر كەسێن هاتینە رزگاركرن ناڤهاتی راگەهاند،ژ وێ ژمارەیا كەسێن هەتا نهۆ هاتینە رزگاركرن پتر ژ(1130) كەسان ژنن و(355) زەلامن و پتر ژ (1732)كەسان زارۆكن ب هەردوو رەگەزان نێر و مێ،هەروەسا د رۆژا توندوتیژیا دژی ئافرەتان دا سەرۆك مەسعود بارزانی تەكەز ل ڤی بابەتی كر كو كارێ نڤیسینگەهێ دێ بەردەوام بت بۆ رزگاركرنا كەس و كارێن مە یێن دەستێ داعشێ دا.
هەروەسا لدۆر رزگاركرنا گرتیێن ئێزدی دپلانا پرۆسا رزگاركرنا باژێرێ مووسل دا گۆت:دەمێ پرۆسا رزگاركرنا باژێرێ مووسل دەستپێكری مە پێزانین هەبوون كو گەلەك كەس و كارێن مە ل وێدەرێ هەنە ،بەلێ دەمێ ئۆپەراسیۆن ب داوی هاتی مە هزركر دێ سەدان كەسێن ئێزدی ئێنە رزگاركرن ب مخابنی ڤە نەهاتنە رزگاركرن مە دووڤچوونا بابەتی كر بۆ مە دیار بوو دەمێ پلانا رزگاركرنا مووسل هاتیە دانان هیچ خالەك تێدا نەبوو كو بەحسێ كچ و ژنێن ئێزدی بێتە كرن،مە هندەك داخوازی ژێ كربوون د دەمێ ئۆپەراسیۆنێ دا ئەو رێیا رۆژئاڤایێ باژێری بێتە دائێخستن دا تیرۆرستێن داعشێ نكارن ئەوان كەس و كارێن مە بەرەف وەلاتێ سووریا و وەلاتێن دیتر ببەن،داخوازا دی ژی ئەو بوو كو جیێن گۆمان تێدا هەین ئەو كەس و كارێن مە ل وێدەرێ ب هیچ شێوەكی نەئێنە تۆپبارانكرن ژبەر گیانێ سلامەتیا وان.
ل هەمبەر پلانا حكومەتا عێراقێ بۆ رزگاركرنا گرتیێن ئێزدی، رێڤەبەرێ نڤیسینگەها رزگاركرنا رەڤاندیان ئاشكەراكر،جیێ داخێ یە حكومەتا عێراقێ چوو پلان و پرۆژە بۆ رزگاركرنا گرتیێن ئێزدی ب جه نەئیناینە،بتنێ سەرۆكێ حكومەتا هەرێما كوردستانێ پشتەڤانی كریە بۆ رزگاركرنا گرتیان،ئەگەر هندەكێن دی وەك دەولەتێن جیهانی و حكومەتا عێراقێ هاریكاریا مە كربانە دا گەلەك كەسێن مە یێن دی رزگاربانە و نڤیسینگەها مە دێ یا بەردەوام بت هەتا ئێك كەس د دەستێن تیرۆرستێن داعشێ دا مابت.
دەربارەی چارەسەریا دەروونی بۆ كەسێن رزگاربووی(قائیدی) دبێژت:بۆ پێشكێشكرنا خزمەتكاری و خۆشكرنا جیێن وان ئەم دهێلین بۆ رێكخراوا و حكومەتێ ڤە،چنكو كارێ مە یێ سەرەكی ئەوە رزگاركرنا وانە،بەلێ پشتی ژمارا وان كەسێن رزگاركری زێدەبووین مە لڤی بابەتی خۆ كریە خودان و مە سەنتەرەك دگەل رێڤەبەرێ ساخلەمیا دهۆكێ ڤەكریە،كو پتری(1100) كەسان لڤی سەنتەری هاتینە چارەسەركرن و پرۆگرامەك هاتە دانان ب رێیا سەرۆكێ حكومەتا هەرێما كوردستانێ دگەل وەلاتێ ئەلمانیا پتر ژ هەزار كەسان برنە وێدەرێ بۆ چارەسەركرنا وان كچ و ژنێن ژ دەستێن داعشێ رزگاربووین،هیڤیا مە ئەوە كو حكومەتا هەرێما كوردستانێ و رێكخراو و دەولەتێن جیهانی تایبەتمەندیەكێ بۆ ڤان كچ و ژنان بێتە دانان،ژبۆ خۆشكرنا مەعیشەت و جیێن وان.
ل داویێ و سەبارەت كەسێن ئێخسیر(حسێن قائیدی)دیاركر،نێزیكی (30) كەسان هەنە ئێخسیرن و چ كەسێ خۆ نینە،لەوا مە راپۆرتەك بۆ وان چێكریە و بۆ نڤیسینگەها سەرۆكێ حكومەتا هەرێمێ فرێكریە،دوێ باوەریێ دام دپاشەرۆژەكا نێزیك دا كارەك دێ بۆ وان ئێتە كرن،داكو ژیانا خۆ بەردەوام بكن.
تُتاح هذه الصورة أيضا في: کوردی