ل ئەمریكا پێشانگەھەك بۆ نیشاندانا ئێشێن ئێزدیان تێتە ڤەكرن
باسنيوز:
كچەكا ئێزدی یا بەرهەڤیا هندێ دكەت ب كەڤالێن خۆ ڤە بەرەڤ وەلاتێ ئەمریكا بچیت بۆ ڤەكرنا پێشانگەهەكا كارێن وێ یێن دەستی و ئێش و ئازارێن ئێزدیان ل ئەمریكا نماییش بكەت.
كچا شێوەكار مریەم مەروان خەلكا ناحیا گرعزێرە ل باكووری قەزا شنگالێ، بۆ (باسنیۆز) راگەهاند، من پتر ژ 30 چیرۆكێن كچێن رزگاربووی ژ ناڤ دەستێن تیرۆرستێن داعش ب كەڤال و تابلۆ درۆستكرینە، هەروسا ئەو دیمەنێن نەخۆش یێن من دیتین من كرینە كەڤال ل چیایێ شنگالێ و د ناڤ خیڤەتان دا و هەتە نۆكە من دوو پێشنگەه د كەمپا خانكێ یێن ڤەكرین و پێشانگەهەك ژی ل وەلاتێ ژاپۆنێ ڤەكریە و من ل بەرە د ڤێ مەهێ دا بەرەڤ وەلاتێ ئەمریكا ڤە بچم و پێشانگەها خوە یا چارێ ل ئەمریكا ڤەكەم.
ژیێ وێ دگەهێتە نێزیكی 21 سالان و نها ئاوارەیە ل كۆمەلگەها خانكێ و زێدەتر دبێژیت: هەر ژ دەستپێكا زارۆكینیا خوە دا، من كەڤال چێ دكرن و من حەزا چێكرنا كەڤالان هەبوو و من دەست ژ چێكرنا وان بەرنەدا و خێزانا من حەز ژ كەڤالێن من دكر و پتر پشتگریا من دكرن هەتە كو ئەز كەڤالێن جوانتر چێكەم.
مەریەمێ هەروەسا گۆت: پشتی 3/8/2014 تیرۆرستێن داعش ب سەر دەڤەرا شنگال دا گرتی و ب هەزاران خەلكێ مە یێ بێ گونەهـ كوشتین و كچ و ژن و زارۆك رەڤاندین و ئەم ژ وارێ مە دەركرین و بەرڤ ئاواربوونێ د خیڤەتان دا د هەرێما كوردستانێ و ژیانەكا سەخت و دژوار، من ژی هەول دا ئەز وان نەخۆشیێن ب سەرێ خەلكێ مە هاتی بكەمە كەڤال و ب رێیا پێشنگەهان بۆ جیهانێ دیاربكەم یا ب سەرێ مە هاتی.
تُتاح هذه الصورة أيضا في: کوردی