گرنگیا ڤەكرنا مۆزەخانەكێ ل هەرێما كوردستانێ لدۆر جینۆسایدێن ئێزدیان
بەختیار قادر
د درێژاهیا دیرۆكێ دا مللەتێ كورد ب گشتی و مللەتێ ئێزدی ب تایبەتی تووشی كۆمكوژیێن بكۆم و قركرنێ بووینە،دكۆمكوژیێن بەرێ یێن بسەرێ ئێزدیان دا هاتین ڤەكۆلەر و گرنگیپێدەرێن ئێزدیان پشت بەستن لسەر بەلگەیێن دوژمنی كرینە كو وەك خۆ بەحس ل روودانان دكرن و زانیاری ب شاشی و نەدروست بەلاڤكرن،گەلۆ ژ نهۆ و پێدا و دگەل هەبوونا هەموو تشتێن پێتڤی چاوان ئەڤ كۆمكوژی وەك دكیۆمێنت دێ مینن و بۆ جیهانێ ئێنە ڤەگوهاستن و ناساندن.
وەك ڤەكۆلەر و رەوشەنبیر وگرنگیپێدەرێن ئێزدیان ددەن خویاكرن كو هەتا كۆمكوژی و فەرمانا(73)ێ،ژبەر نەبوونا گەلەك تشتێن پێتڤی ئێزدیان پشت بەستن سەر بەلگەنامێن دوژمنی كریە بۆ ڤەگوستنا روودانێن چێبووین و وەك خۆ نڤیساینە و ب شاشی بەلاڤ كرینە،بەلێ ئیرۆ هەر تشتەكێ پێتڤی یێ لبەر دەست كو هەر بوویەرەك بسەرێ كوردێن ئێزدی دا بێت كو بێتە دكیۆمێنتكرن و پاراستن،ب تایبەت كۆمكوژیا بسەرێ ئێزدیان دا هاتی ل شنگالێ ل(3/8/2014)لسەر دەستێ درەندەترین رێكخراوا تیرۆرستی بناڤێ داعش،كو كرێترین تاوانێن دژی مرۆڤایەتیێ دەرهەق ئێزدیان ئەنجام دان بگرە ژ كوشتن و گرتن و تالانكرن و وێرانكرن و دەربەدەری و ئاوارەبوونێ،هاتینە وێنەكرن و ڤیدیۆكرن و چیرۆكێن گەلەك رزگاربوویان هاتینە نڤیساندن و دكیۆمێنتكرن و پەرتۆك لسەر كۆمكوژیێ هاتینە چێكرن و گۆرێن بكۆم هاتینە دیتن و لسەر ئاستێ نێڤ دەولەتی ژلایێ چەندین وەلاتان ڤە ئەڤا ئێزدی تووشبووینێ ب جینۆساید داینە ناساندن،لەوا فەرە ئەڤ بەلگەیێن هەین و لبەردەست نەئێنە ژ دەست دان و كار لسەر بێتە كرن كو كەیس ب فەرمی ب جینۆساید بێتە ناساندن،چنكو دبەرێ دا كۆمكوژیێن ئێزدیان وەك پێتڤی نەهاتینە دكیۆمێنتكرن كو دجیەكێ دا بێنە كۆمكرن و نیشا جیهانێ بێنە دان.
پشتی كۆمكوژیا ڤێ داویێ ل شنگالێ چەندین شاندێن بیانی سەرەدانا پەرستگەها پیرۆزا لالش و چەندین دەڤەرێن ئێزدیان كرن و بەردەوام دكن ژی كو بزانن چ بسەرێ ئێزدیان دا هاتیە،ئەگەر مۆزەخانەك ل هەرێما كوردستانێ بێتە ڤەكرن و وێنە و ڤێدیۆ و كەرەستە و دیمەن و چەندین بەلگەیێن دی یێن هەموو كۆمكوژیان تێدا بێنە كۆمكرن و نیشاندان دێ گرنگیا خۆ هەبت و تایبەت بۆ كەسانێن بیانی چ ڤەكۆلەر یان رۆژنامەڤان و رێكخراو و گشتی بن،چنكو دێ بەلگە بەردەست و دیار بن كو بزانن چ بسەرێ ئێزدیان هاتیە و پاش ب دروستی و راست ڤەگوهێزن بۆ جیهانێ.
تُتاح هذه الصورة أيضا في: کوردی