پێتڤیە تۆمارا دەنگدانێ و كۆمسیۆنا هەلبژارتنان ژ لیستا ناڤێن نە دروست بێتە پاك كرن
جوان بەرواری
كوردان ب درێژاهیا دیرۆكێ خەبات كریە و د بەرهەمێ شۆرەش وتێكوشینا وان دە، زۆر جاران دەرفەت و بۆهاتینە پێش مخابن ل هەر دەم و دەرفەتەكێ دە ب شێوەكێ نەزان سەرەدەری كریە،چنكو هزر دئاڤاكرنا رەخنەیەكا تەندروست دە نەكریە،لەورا ژی بەردەوام خۆ دایە خاپاندن،بەلێ پشتی وان هەموو پرسگرێكێن ل سالا بۆری دە هلداین،درووشێمن سیاسی دخوازن رەوشێ بەر ب ئاوایێ خۆشگوزەرانیێ دە ببن،گەلۆ زانە بوون، پرس، هەلویست و سەرەدەریكرنا كارێكتەرا سیاسی ئەڤ جارە د تەیورا وەرارا جڤاكی و هەرێمێ دە، دێ چەند باندۆرا خۆ هەبت؟ واتە پێتڤیە كارێكتەرا سیاسی، نوونەراتیا خۆ یا راستەقینە بۆ خەلكی بسەلمینت،دەستهەلاتەكا تەندروست بێتە داناندن كو رووبەرووی گەندەلیێ، بێ یەكسانیێ و كارپێنەكرنا یاسا سەروەرانە بت،ژبەركو پێتڤیا شەقاما سیاسی، ب بەرپرسیارەتیا عەقلێ سیاسی هەیە.
د هەمان پرس دە، هەلبژارتنێن گشتی، ئێكە ژ میكانیزمێن گرنگ بوو داناندنا بونیاتێ دیمكراسیێ هەرێمێ و دەستا ودەست كرنا دەستهەلاتێ، د چارچووڤێ هشیاربوون و رێكخستنێ دە، ل دووڤ بریارا سالا چووی هۆسان دیارببوو كو دسالا(2018)دە، هەلبژارتن بێنە ئەنجام دان بۆ عێراقێ و هەرێما كوردستانێ، دیارە ئەڤ چەندە ژی ژبۆ هەردووكان كارەكێ ئاسان نینە،چنكو نائێتە پێشبینكرن كو ئەڤ هەلبژارتنە ب شێوەیەكێ نەرم و ئارام بێنە ئەنجام دان، ژبەركو بۆ عێراقێ ئێكەم هەلبژارتنێن پشتی رێكخراوا تیرۆریا داعش،بۆ كوردستانێ ژی پشتی وان هەموو شەر و ناكۆكی و ئەنجام دانا ریفراندۆمێ و كێشەیێن 16 ئوكتۆبەرێ نە، ل دووڤ وان مەرجێن عێراقێ و هەرێمێ ئەگەر ئەڤ جارە ژی خۆلا هەلبژارتنان هاتنە ئەنجام دان، گەلۆ دێ بتە هەلبژارتنەك سناریووی، یان ژی دێ بتە هەلبژارتنەك نووخوازی د مودێلا حوكمرانیا سیاسی دە؟ واتە لگۆر ڤان ئالۆزیێن نهۆ هەرێما كوردستانێ كەفتیە تێدا ب هزرا من، ئەگەر هەلبژارتنەكا رێكخستی و ب فشاری بێت ئەنجام دان دبت دەنگێ وەلاتی ببتە جیێ گهۆرینا شەقاما سیاسی و مەدەنی،بەلێ ئەگەر ما هەمان هەلویست و دیتنا جاران، دبت رەوش بەر ب ئالۆزبوون و نالە باریەك دی تر دە بچت،چنكو ل دووڤ تۆمارا دەنگدانێ و كۆمسیۆنا هەلبژارتنا بالا دماوێ هەلبژارتنێن بۆری ژلایێ فشارو سازیێن دەستهەلاتێ دە، دیار دبوو كو ئیهانەتكرن ب ماف، ئەرك و دەنگێ وەلاتیان پیرۆزییا مللەتی دە دهاتەكرن ئانكو بەرهەمێ وەفاداریا خەلكی گەهشتە ڤی بارودۆخ و چارەنڤیسێ ئیرۆ كەتین تێدا،ژبەركو لگۆر وێ بهسیتنا تۆمارا دەنگدانێ و هەلبژارتنا كۆمسیۆنا بالا، نێزیكی (800)هەزار دەنگدەرا یێت هەین و مافێ دەنگدانێ نینە،چنكو هندەكان دایكبوونا وان یا گونجای نینە بۆ دەنگدانێ،هندەك دەنگێن وەهمی نە، هندەك دەنگ دوبارەنە، هندەك دەنگێن مرۆڤێن داوی ب ژیانێ ئینا دی، دیسان رێژەیەكا زۆرا پەنابەرو خەلكێن دەوربەرێن هەرێمێ ئەوێن ئاكنجی بووین ناسنامە بۆ دروست كرینە كو مافێ دەنگدانێ هەبن و…هتد،ئەڤە هەموو ئەو دەنگن یێن كو كرینە لیسەتەك دناڤ تۆمارا دەنگدانێ دە،ژبۆ وێ چەندێ داكو باندۆرا نەجەحاتێ لسەر دەستڤەئینانا دەنگان و دەستهەلاتا جاران هەبت،لەورا ئەگەر ئەم هزر بكەین، دبت ئەو دورهێلێ رەوش بەرەف لاوازی و كێشە و قەیران دە بری ئە ئەڤ یەكە بوویە سەدەمێ سەرەكی،چنكو مە چ جاران هزر د ئاڤاكرنا عەقلێ خۆ دە نەكریە كو ب بینە مللەتەكێ پێشكەفتی و ب كێر دۆزا دەولەتا خۆ بێن.
بەردەوام پێتڤیا مە ب پرسان هەیە، ژبەركو ئەڤە بۆ ماوێ (26)سالایە چەندین خۆلێن هەلبژارتنان هاتنە ئەنجام دان، بەلێ دەستهەلاتا سیاسی نكاریە خۆ ل بەرامبەری وێ باوەری و راستگۆیا دەنگێ خەلكی ب بنت؟،چنكو دەستهەلاتێ ئەو یەك ژبۆ بەرژەوەندا وەلاتیێ هەرێمێ نەدایە خووندن و فامكرن،بەلكو ب تنێ ژبۆ مان و بەرژەوەندا خۆ بوویە،لەورا ژی نكاریە ببتە دەستهەلاتەكا ب باوەر و خورت تر ژ روویێ سیاسی ، ئابووری، دارایی، پەرلەمانی،خۆشگوزەرانی و…هتد بۆ وەلاتیێ هەرێمێ، ژ ئالیەكێ دیڤە ژی دبت خەلكێ هەرێمێ هەردەم ئەو چەندە خوازت بت كو بونیاتێ خۆ دئاڤاكرنا دەولەتێ دە ب بینت،لەورا ژی دهەر دەمەكێ دە مانە مورالا وان وەكو یا جاران خۆش باوەر بوویە.
ل داویێ دبێژم: پێتڤیە خەلك ئێدی پێداچۆنەكێ د هزر و عەقلێ خۆ دە بكت، بزانت ئەو دەنگێ ئێتەدان دێ چەند زیانێ گەهینت و چەند مفای گەهینت،لەورا باشترین چارەسەری ژبۆ ئاڤاكرن و دەستڤەئینانا دەرفەتەكا سەركەفتی ئەوە، ئەگەر بریارا ئەنجام دانا هەلبژارتنان بێتە دان ئێكەم پێنگاڤ ئەوە خەلكێ كوردستانێ ل دەنگێ خۆ هشیاربت و ئەو بخۆ بریارا دەنگێ خۆ بدەت،دیسان فشارەكا جدی بێتە كرن، لسەر دام و دەزگەهێن دەولەتێ، یا ژ هەموو گرنگتر ئەوە كو پێتڤیە تۆمارا دەنگدانێ و كۆمسیۆنا هەلبژارتنان ژ لیستا ناڤێن نە دروست بێتە پاك كرن و چاڤدێری ژ هەموو روویەكی لێ بێتە كرن، داكو چاكسازیەكا ریشەیی لسەر هەرێمێ و مودێلا سیاسی دە بێتە كرن و دەستهەلات ب دەم چاڤەكێ نوو بێتە داناندن، ژبۆ خێرو تەڤاهیا مللەتی.
تُتاح هذه الصورة أيضا في: کوردی