ژ كەلەپۆرێ باب وكالا.. حەكیم وحەكیمی
ئلیاس نەعمو خەتاری
حەكیم وحەكیمی ل وی دەمی دەمێ خووندن وخووندەڤان نەبوون لێ چاوا دزانین ڤی كاری بكن و كێ فێردكرن،ل دەمێن بەرێ ژیان یە سەخت ودژواربوو ب هەموو رەنگێن خۆڤە دەربازبوونا ڤێ ژیانێ ب ئەردی ڤە ودگەل گیانەوەران وب سروشتی ڤە یە گرێدای بوو ب شێوەكی ئێكسەر،لەوما مفایێ هەری مەزن ژ ڤی سروشتی وەردگرت دەرمان نەبوون ئانكو جۆرێن روەك ورەه وقەدێن وان روەكان وتۆڤێ وان بكاردئینان ودكرنە دەرمان بۆنەساخان ولسەر ئێش وبرینێن وان بكاردئینان دا ساخبن وچارەسەریا وان بێتەكرن، هەلبەت بۆ ڤی كاری گرنك وقرس كەسێن شارەزا هەبوون دگۆتنێ حەكیم وگەلەك بنەمال هەبوون كارێ حەكیمێ ژ باب وباپیران وەردگرتن دگۆتنێ مالێت حەكیما وتا ئیرۆ ئەڤ ناڤ ماینە،لێ كارێ وان وێ كێمبووی ئەوژی ژبەر پێشكەفتنا زانین وزانستێ نەخاسمە نۆژداری وزاڤبوونا جۆرێن دەرمانێن پێشكەفتی بەلێ هەر هندەك كەسێن شارەزا دحەكیمیا بەرێ دا ل گەلەك گوند وباژێركا وێت ماین و بەردەوام خەلك دچنە جەم مینا ئێشا پشتێ وبربرا وی و جۆرێن سۆتنێ وشكەستنا هەستیكا.
لجەم ئێزدیان سونەتكرنا مرۆڤێن رەگەزێن نێر ئەركەكی فەرمییە و فەرزەكە ئاینییە،لەوما دڤێت هەموو زارۆكێن ئێزدیان كورك بێنە سونەتكرن دا حلال بن،ل هێرە حەكیمێ ڤی كاری هەبوو دچۆ بەرەف دەشت و چۆلێ ڤە ژ روەك ودەغەلێن دەشتێ دەرمان چێدكرن بۆ سونەتكرنێ بكاردئینان،ل رۆژا سونەتێ ناڤ و نیشانێن عەلبێ جارەكا دن دهاتنە ڤە،لێ نە ژبۆ پیڤانێ بوو بۆ زارۆكی دهاتە سونەتكرن لسەر علبێ با ئانكو ل جیێ تەختا وكورسیكا دهاتە بكارئینان حەكیمی دەفك و دوزان بكاردئینان و دەرمان ژ دەشتێ وخۆلیێ بكاردئینان وجیێ هاتبا سونەتكرن ب وان دەرمانان دەرمان دكر بۆ ماوێ سێ رۆژا سەرەدانا نەخۆشێن خۆدكر،هەر دیسان حەكیمی بۆ گەلەك ئێشا بكاردئینان وەكی ددانا و سەر ئێش وزگ ئێش وكولبوونا هەر جهەكی نەساغی با وەكی خونبەردان ژ بن گوها وهلینا سەری وشكاندنا قولنجا هەردیسان چێكرنا ئێشێن پشتێ وبربرا وێ كارێ هەری بەربەلاڤ جەبراندنا هەستیكا دەمێ شكەستنێ یان ژ جی چۆنێ بۆ ڤی كاری ئاڤا گەرم و سابوون ودارك ونیفل وموی بزنا وهری وپارچێن تەحتی دگەل بەرخاندنێ كاردكرن،هەردیسان ژبلی حەكیمی گەلەك شڤان وگاڤانان ئەڤ كارە دكر تایبەت دەمێ ل دەشتێ و گیانەوەر پێتڤی با یان لنگەكی وی شكەستبا یان دەمێ دزان بكارێ وان رادبوون وهاریكاری ددایێ،داپیركی نائێتە ژبیركرن وزۆربەیا خەلكێ مە ژدایك بوونا دەمێ داپیركێ نە ئانكو ژنەكا مەزن وبكارێ زارۆكبوونێ یە شارەزا هەبوو ل دەمێ ژن دكەفتە بەر زارۆكی دێ باكربانێ دگۆتنێ داپیرك و بۆ ماوێ هەفت رۆژا داپیركێ سەرەدانا وێ ژنێ دكر وهاریكاربوو دگەل.
دیسان نائێتە ژبیركرن كو گەلەك باب چاكێن ئێزدیان حەكیمێ كریە لسەر دەمێ خۆ مینا حەكیم فێرس كو ب حەكیمێ لوقمان ناڤدارە وگەلەك شێخ وپیرێن ئێزدیان وەكی شێخێن شێخمەند وپیرێن جەروا هاریكاریا خەلكێ دكن تا ئیرۆ رۆژ ژ ژەهرا مارا و دووپشكا،هەردیسان ممێ شڤان وگاڤانێ رەزا و گەلەكێن دن خزمەتا حەكیمیێ گەهاندیە،هەر دیسان گەرمكرن وسۆتن كەوی دهاتە بكارئینان ژبۆ ئێشا وەكی ئێشا ددانا و دەست ولنگا دێ هاتبانە بستكەكا ئاسنی گەرمكربانە ونێزیكی وی جیی كربانە ئەوێ ئێش تێدا وگەلەك جاران ئەو بستكا گەرم دجیێ ئێشێ راكربا وسۆتبا،هەر دیسان بۆ ڤێ چەندێ فتیلێن ئاگری دهاتنە بكارئینان لسەر جیێن كولبووی داتنان،گرێدان تایبەت گرێدانا سەری و جیێن دن وەكی پشتێ و دەست ولنگا ژبۆ نەمانا ئێشێ،دیسان سمتنا گوهێن زارۆكا تایبەت كچكا وتفنێن وان بۆ جوانیێ و هەلگرتنا قەرلەفنكا وگوهارا ئەڤە ژلایێ ژنان ڤە دهاتە بكارئینان هەلبەت ل چەژنا خدر ئلیاس ئەڤ كارە دهاتنەكرن وەكی كارەكی پیرۆز دهاتە هژمارتن دناڤ مە ئێزدیان دا ،گەلەك جۆرێن فێقی ودارا وكەسكاتیێ هەبوون دهاتنە بكاردئینان ژبۆ چارەسەریێ وەكی پیڤازێ و سیرێ ل دەمێ هاتبە سۆركرن لسەر ئاگری وپاشی لسەر كولكا داتنان دادەربن و پەلگێن دارا مینا دارا كەنەكیجێ بۆ ئێش و كولبوونا چاڤان ل دەمێ ئێشا وان دێ پەلگێن وان كەلاندبان وهندەك جاران ب خاڤی و دگەل شیری دانابانە سەر چاڤێ كول ولاو گرێدابا بۆ ماوێ چەند رۆژا دا ساخبا و ژ ئێش ونالینا رزگاربا.
خووندەڤانێن زێدە عەزیز هەر كار وكریارەكا دخزمەتا مرۆڤاتیێ دا هاتیە كرن لسەر دەمێ باب وكالا دڤێت بێتە ل قەلەم دان وئەرشیف كرن،داكو دپاشەرۆژێ دا مفا ژ وان كاران بێتە كرن ژبۆ خزمەتا گەل و وەلاتی.
تُتاح هذه الصورة أيضا في: کوردی