شنگال.. دەرگەهێ خانەسۆرێ بۆ كوردێن ئێزدی دهێتە ڤەكرن
باسنيوز:
فەرماندێ هێزا ئێزدیخانێ ل قەزا شنگالێ راگەهاند، نها ب شێوەیەكێ فەرمی دەرگەهێ خانەسۆرێ بۆ كوردێن ئێزدی ل شنگالێ هاتیە ڤەكرن و ئەو ئێزدیێن ئاوارەی سۆریا بووین، نها دشێن د وی دەرگەهی را ب ڤەگەرنەڤە.
قاسم شەشۆ، فەرماندێ هێزا ئێزدیخانێ ل قەزا شنگالێ، تایبەت بۆ (باسنیۆز) دیار كر، دەرگەهێ خانەسۆرێ دناڤبەرا شنگال و رۆژئاڤایێ كوردستانێ دا ب شێوەیەكێ فەرمی هاتیە ڤەكرن و نها خەلك ب شێوەیەكێ ئاسایی هاتن و چوونێ تێدا دكەت، ب تنێ بازرگانی نها د وێ رێیێ دا ناهێتە كرن و ب تنێ بۆ هاتن و چوونێ یە و ئەو ئێزدیێن ئاوارەی سۆریا بووین نها دشێن د وی دەرگەهی را ب ڤەگەرنەڤە.
شەشۆ ئاماژە ب وێ یەكێ كر، نها ئەو ئاوارەیێن ئێزدی یێن خەلكێ شنگالێ كو بەری نها بەرەڤ سۆریا پەنابەر ببوون و ل كەمپا نەورۆز دا ل رۆژئاڤایێ كوردستانێ ئاكنجی بووین دشێن ب ڤەگەرنە ڤە و رەوش ل وی دەرگەهی ئاسایی بوویەڤە.
ل سالا 2014 دەمێ كارەساتا شنگالێ پەیدابووی، نێزیكی هزار كوردێن ئێزدی بەرەڤ وەلاتێ سۆریا برێكەفتن و ل وێرێ د كەمپەكێ دا ب ناڤێ (مخیم نوروز) ئاكنجی بووینە و رەوشا وان یا ژیارێ گەلەك یا بێسەرۆبەرە.
خدر خودێدا، رێڤەبەرێ كەمپا نەورۆز یا پەنابەرێن ئێزدی ل وەلاتێ سۆریا بەری نها بۆ (باسنیۆز) راگەهاند بوو، نها نێزیكی 1100 كوردێن ئێزدی ل كەمپا نەوروز ل وەلاتێ سۆریا ل باژێركێ مالكیە/ دێرك ل باشوورێ رۆژهەلاتێ سۆریا ماینە و گۆت: ژبلی كەمپا مە، هژمارەكا زۆر یا كوردێن ئێزدی بەری نها ل سۆریا وەكو پەنابەر دژین كو هژمارا وان نێزیكی 12 هزار كەسان بوون كو 200 خێزان بوون، بەلێ نها هژمارا وان ب تنێ نێزیكی 1100 كوردێن ئێزدی ماینە و یێن دی هەموو بەرەڤ عیراقێ و هەرێما كوردستانێ ڤەگەریاینە و گەلەك ژی بەرەڤ وەلاتێن ئورۆپا مشەخت بوون.
تُتاح هذه الصورة أيضا في: کوردی