حەشدا شەعبی زەرەرەكا مەزن گەهاندیە خەلكێ شنگالێ
تۆرا لالش یا راگەهاندنێ
وەلاتیێن قەزا شنگالێ ددەن دیاركرن كو داخستنا رێیا شنگال بۆ دهۆكێ ژلایێ حەشدا شەعبی و سوپایێ عێراقێ ڤە،مەزنترین زەرەر گەهاندیە خەلكێ و ئاریشا نەبوونا ئاڤا ڤەخوارنێ و چەند خزمەتكاریێن دیتر یێن ژیانا رۆژانە ل دەڤەرێ هەیە.
دڤی واری دا وەلاتی(شاكر نایف)دیاركر،ئەم وەكو خەلكێ شنگال پێتڤی هندێ نە ژێرخانا ژیانەكا نوو بۆ مە بێتە دانانن،ژبەركو مە تشتەك نەمایە و ئەم چاڤەرێ وێ چەندێ بووین خزمەت بۆ شنگال بێنە دابینكرن و ژیان لێ باشتربت بەلێ دیارە ژ خراب بۆ خرابتر دچت،ئەو ژی كەرتێ ساخلەمیێ باشترین نموونەیە وێ چەندێ ب چەسپینت كو حەشدا شەعبی و سوپایێ عێراقێ نكاریە چ بۆ شنگالێ بكن،چنكو چ دەستەیێن نۆژداران ل شنگال نینن و ئەو خەلكێ ل وێدەرێ گەلەك جارا ناچار دبن ب دەهان كیلۆمەتران ببرن بۆ پەیداكرنا دەرمانان بۆ چارەسەریێ.
ژلایەكی دی ڤە وەلاتی(شەمۆ عەلی)گۆت:داخستنا رێیا شنگال ب هەرێما كوردستانێ ڤە گرێددەت مەزنترین زەرەر گەهاندیە خەلكێ مە و ئەگەر ئەڤ ئاریشە هاتبا چارسەركرن دا خزمەتەكا مەزن بۆ خەلكێ هاتبا كرن،بەلێ ژلایێ حەشدا شەعبی و سوپایێ عێراقێ ڤە رێ ب وێ چەندێ نائێتە كو رێیا شنگال _ دهۆك بێتە ڤەكرن.
هەر دڤی دەربارەی دا وەلاتی(زیدان خەلەف)دبێژت:حەشدا شەعبی و سوپایێ عێراقێ نكاریە چ تشتان بۆ شنگالێ بكن و خەلك زەرەرێ ژ هەبوونا وان ل دەڤەرێ دبینن ژبەر گرتنا رێ ل هەمبەر وان دا،دیسان سادەترین نموونە نەبوونا ئاڤا ڤەخوارنێ و گەلەك پێتڤیێن دی یێن ژیانا رۆژانە،ئەگەر بڤی رەنگی بت شنگال نائێتە ئاڤەدانكرن.
تُتاح هذه الصورة أيضا في: کوردی