قاسم شەشۆ: هێزێن حەشدا شەعبی ل شنگال بەرەف كێمبوونێ نە
باسنيوز:
فەرماندێ فەرماندەیا هێزێن پێشمەرگێ كوردستانێ ل شنگال راگەهاند، هێزێن حەشدا شەعبی ل شنگال بەرەڤ كێمبوونێ نە و دەنگۆیەك هەیە كو ئەمریكا فشار ل حەشدا شەعبی كریە شنگالێ چۆل بكەن.
قاسم شەشۆ، فەرماندێ فەرماندەیا هێزێن پێشمەرگێ كوردستانێ ل شنگال، تایبەت بۆ (باسنیوز) دیار كر، ئەڤە ماوێ دوو رۆژانە فرۆكەیێن سوپایێ عیراقێ هاتن و چوونێ بۆ شنگالێ دكەن و دەنگۆیەك ژی بەلاڤ بوویە كو هێزێن ئەمریكی ل شنگالێ چەند رۆژەك دەستنیشان كرینە بۆ هندێ حەشدا شەعبی ب تمامی شنگالێ چۆل بكەت و ئەڤە ژی هاتیە پێشچاڤ كو هێزێن وان وەكو دیار ل شنگالێ بەرەڤ كێمبوونێ نە.
ل گۆرەی زانیاریێن (باسنیوز)، كوردێن ئێزدی ل هەموو وەلاتێن جیهانێ كو ل هەر وەلاتەكی گرۆپەك هاتیە پێكئینان و هەر گرۆپەكی ل وەلاتێ ئەو لێ دژین داخواز ژ حۆكمەتا وی وەلاتی كریە كو د هەوارا ئێزدیان بچن و شنگالێ ژ دەستێن حەشدا شەعبی رزگاربكەن و ئەڤە ژی بوویە ئەگەر كو هەموو وەلات پێكرا ل گەل ئەمریكا رێك بكەڤن فشارێ ل سەر حەشدا شەعبی بكەن شنگالێ چۆل بكەن.
قاسم شەشۆ دیار كر كو كوردێن ئێزدی هەموو دەمان ل گەل هندێ نە پێشمەرگە ب ڤەگەریتە دەڤەرێ و ب تنێ وان باوەری ب هێزێن پێشمەرگەی هەیە بۆ پاراستنا كوردێن ئێزدی ل شنگالێ و باوەری ب چو هێزێن دی نینە.
تُتاح هذه الصورة أيضا في: کوردی