ئارمانجا ئەرەبان دەڤەرێن ئێزدیان تەعریب بكن
لەیت حسێن
ل چۆنا مێژوویێ را و هەر ژ سەردەمێن بەرێ دا و هەتا نهۆ هەردەم ئەرەب ب هەموو هۆز و ئەسلێن خۆڤە ل دژی ئێزدیانن و هەردەم ژی ئەو ئەگەرێن كۆمكوژیا ئێزدیانە و تم و تم كاردكن و پلانا ددانن ،داكو ئێزدیاتیێ و ئێزدیان ب یەكجاری نەهێلن كو بەلگە ژی لسەر ڤێ دژایەتیێ و نە مرۆڤایەتیا وان ل هەمبەر ئێزدیان ئەو هەر سێ كۆمكوژی و كارەساتێن داویێ نە یێن كو ل دژی ڤی مللەتی ل دەڤەرا شنگال و دەڤەرێن بسەرڤە هاتینە ئەنجام دان.
بەریا یازدە سالان ل(14/8/2007)ێ ل وی دەمی چار تمبێلێن بارهەلگر و تژی(TNT)كری گەهشتن ناوچەداریا گرعزێر و كۆمەلگەها سیبا شێخ خدرێ و گوندێ گرعزێر كو دئەنجامێ وێ كارەساتێ دا زێدەتر ژ(300) كەسان هاتنە كوشتن و زێدەتر ژ(700) كەسێن دی یێن بێ گونەه برینداربوون و ژمارەكا زێدە ژ خەلكێ وان دەڤەران هەتا نهۆ ژی دبێ سەروشوونن،دیسان ژی ل وێ كۆمكوژیا مەزنا ل شنگالێ ئەوا ل(3/8/2014)ێ بسەرێ ئێزدیان دا هاتی كو ب هەموو جۆرەكی جینۆساید و مەرگەسات لدژی ئێزدیان هاتن ئەنجام دان پتر ژ(350) هەزار كەسی ئاوارە و پەنابەری باشوورێ كوردستانێ و وەلاتێن بیانی بوون هەروەسا زێدەتر ژ(6300) كەسان ژ كچ و ژن و زارۆك و پیر وكالێن بێ گونەهـ و رەزیل ژبال داعشێ ڤە هاتن گرتن و ب هەموو شێوەیەكی كارێن دوور ژ مرۆڤایەتیێ و دەستدرێژیا سێكسی ل دژی وان ئەنجام دان و زارۆكێن ساڤا ژ بەر سینگێ دەیكا دبرن و دكوشتن،ژبلی وێ یەكێ كو هەتا نهۆ چارەنڤیسێ ژمارەكا هەرا مەزن ژ وان گرتیان دیارنینە و زێدەهیا خەلكێ شنگال ژی هەتا نهۆ ئاوارەنە و ل كەمپێن سنوورێ پارێزگەها دهۆكێ ئاكنجینە،هەر ژ ئەنجامێن وێ كۆمكوژیێ قركرن و كۆمكوژیەكا مەزن ل(15)ی هەیڤا هەمان سال ل گوندێ كۆچۆ یێ نێزیكی دەڤەرا شنگالێ هاتە ئەنجام دان كو ل وی گوندی دا ژمارەكا گۆریَِن بكۆم یێن تژی هەستیكێن قوربانیێن وێ كۆمكوژیێ هەنە ل دەما داعش بسەر وی گوندی دا گرتی پتریا خەلكێ وی گوندی گولەبارانكرن و كچ و ژن گرتن.
ئەڤ هەرسێ كارەسات و كۆمكوژیێن مە لسەرێ دیاركرین و ئەو مەرگەساتێن هەرا بزەحمەت و تیرۆری ئەوێن ل دژی ئێزدیان هاتینە ئەنجام دان،هەموو ژی ب ئەگەرا دژایەتیا هەردەما ئەرەبان بوویە و وێ خیانەتا مەزنا وان ل هەمبەر ئێزدیان كری كو ب هەر شێوەیەكی كارێن تیرۆری ل دژی ئێزدیان دكت و ئارمانجا وان یا هەرا مەزنتر ئەوە ئێزدیان نەهێلن و نەمینن و تەعریبكرنێ لسەر دەڤەرێن وان بكن.
تُتاح هذه الصورة أيضا في: کوردی