رێڤەبەرێ ناحیا قەیرەوان:عەرەبێن ڤەگەریاینە شنگال نەهاتینە سزادان
تۆرا لالش یا راگەهاندنێ
رێڤەبەرێ ناحیا قەیرەوان ل شنگال ئاشكەراكر،عەرەبێن دۆرماندۆرێن شنگال ب هەموو شیانێن خۆ پشتەڤانیا رێكخراوا تیرۆرستیا داعشێ كرن و هێرشی سەر شنگالێ كرن،ب پشتەڤانیا حكومەتا عێراقێ ئەو عەرەب جارەكا دی ڤەگەریاینە دەڤەرێ و نەهاتینە سزادان.
لدۆر ڤەگەریانا عەرەبێن ناحیا قەیرەوان و دۆرماندۆرا،رێڤەبەرێ ناحیا قەیرەوان(عبدولحەمید قاسم)بۆ رۆژناما دەنگێ لالش دیاركر،حكومەتا عێراقێ عەرەبێن هاریكاریا داعشێ كرین سزانەداینە و نهۆ بێ ترس تێنە سەر جیێ خۆ یێ بەری(2014)ێ،ئەڤ پێنگاڤا حكومەتا عێراقێ هاڤێتی نە ل جیێ خۆ دایە و پێنگاڤەكا مەترسیدارە بۆ خەلكێ شنگالێ،رۆژانە عەرەبێن خەلكێ شنگال كوشتین و گرتین ڤەدگەرنە دەڤەرێ و دەوروبەران،ڤان عەرەبا ل رۆژا(3/8/2014)ێ ب هەموو شیانێن خۆ پشتەڤانیا رێكخراوا تیرۆرستیا داعشێ كرن و هێرشی سەر شنگالێ كرن و گۆت:(( داخوازێ ژ حكومەتا عێراقێ و حكومەتا خوەجه یا پارێزگەها نەینەوا دكەین لسەر ڤی بابەتی خۆ بێ دەنگ نەكن،ژبەركو د پاشەرۆژێ دا دێ بتە مەترسی ل دەڤەرێ و خەلكێ شنگال مینا جاران نكارن جیرانیا وان عەرەبا بكن)).
هەروەسا كارگێرێ لقا(17)یا پارتی دیموكراتی كوردستان ل شنگال (سەعید جردۆ) بۆ رۆژناما دەنگێ لالش راگەهاند،هەر ژ رۆژا (3/8/2014)ێ و هەتا نهۆ حكومەتا عێراقێ پیلان لدوڤ پیلانێ سەر شنگالێ هەیە و و هێزێن نە شەرعی ل شنگال ناخوازن رەوشا دەڤەرێ ئاسایی ببت،هاتنا عەرەبێن ناحیا قەیرەوان و گوند و كۆمەلگەهێن بسەر ڤە جیێ ترسەكا مەزنە ل نك خەلكێ شنگال و ب تایبەت ئێزدیان،چنكو وان عەرەبا زەرەركا مەزن گەهاندە خەلكێ و راستی كۆمكوژیێ بوون،لەوما دڤیا با حكومەتا عێراقێ بەری ڤەگەرا وان خووندنەك لسەر كربا و لدوڤ یاسایێ ئەوێن هاریكاریا داعش كرین گەهشت بان سزایێ خۆ پاشی ئەو عەرەب ڤەگەریا بان،لێ بەروڤا ژی ڤێ یەكێ عێراق عەرەبا هان ددەت بۆ ڤەگەرێ و خەلكێ شنگال ژی بڤێ پێنگاڤا حكومەتا عێراقێ نەرەحەتە و دبێژن تا رەوشا بڤی ئاوایی ببت نازڤرینە سەر جیێن خۆ ڤە،چنكو عێراق چ پووتێ ب شنگال نادەت و هەردەم دژایەتیا خەلكێ وێ دكت و شنگال بخۆ كرینە گۆرەپانەكا سیاسی.
تُتاح هذه الصورة أيضا في: کوردی