رەوشا رزگاربوویان ل كەمپان خرابتر لێهاتیە
تۆرا لالش:
بتریا كچ و ژنێن رزگاربوویێن ئێزدی ژ دەستێ داعش یێن ل ناڤ كەمپان و ژ دەرڤەی كەمپان دژین تووشی نەخۆشیین لەشی و دەروونی بووینە و رۆژ بۆ رۆژێ رەوشا خرابتر لێ دئێت،چالاكڤانەكا كچ ژی دبێژت: چارەسەریا دەروونی بۆ بتریا رزگاربوویان نەهاتیە كرن.
ئێك ژ رزگاربوویێن ژ دەستێ داعش(ئیمان عبداللە) بۆ رۆژناما دەنگێ لالش دیاركر،ئەڤە بوونە هەفت سال لسەر جینۆسایدا ئێزدیان لسەر دەستێ رێكخراوا تیرۆرستیا داعشێ وسەرەرای ئەو زوولم و زۆرداریا ل وان هاتیە كرن هەتا نهۆ نەخۆشی و ئێش و ئازارێن كچ و ژنێن رزگاربووی دبەردەوامن و درەوشەكا سەخت و ب زەحمەت دا دژین ب تایبەت ل ناڤ كەمپان دا،گۆتژی ژئەگەرێ نە گرنگی و پووتەدانێ ژئالیێ لایەنێن پەیوەندیدار ڤە بتریا رزگاربوویان تووشی گەلەك نەخۆشیان ببن ب تایبەت نەخۆشیێن دەروونی رۆژ ب رۆژ رەۆشا وان خرابتر دبت.
هەر لدۆر رەوشا كچ و ژنێن رزگاربووی ل كەمپان(حەلیمە حسێن) رزگاربوویەكا ژ دەستێ داعشێ بۆ رۆژناما دەنگێ لالش دبێژت:دەمێ ئەڤ كچ و ژنێن ئێزدی ژلایێ تیرۆرستێن داعشێ ڤە هاتینە گرتن گەلەك زۆرداری ل وان هاتیە كرن و تووشی نەخۆشیین لەشی و دەروونی بووینە،ل هەمبەر ڤان نەخۆشیێن بسەر دا هاتین پشتی هاتینە رزگاركرن ل كەمپان وەكو پێتڤی هاریكاریا وان نەهاتیە كرن،داخوازێ ژحكوومەتا عێراقێ و كوردستانێ وجڤاكێ نێڤ دەولەتی دكەین گرتیێن ئێزدی یێن هەتا نهۆ د دەستێ داعشێ دا ماین بێنە رزگاركرن.
ژبال خۆڤە چالاكڤانا كچ(بسمە ئالدەخی)بۆ رۆژناما دەنگێ لالش خویاكر، جیێ داخێ یە هەتا نهۆ بتریا كچ و ژنێن رزگاربووی ب شێوەیەكی باش و بەرچاڤ نەهاتینە چارەسەركرن،ب مخابنی ڤە هەتا ئیرۆ رۆژ رەوشا وان گەلەك سەخت و دژوارە وئاریشێن وان دبەردەوامن،لەوا داكو ژڤێ رەوشا خراپ دەركەڤن و ژیانا خۆ ب شێوەكی ئارام وسروشتی دەرباز بكن و زوولم وزۆریا ل وان هاتیە كرن ژبیر ڤە بكن،پێتڤیە ئەو ل جیەكێ ئارام ل دەرڤەی كەمپان بژین ل سەنتەرێن ئامادەكری و دەروونی و بن چاڤدێریا ساخلەمیێ ڤە.
ل رۆژا (3/8/2014)ێ رێكخراوا تیرۆرستیا داعشێ هێرشێ قەزا شنگال كر و ب هەزاران كچ و ژنێن ئێزدی كەفتنە دناڤ دەستێ تیرۆرستان دا و هاتنە گرتن،پشتی هندەك كچ و ژن هاتینە رزگاكرن ل ناڤ كەمپان دا هاتینە ئاكنجیكرن و درەوشەكا سەخت دا دژین.
تُتاح هذه الصورة أيضا في: کوردی