ئێزدی زارۆكێن داعش وەرناگرن
تۆرا لالش:
پشتی بەریا چەند ڕۆژان ڕێكخراوەكێ پەیوەندی دگەڵ هندەك خێزانێن ڕزگاربوویێن ئێزدی ژ دەستێ داعش دروستكری ب بەهانەیا چارەسەریا تەندروستی و دەروونی،لێ ب مخابنی ڤە هاتینە بسەردا بڕن و خاپاندن،ژلایێ جڤاكی و ئاینی ڤە هاتە نهۆ چ بڕیار نەهاتینە دەركرن زارۆكێن داعش دناڤ جڤاكا ئێزدی دا بێنە وەرگرتن.
چالاكڤانێ ئێزدی(ناسر جندی) بۆ رۆژناما دەنگێ لالش دیاركر،چ مرۆڤایەتی لڤی بابەتی دا نینە بەلكو بابەتەكێ سیاسی یە،ئەگەر مەرەما وان ڕێكخراوان مرۆڤایەتیە گەلەك ڕێیێن دی هەنە هاریكاریا وان زارۆكان بێتە كرن و پەروەردەكرن و بگەهنە مافێ خۆ،لێ ب مخابنی ڤە ئەڤ چەندە گەلەكێ دوورە ژ مرۆڤایەتیێ،ئەڤ چەندە ل جڤاكێ ئێزدێ دا نائێتە قەبوولكرن و هاتنا ڤان زارۆكان بۆ ناڤ ئێزدیا دێ ئاریشێن جڤاكێ پەیداكت ل پاشەڕۆژێ دا،لەوا پێتڤیە لسەر وان ڕێكخراوان ڕێزێ ل بڕیارا جڤاكا ئێزدیان بگرن.
رێڤەبەرێ كەمپا ئێسیان(عامر عەبو) بۆ دەنگێ لالش راگەهاند،بابەتێ زارۆكێن داعش دزڤرت بۆ ئەنجامێ وێ فەرمانا بسەرێ ئێزدیان دا هاتی ل(3/8/2014)ێ كو ب هەزاران كچ و ژن هاتنە گرتن و زووڵم و زۆرداری ل وان هاتە كرن و بێ حەزا وان زارۆك ژوان را پەیدابوون،لەوا ئیرۆ رۆژ ئاریشێن هۆسا ل پشت خۆ پەیداكرن،ژلایێ جڤاكی و ئاینی ڤە هاتە نهۆ چ بڕیار نەهاتینە دەركەتن كو ئەو زارۆك بێنە دناڤ جڤاكا ئێزدی دا،تەكەزكر ژی چ رێكخراو نینن ب شێوەیەكی فەرمی ڤی كاری ل ناڤ كەمپان دا بكن، چنكو ئەڤ كارە نەیاسایی یە و نائێتە قەبوولكرن.
ژلایەكێ دی ڤە(خێری عەلی) رێڤەبەرێ ڕێكخراوا ئێزدی یا دكیۆمێنتكرنێ ل شنگال بۆ رۆژناما دەنگێ لالش گۆت:هندەك ڕێكخراوە لبن ناڤێ مرۆڤایەتیێ كار دكن و خەلكێ مە بسەردا دبەن هەتا بەریا چەند ڕۆژان ڕێكخراوەكێ پەیوەندی دگەڵ هندەك خێزانێن ڕزگاربوویێن دەستێ داعش دروستكر ب بەهانەیا چارەسەریا تەندروستی و دەروونی بۆ بكن،لێ ب مخابنی ڤە ئەو هاتبوونە بسەردا بڕن و خاپاندن، هەروەسا ڤێ چەندێ ژی كارتێكرنەكا مەزن لسەر دەروونێ وان رزگاربوویان كریە و بوویە ئەگەرێ سەرەكی كو پەیوەندی دگەڵ وان زارۆكان بێتە دورستكرن،دووپاتكر ئەڤ چەندە ژی بوویە جیێ نەخۆشی ودلگرانیا خەلكێ مە ب تایبەتی مالباتێن ڕزگاربوویان.
ژبال خۆ ڤە قایمقامێ قەزا شنگال(مەحما خەلیل) بۆ رۆژناما دەنگێ لالش خویاكر،ئەڤ رێكخراو كارەكێ نە یاسایی و نە شەرعی دكن وخەلكێ مە بكاردئینن ژبۆ بەرژەوەندیێن خۆ یێن تایبەت وئەڤ چەندە نائێتە قەبوولكرن ل جڤاكا ئێزدیان دا،هەروەسا یاسا و رەوشت و تیتالێن مللەتێ ئێزدی ڤێ چەندێ قەبوول ناكن و یاسا عێراقی ژی ئاماژە بڤێ چەندێ كریە ل دەستووری دا دیاركریە كو هەر كەسێ ناسناما عێراقی وەربگرت دڤێت ژدەیك وباب عێراقی بت و ئەڤ چەندە لسەر وان زارۆكا نائێتە بجهئینان، گۆتژی ڕزگاربوویێن ژ دەستێ داعش جیێ ڕێزێ نە و پێتڤیە لسەر وان ڕێكخراوا چارەسەری وهاریكاریا وان بكن،دا ژ ڤێ ڕەوشا دژوار دەركەڤن و بگەهنە مافێن خۆ.
تُتاح هذه الصورة أيضا في: کوردی