پارێزگارێ دھۆکێ: ئيرۆ رێنمایێن نوو یێن خوەپارێزیێ دێ ل دھۆکێ کەڤنە د بوارێ بجھئینانێ دا
دھۆک-KDP.info-
ژوورا بەرھەنگاربوونا ڤایرۆسێ کۆرۆنایێ ل پارێزگەھا دھۆکێ ئەڤرۆ رۆژا ٣١/٣/٢٠٢١ کۆمبوونەکا دی ئەنجام دا بۆ جێبەجێکرنا خالێن بەیانناما ژمارە ١٢ یا کو دوھی رۆژا ٣٠/٣/٢٠٢٠ ژ لایێ ژوورا ئۆپەراسیۆنا بلندا بەرھەنگاربوونا ڤایرۆسێ کورۆنایێ ل ھەرێما کوردستانێ ھاتیە دەرکرن.
د.عەلی تەتەر، پارێزگارێ دھۆکێ د پرێس کۆنفرانسەکی دا ئاشکرا کر کو ئەو رێنمایێن د بەیانناما ١٢ یا ژوورا ئۆپەراسیۆنا بلندا بەرھەنگاربوونا ڤایرۆسێ کورۆنایێ ل ھەرێما کوردستانێ دا ھاتینە دەرکرن دێ ئەڤرۆ رۆژا ٣١/٣/٢٠٢١ دێ ل پارێزگەھا دھۆکێ کەڤنە د بوارێ بجھئینانێ دا و ھەمی جھێن گشتی و خوارنگەە و کافێ و پێشانگەە دێ ژ دەمژمێر ٩:٠٠ شەڤ ھەتا رووژا دووڤ دا ٦:٠٠ سپێدێ د دائێخستی بن، ژ بلی نەخۆشخانە و دەرمانخانە و کلینیکێن نۆشداری، ھەروەسا ژ ئەڤرۆ وێڤە دێ ھۆلێن شەھیانان و یێن وەرزشی ژی ھێنە داخستن و کێشانا نارگیلێ ب ھەموو شێوەیان ھاتە قەدەغەکرن ل جھێن گرتی و ڤەکری و گۆت: “ئەو بڕیار و رێنمایێن ژ لایێ حکومەتا ھەرێما کوردستانێ ڤە دھێنە دەرکرن ژ پێخەمەت پاراستنا گیانێ وەلاتیانە ژ ڤایرۆسێ کۆرۆنایێ، راستە رۆژا پێنجشەمبی ل ھەمی دامودەزگەھێن میری بوویە بھێنڤەدان و رۆژێن ئەیینی و شەمبی ژی دەوام نینن، بەلێ رامانا وێ ئەو نینە خەلکێ مە د ڤان رۆژان دا بچیتە سەیرانان، بەلکو دڤێت خەلکێ مە پتر یێ پێگیر بیت ب رێنمایێن ساخلەمیێ و خوە ب پارێزن”.
ناڤھاتی گۆت: “داخوازێ ژ رێکخراوێن جڤاکێ مەدەنی و لاوان و حزبێن سیاسی و قوتابی و مامۆستا و چالاکڤانێن سۆشیال میدیایێ دکەین پتر ب رۆلێ خوە راببن بۆ ھشیارکرنا خەلکی بۆ وێ چەندێ پێگیریەکا زێدەتر ب رێنمایێن ساخلەمیێ بکەن و خوە ب پارێزن”.
تُتاح هذه الصورة أيضا في: کوردی