نێچیرڤان بارزانى: سەرۆکاتیا هەرێمێ سیهوانا کۆمکرنا هەمیانە
گاڤ نیوز
سەرۆک نێچیرڤان بارزانى د کۆمبوونا ئەڤرۆیا سەرۆکاتییا هەرێما کوردستانێ دگەل ئالیێن سیاسیێن هەرێمێ دا دوپات کر، گەرەنتییا دەربازکرنا کێشە و قەیرانان ئێکرێزى و تەڤایی یە و سەرۆکاتییا هەرێمێ د ڤى وارى دا دێ ب رۆلێ خۆ رابیت.
ئەڤرۆ سەرۆکێ هەرێما کوردستانێ نێچیرڤان بارزانى، د کۆمبوونەکێ دا دگەل ئالیێن سیاسیێن هەرێما کوردستانێ ب ئامادەبوونا هەردو جێگرێن سەرۆکێ هەرێمێ، باس ل هەژمارەکا پرس و بادەکێن ناڤخۆ و دەرەکى کر، ژ وان ژى رەوشا دەڤەرێ، رۆلێ هەرێمێ د هەڤکێشەیێن سیاسیێن نوى دا، سەرەدانا سەرۆکێ هەرێمێ بۆ فرەنسا، پەیوەندیێن هەولێر و بەغدایێ، دیالۆگا ستراتیژییا ناڤبەرا ئیراق و ئەمریکا، هەلبژارتنێن ئیراقێ و پەیوەندیێن نێڤبەرا ئالیێن سیاسیێن هەرێمێ.
هەروەسا د کۆمبوونێ دا سەربارى گرنگییا ڤێ گاڤێ و کۆمکرنا ئالیێن سیاسى، دلگرانیێن ئالییان ژى هاتنە باسکرن و رژدى ل ئێکرێزییا ئالیێن هەرێمێ هاتە کرن. هەروەسا پەسەندکرنا یاسایا بودجەیا ئیراقێ و پێشڤەچوونا پەیوەندیێن نێڤبەرا هەرێمێ و ئیراقێ ب گاڤەکا ئەرێنى هاتە هژمارتن و هیڤییا بجهئینانا وێ هاتە خواستن کو رەنگەڤادانەکا ئەرێنى ل سەر خۆشکرنا ژیانا وەلاتییان هەبیت.
هەروەسا د کۆمبوونێ دا باس ل گرنگییا ئەنجامدانا چاکسازییان و ئازادیا رادەربڕینێ ل هەرێما کوردستانێ هاتە کرن.
سەرۆک نێچیرڤان بارزانى د کۆمبوونێ دا دوپاتکر، دەربازکرنا کێشە و قەیرانان و پاراستنا ماف و دەستکەفتان و پێگەهێ دەستورى و فیدرالیێ هەرێمێ پێدڤى ب ئێکرێزى و تەڤایێ هەیە، بۆ ڤێ ئێکێ ژى سەرۆکاتییا هەرێما کوردستانێ دێ وەکو سیهوانا کۆمکرنا هەموو ئالییان بیت.
تُتاح هذه الصورة أيضا في: کوردی