نێچیرڤان بارزانی و كازمی بهحسا پێنگاڤێن ئاساییكرنا رهوشا شنگالێ كر
گاڤ نیوز
سهرۆكێ ههرێما كوردستانێ و سهرۆكوهزیرێ ئیراقێ، داخواز كر پهسهندكرنا بودجهى ببیته دهستپێكا چارهكرنا ههمی كێشهیان.
نێچیرڤان بارزانی سهرۆكێ ههرێما كوردستانێ ل بهغدا ژ ئالیێ مستهفا كازمی سهرۆكوهزیرێ ئیراقێ ڤه هاته پێشوازی كرن، ل گۆرهی راگههاندنهكا سهرۆكاتیا ههرێمێ، ههردو ئالیان ههماههنگیا دناڤبهرا سازیێن حكومهتا ئیراقێ و حكومهتا ههرێما كوردستانێ د چارچووڤێ دهستووری دا، ههروهسا پێنگاڤێن بهرهنگاربوونا تیرۆرێ و هاریكاریا ههردو ئالیان بۆ ئاساییكرنا رهوشا شنگالێ گۆتوبیژ كر.
سهرۆكێ ههرێما كوردستانێ و سهرۆكوهزیرێ ئیراقێ، بهحسا میكانیزما كارا بۆ هاریكاری و ههماههنگییا دناڤبهرا هێزێن پێشمهرگهى و سوپایێ ئیراقێ دا كر، د ئاخفتنێن خۆ دا ئاماژه ب رێككهفتنا پرسا دادگهها فیدرال و دهربازكرنا بودجهی هاته دان و داخواز كر برگهیێن بودجهى ب هووری بهێنه بجهئینان ل سهر بنهمایێ دادپهروهریێ ل دابهشكرنا سامانان.
ل دویف وێ راگههاندنێ، كازمی دوپاتی ل موكمكرنا هاریكاریا ئێمناهیێ دناڤبهرا ههولێر و بهغدیێ دا ب شێوهیهكی كو سهقامگێریا ناڤخۆ دابین بكهت و رێ ب چ ڤالاهیێن ئێمناهیێ نههێته دان و گۆت: ههر جارهكا نێچیرڤان بارزانی سهرهدانا بهغدا دكهت، كۆمهكا پهیامێن دروست بۆ گشت گهلێ ئیراقێ دهنێریت و دبیته ئهگهرێ دانانا بنیاتێ باوهری و نیشاندانا نیازپاكیێ.
تُتاح هذه الصورة أيضا في: کوردی