هەلبژارتنێن پێشوەخت ل عێراقێ
جانۆ جەگەر
مە هەموویان ب ئاشكەرایی دیت سپێدەهیا رۆژا(25ی ئەكتۆبەرا سالا 2019)ێ ب هەزاران ژن و زەلام و كچ و لاو و مامۆستا و رەوشەنبیر و هۆنەرمەند…هتد،ل بەغدایا پایتەختێ عێراقێ ل گۆرەپانا تەحریر دەست ب خۆپێشاندانێ كرن ل ژێر دروشمێ (من وەلاتێ خۆ دڤێت) و (من مافێن خۆ دڤێن) و داخوازكرن ژ حكوومەتا عێراقێ دەست ژ كاربكێشن و گەندەل و دزیكەر بێنە دادگەهـ و زیندانكرن.
چەند رۆژ دەرباز بوون خۆپێشاندەران ژ گۆرەپانا تەحریر نەڤەكێشان بەلكو ژمارا وان زێدەتر لێ دهات و تاكو بەرەف مانگرتنێ چۆن،و پاشان باژێرێن ناڤەراست و باشوورێ عێراقێ پشتگریا خۆ بۆ داخوازی و دروشمێن خۆپیشاندانێن بەغدا راگەهاندن و ب هەزاران خەلك هاتنە گۆرەپانێن باژێر و خیڤەتێن خۆ ڤەدان و مانگ گرتن و ل چەندین باژێرێن دی یێن عێراقێ خۆپێشاندەران بسەر بارەگەهێن پارتێن سیاسی دا گرتن و سۆتن،د هەمان دەم دا كونسلخانەیا ئیرانێ ل باژێرێ بەغدا سۆتن،پشتی ڤان بوویەران زەنگا مەترسیێ لجەم حكوومەتێ لێدا رابوو ب ئەنجامدانا هندەك چاكسازیان داكو جادێ رازی بكت،لێ خەلك هەر بەردەوام بوو لسەر مانگگرتنێ و رازی نەبوون بچنە ناڤ مالێن خۆ ، رەوشا عێراقێ د ماوێ دوو هەفتیان دا بڤی شێوەی دەربازبوو تاكو حكوومەتێ پێنگاڤا دووێ هاڤێت ئەو ژی رووبرووی خۆپیشاندەران بوو بتر ژ (600)كەسی ژیانا خۆ ژ دەستدا و بتر ژ (22)هەزار كەسان برینداربوون.
تا داویێ و لژێر فشارا نێڤ دەولەتی و جەماوەری ل سەرانسەری عێراقێ، د.عادل سەرۆكوەزیرێن عێراقێ دەست ژ كاركێشانا خۆ پێشكێشی پەرلەمانێ عێراقێ كری ،د ماوێ (24)دەمژمێران دا پەرلەمانی دەست ژ كاركێشان پەسەند كر و ژلایێ خۆڤە چەندین چاكسازی ئەنجامدان داكو جادە ئارام بت و بارودۆخ خرابتر لێ نەئێت،مینا هەلوەشاندنا ئەنجوومەنێ پارێزگەهـ و قەزا و ناوچەداریان و برینا ئمتیازاتێن پەرلەمانتاران و هەرسێ سەرۆكاتیا د ماوەیەكێ كێم دا و لسەر كابینەیا مستەفا كازمی رازی بوون و هەر یەكسەر پشتی مستەفا كازمی بوویە سەرۆكوەزیر ژڤانێ هەلبژارتنێن پێشوەخت دا دیاركرن،لێ پشتی ڤان هەموو بوویەرێن ل عێراقێ رووداین چاڤدێرێن سیاسی دیتنێن خۆ یێن تایبەت هەنە لسەر ئایندێ پرۆسێسا سیاسی ل عێراقێ پشتی ئەنجامێن هەلبژارتنێن پێشوەختن ئانكو د گەشبین نینن و باوەری نینن ئارێشێن عێراقێ ب هەلبژارتنان بێنە چارەسەركرن و ب داوی بێن،ژبەركو ئەڤە چەندین جارن هەلبژارتن دئێنەكرن و هەمان پارت و كەسایەتی و ئەقلیەت ڤەدگەرنە د گۆرەپانا سیاسی دا ب حكوومی فێل و فێلبازیان مینا سەركردەیێن پارتا دعوە و فەزیلە.
چاڤدێرێن سیاسی ئاماژە ب وێ چەندێ داینە كو ئاریشێن عێراقێ ب هەلبژارتنێن پێشوەخت چارەسەرنابن ژبەركو ئاریشە د ڤان خالێن خوارێ دایە:1_جێبەجێنەكرنا دەستوورێ هەمیشەیی مینا یاسایا گاز و غازێ و جێبەجێنەكرنا مادێ(140)2- لاوازیا كەسایەتی و حەزكرنا پارتێن شیعە بۆ پۆستێ سەرۆك وەزیران،3- ئاریشە د پرۆگرامێ وەزارەتا رەوشەنبیری و وەزارەتا پەروەردێ دایە،4- بەلاڤكرنا پۆستێن وزاری و وەكیل وەزیر و كونسلخانە ب شێوەیەكێ تایفی و مەزهەبی.
تُتاح هذه الصورة أيضا في: کوردی