دێ وەر دێ وەر
سەلمان نهێلی
دێ وەر دلبەر
مانێ زڤڕین چەرخ و ڤەگەر
دەم هات بۆ من ڤەگەڕینی وان ماچێن قەر…
هندەكا ل وەرزێ بوهارێ
دەمێ پڕ دبن كانی و ڕویبار
لناڤ خەملا كولیلكان دا
گەڕەكێ ئەز تە ماچی كەم
گەڕەكێ توو من ماچی كە
دێ ماچانێ كەینە گەڕ گەڕ…
هندەكا ل وەرزێ هاڤینێ
بەری بچنە زۆزانا ڕەڤەند و كۆچەر
یان ژی ل دەمێ زبارە و درینێ
دێ خۆ ڤەدزین ژ هەڤالا ، ژۆردا چینە دانگا مالا
لێڤێن خۆ بكە مێژمێژووك و
سینگێ خۆ بۆ منێ تێهنی و تەوخی بكە ستەوبەر…
یان ژی ل وەرزێ پایزێ لبەر دێمێ هەیڤا كەوچەر
لبن دارەكا تا بەلاڤ ماچ ڕێژ كەم سینگێ گرۆڤەر
یان ژی لبەر شڕكا بارانێ
دەمێ كراسێ تە بحویزی خۆ لبەژنا تە دپێچیت
ماچەكا تەڕ ناهێت هەڤبەر…
یێن دی ژی ل دەمێ سەرمایێ
دەمێ دەستێن من یێن تەزی دچنە لیسی د پاخلا تەدا
دەما لێڤان لێڤ گەزین و مانە خویس ئێك دوو بەرنەدا
دەمێ پەڕمیچكێن بەفرێ دكەڤنە لڤ و سەمایێ
نە تە های ژ بایێ فەلەكێ
نە من های ژ سڕ و تایێ
هەتا سپێدێ توو بێژی من شرین كوڕۆ
ئەز ژی بێژم شرین دلبەر…
یێن مایی ژی بلا بۆ سالا بهێت بمینیت قەر…
تُتاح هذه الصورة أيضا في: کوردی