400 كچ و ژنێن گرتیێن ئێزدی ل كەمپا هۆلێ ماینە
تۆرا لالش:
نڤیسینگەها رزگاركرنا گرتیێن ئێزدی ل پارێزگەها دهۆكێ ئاشكەراكر كو بتر ژ (400) كچ و ژنێن گرتیێن ئێزدی ل ناڤا كەمپا هۆلێ دا ماینە،ژبەر نە هاریكاریكرنا هێزا دەستهەلاتدار ل رۆژئاڤایێ كوردستانێ و نە هاریكاریا حكوومەتا عێراقێ پرۆسا رزگاركرنا وان ب سستی ب رێڤە دچە.
بەرپرسێ نڤیسینگەها رزگاركرنا گرتیێن ئێزدی ل پارێزگەها دهۆكێ(حسێن قائیدی)بۆ رۆژناما دەنگێ لالش دیاركر،ژ دەستپێكا ڤەكرنا نڤیسینگەها رزگاركرنا گرتیان یا سەر ب نڤیسینگەها تایبەت یا سەرۆكێ هەرێما كوردستانێ نێچیرڤان بارزانی ڤە(3545)گرتی هاتینە رزگاركرن ژ وانا ژی(1205)ژن و(339) زەلام و(956) زارۆكێن نێر و(1045)زارۆكێن مێ،هژمارا كچ و ژن و زارۆك و زەلامێن ماین ل دەستێ تیرۆرستێن داعشێ دا(2768)كەسن ژ وان(1470)رەگەزێ نێر و(1298) رەگەزێ مێ،هەروەسا هژمارەكا مەزن ژ زارۆكێن ئێزدیان ل سەربازگەهێن داعشێ لسەر هزرێن توندرەو هاتینە پەروەردەكرن ل دووڤ شیانێن نڤیسینگەهێ كاریە نێزیكی(400)زارۆكان ژوان رزگار بكن و گۆت:((لگۆر زانیاریان بتر ژ (400) كچ و ژنێن ئێزدی ل ناڤا كەمپا هۆلێ دا ماینە،ژبەر نە هاریكاریكرنا هێزا دەستهەلاتدار ل رۆژئاڤایێ كوردستانێ و نە هاریكاریا حكوومەتا عێراقێ پرۆسا رزگاركرنا وان ب سستی ب رێڤە دچە)).
قائیدی زێدەتر گۆت:داخوازێ ل جیێن شۆلەژێ ل رۆژئاڤایێ كوردستانێ دكەین بتر دهاریكاربن د پرۆسا رزگاركرنا گرتیێن ئێزدی دا،ئەم خەلكێ خۆ و كەس وكارێن گرتیان پشت راست دكەین هەتا ئێك كەس ل دەستێ تیرۆرستان دا مابت ئەو دێ لسەر كارێ رزگاركرنێ بەردەوام بن.
تُتاح هذه الصورة أيضا في: کوردی