چما ل تۆرەبوونێ دەنگێ خۆ بلند دكەین
” چیرۆكەك ژ ئەدەبیاتێن كریشنا یێن هیندی”
وەرگێران ژ ئینگلیزی:شەمال ئاكرەیی
ژێرمەندەكێ هیندی ل گەل شاگردێن خۆ ب سەرەدان دچۆنە سەر رووبارەكی ژبۆ وەرگرتنا گەرماڤەكێ، ژیرمەندی لسەر رەخێن رووباری كۆمەكا كەسانێن ئەندامێن ئێك خێزان دیتن ب تۆرەیی ب دەنگەكێ بلند یێن لگەل ئێك دئاخڤن، ژیرمەندی ب بشكورین ڤە ل شاگردێن خۆ تەماشەكر و ژ وان پرسی: “چما ل دەمێ تۆرەبوونێ ئەم دەنگێ خۆ بلند دكەین!؟”
شاگردان بۆ بێهنەكێ هزرێن خۆ كرن، پاشی شاگردەكی بەرسڤ دا و گۆت:
” ژبەركو دەما ئەم ئارامییا خۆ ژ دەست ددەین، دەنگێن مە بلند دبن.
ژیرمەندی بەرسڤا وی دا و ژێ پرس:
“لێ بۆچی دڤێت توو دەنگێ خۆ بلند بكەی و ئەو كەسێ توو لگەل دئاخڤی یێ ل تەنشت تە و نە یێ دوورە؟، تۆ دشێی ب رێیەكا جوانتر لگەل ب ئاخڤی!”
هندەك ژ شاگردان، چەند بەرسڤێن دی دان، لێ چ ژوان بەرسڤان شاگر و ژیرمەند قاییل نەكرن.
ل دوماهیێ ژیرمەندی بۆ شاگردان بابەت روهنكر و گۆت:
” دەما دوو كەس ژ هەڤدوو تۆڕە دبن، دلێن وان گەلەك ژ هەڤ دوور دكەڤن، و هەتا بشێن وێ بیاڤا دوور یا دناڤبەرا هەردوو دلاندا چێبووی ببڕن و دەنگێ خۆ ب گەهینە ئێكودو، دڤێت دەنگێ خۆ بلند بكن ژبەركو دەما دل ژ هەڤ دوور دكەڤن، گوهـ ژی دوور دكەڤن و ب ساناهی گۆهـ لێ نابن.
لێ دەما دوو كەس حەز ژ هەڤدوو دكن گازی و هەوارێ ناكەن بەلكو ب نەرمی و هێدی دئاخڤن ژبەركو دلێن وان گەلەك نێزیكی هەڤ دبن و بیاڤەكا كێم دناڤبەرا واندا دمینت و ل هندەك جاران ژی هەر چ بیاڤ نامینت، و دەما بیاڤ دناڤبەرا وان دا نەما، هەر پێتڤی ب پەیڤ و ئاخفتنان ژی ناكەت و ب ئاماژە و پسەپسەكا نزم ژ هەڤدو دگەهن”
ژیرمەندی بەرێ خۆ دا شاگردان و گۆتە وان:
” لەوڕا دەما دیتنێن هەوە سەبارەت هەر تشتەكی دجودا بن، دەما گەنگەشە و گفتووگۆیا بابەتەكی دكن،نەهێلن دلێن هەوە ژێك دویر بكەڤن ب گۆتنا پەیڤێن كو هەوە ژ هەڤدوو دوور دكەن ژبەركو رەنگە رۆژەك بهێت ئەو بیاڤ گەلەك مەزن و بەرفرەهـ ب بیت و هوین نەشێن رێكەكێ ب بینن ژبۆ زڤڕینێ”!.
تُتاح هذه الصورة أيضا في: کوردی