فەرمانبەرێن ئێزدی ل مووسل بۆ شنگال دێ ئێنە ڤەگوهاستن
تۆرا لالش:
جێگرێ ئێكێ یێ پارێزگارێ نەینەوا راگەهاند،وەزارەتا ساخلەمیا عێراقێ رەزامەندی یا خۆ نیشان دایە بۆ ڤەگوهاستنا فەرمانبەرێن ئێزدی یێن ل مووسل دەوامێ دكن بۆ شنگال و دەوروبەران.
سیروان رۆژبەیانی،جێگرێ ئێكێ یێ پارێزگارێ نەینەوا بۆ دەنگێ لالش دیاركر،مە دووڤچۆنا بابەتێ ڤان فەرمانبەران كریە و پەیوەندی دگەل وەزارەتا ساخلەمیا عێراقێ كریە و ئەو رازیبووینە لسەر ڤەگوهاستنا فەرمانبەرێن ئێزدی و تایبەت یێن شنگال كو بێنە ڤەگوهاستن بۆ شنگال و دەوروبەران،چنكو ئەم دزانین گەلەك ژبۆ وان زەحمەتە رۆژانە هاتن و چۆنێ بكن و دێ نڤیسارەكا فەرمی ئاراستەی وەزارەتێ كەین كو ئەڤنە بێنە ڤەگوهاستن.
دالیا عەلی،ئێك ژوان برینپێچان ل نەخۆشخانەیەكا مووسل بۆ دەنگێ لالش گۆت:نێزیكی (110) كچێن خەلكێ شنگال ئەڤە چەند مەهن هاتینە دامەزراندن لسەر میلاكێ ساخلەمیا نەینەوا،ئەم هەموو دەوامێ ل نەخۆشخانەیێن مووسلێ دكەین ب راستی گەلەك زەحمەتە بۆ مە،چنكو هاتن و چۆنێ ژ شنگالێ بۆ مووسل دكەین،ژبلی ڤێ چەندێ ل دەوامێ ژی جیێ ڤەحواندنا مە نینە و چەندین جاران مە داخواز كریە لێ بێ مفایە،لەوا ئەگەر چارەیەك ژبۆ مە نەئێتە دیتن ئەمێ نەچار بن دەواما خۆ بهێلن،هەتا نهۆ ب سەدان كچ و دەیكێن مە ل ڤی باژێری د وندانە ل سەردەمێ داعش دا،لەوا هێشتا مەترسی هەیە و باوەریا مە ل ڤی باژاری دا نائێت ئەم لێ بمینن.
زێدەترژ (200)كچ و كورێن خەلكێ شنگال ل سەر وەزارەتا ساخلەمیا حكومەتا فیدرال ڤە هاتینە دامەزراندن،ئەو نهۆ ل نەخۆشخانەیێن ناڤ سەنتەرێ باژێرێ مووسل دا هاتینە دابەشكرن،زۆربەیا وان فەرمانبەران كچن گازندەیان ژ وەزارتا ساخلەمیا عێراقێ دكن كو ئەو نكارن هاتن و چۆنێ بكن و جیێ ڤەحواندنێ ژی نینە و گەلەك ئاستەنگ ل هەمبەری دەواما وانا هەنە.
تُتاح هذه الصورة أيضا في: کوردی