نێچیرڤان بارزانی: ههرێما كوردستانێ شانازیێ ب كلتۆرێ پیكڤهژیانێ دبهت
گاڤ نیوز
سهرۆك نێچیرڤان بارزانی راگههاند؛ ههرێما كوردستانێ شانازیێ ب كلتۆرێ پێكڤهژیانێ و لێبۆرینێ دبهت.
پشتى نیڤرۆ یا ئهڤرۆ نێچیرڤان بارزانی سهرۆكێ ههرێما كوردستانێ پێشوازی ل كاردینال لویس ساكۆ پاتریاركێ كهنیسهیا كلدانی ل ئیراق و جیهانێ كر و د وێ ههڤدیتنێ دا، رهوشا پێكهاتهیێن كلدان و كرێستیانان ل ئیراقێ و ههرێما كوردستانێ و ب تایبهت ئاوارهیێن كرێستیان و دهشتا نهینهوا و مویسل و دهڤهرێ گۆتوبێژ كر.
ل گۆرهى راگههاندنهكا سهرۆكاتیا ههرێمێ، ههردو ئالی ههڤرابوون كو پێدڤیه باوهر بۆ ئاوارهیێن كرێستیان دروست بیت بۆ هندێ ڤهگهرن جهێن خۆ و دهست ب ئاڤهدانیێ بهێته كرن ب تایبهت ل وان دهڤهرێن ژ ئهنجامێ شهرێ داعشێ زیان گههشتینێ كو ب وێ چهندێ پێدڤی ب هاریكاریێن نێڤدهولهتی ههیه.
پاتریاركێ كهنیسهیا كلدانی پهسنا پێكڤهژیان و ئێكدوقهبیلكرنێ و ئاڤهدانی و پێشكهفتنێ كر و گۆت: كوردستانیبوون ناسنامهیا كۆمڤهبوونا ههمی پێكهاتهیێن ئۆلی و نهتهوهیانه.
ههڤدهم سهرۆك نێچیرڤان بارزانی دوپات كر كو ههرێما كوردستانێ شانازیێ ب كلتۆرێ پیكڤهژیانێ و لێبۆرینێ دبهت كو ههردهم دێ لاندكا ئارامیا ههموو پێكهاتهیان مینیت و ههروهسا ههردو ئالیان سهرهدانا پاپایێ ڤاتیكانێ ب گرنگ ل قهلهم دا بۆ مۆكمكرنا كلتۆرێ پێكڤهژیانێ.
تُتاح هذه الصورة أيضا في: کوردی