قووربانیێن پاشماوەیێن داعش ل شنگالێ
سەگڤان شنگالی
پشتی كێمبوونا دەستهەلاتا چەكدارێن دەولەتا ئیسلامی ل عێراق و شامێ یا بناڤێ (داعش) ل عێراقێ ب گشتی و دناڤبەرا سالا(2015/2016)ێ و هیڤیا چەكدارێن داعشێ د شنگالێ دە كێمبووی و نەمایی و دەستهەلاتا وان ل شنگالێ لسەر دەستێن هێزێن پێشمەرگەی و ئەمنی و لەشكەری ل دەڤەرێ دە بەرەف نەمانێ چووی،ئەوان چەكداران چەندین پێكۆل و كارێن نەرەوا كرن داكو خەلكێ دەڤەرێ و هێزێن ئەمنی پشتی نەمانا وان نەڤەگەرن و خۆشیێ ژ ژیانا خۆ نەبەن،داكو ئێمناهی پەیدانەبت كارێن دژی مرۆڤایەتیێ و شارستانیەتێ ئەنجام دان ژوان ژی پەقاندنا قوب و نیشانگەهێن ئاینی و جیێن كەڤنار و دیرۆكی،شەوتاندنا ئەرد و باغێن خەلكێ و وێرانكرن و راستكرنا هەژمارەكا زێدە یا مال و خانیێن خەلكێ سڤیل،دانانا بۆمبێن ل بن ئەردی ژبۆ گیرۆكرن و نەزڤرینا خەلكی بۆ سەر مالێن خۆ، و وان ژمارەكا گەلەك زێدە یا بۆمبێن ل بن ئەرد ل باشوور و باكوورێ چیایێ شنگالێ دانان و چاندن و زێدەباری چەندین كارێن دی یێن نەمرۆڤایەتی و نەرەوا، هەروەسا ئەوان بەرنامە و ئایدیولۆژیەكا توندوتیژ و شەرخوازی هەبوو لەوما ل رۆژێن داویێ یێن تەمەنێ دەستهەلاتداریا خۆ ل شنگالێ ئەو بڤان كارێن بڤی شێوەی رابوون و دناڤ خانیێن خەلكێ و فەرمانگەهێن حكومی و میری و دناڤ زەڤی و ئەردێن چاندنێ و دناڤ جادەیێن سەرەكی دە ب گشتی بۆمب ددانین.
پشتی نەمانا تیرۆرستێن داعش لسەر ئەردێ شنگالێ و وەلاتێ عێراقێ ب گشتی وەكو هێزا چەكداری و دەستهەلاتێ بەلێ مەترسیا وان بۆمبا یە بەردەوامە ل جەم خەلكی و دەمێ هژمارەكا خەلكێن شنگال ڤەگەریاین سەر مال و ئەردێن خۆ ب دلەكێ ئارام نكارن ژیانا خۆ یا ئاسایی و نۆرمال دەرباز بن،هەتا نهۆ ئەم دكارین بێژین ب دەهێن جاران ئەو بۆمبە ب خەلكێ دەڤەرێ ڤە پەقیانە و بووینە ئەنجامێ وێ چەندێ كو كەسێن بێ گونەهـ و سڤیل ژیانا خۆ ژ دەست بدەن یان بریندار و كێم ئەندام ببن ئەڤە ژبلی مرن و قوربانێن ب دەهان سەرێن پەزی كو دناڤ زەڤی و دەشتان دە بۆمب ب وانڤە د پەقن،باشترین نموونە ژی بەری چەند رۆژایە دەمێ بۆمبەك ب سنێلەكی ڤە پەقی ل ناحیا گرعزێز ئەو زارۆك بوو قوربانی و ئەڤ زارۆكە نە قوربانیێ یەكێ یە و هەكە رەوش بڤی شێوەی بت ئەو بۆمب نەئێنە راكرن و پوچكرن گەلەك قوربانیێن دی دێ ژ ئەنجامێ هەبوونا ڤان بۆمبا چێبن،هەروسا هەكە ئەم نموونەیەكا دی بینن كو بەردەوامیا قووربانیا یێن بۆمبێن چاندی چێدبن ئەو هەژمارا زۆر یا وان بۆمبایە ئەوێن كو د دەمێ خۆ دا رژێما بەعس یا عێراقێ ل گوند و چیایێن كوردستانێ دانابوون كو هەتا نهۆ ناڤبر ب ناڤبر قوربانی لێ پەیدادبن،نەجیێ گومانێ یە هەكە ئەو بۆمبێن ل شنگال نەئێنە راكرن خەلكێ شنگال دێ بڤی شێوەی قوربانیێن بەردەوام دەن.
لەوما خەلكێ شنگالێ داخوازدكن ژ حكومەتێ و سازیێن گرێدایی راكرنا بۆمبێن چاندی كو دەڤەر بێتە پاقژكرن،داكو ژیانا وان یا پاراستی و ئارام بت و دووربت ژ قوربانیێن پشتی شەر و نەمانا تیرۆرستێن داعشێ،بێگۆمان ئەڤە باشترین چارەسەریە ژی كو حكومەت و سازیێن لەشكەری و مەدەنی ب هاریكاری و هەماهەنگی دگەل هەڤدوو رابن ب هەوێن بەرفرەهـ بۆ پوچكرن و نەهێلانا ڤان بۆمبا،داكو ئەو خەلك ڤەگەرنە سەر مال و ئەردێن خۆ و د ژیانەكا ئارام دا بژین و زێدەتر نەبنە قووربانیێن بۆمبێن چاندی.
تُتاح هذه الصورة أيضا في: کوردی