مرێبا كی یە؟
مەهدی حەسەن
مرێبا:ئەو كەسێ كارێ جۆتكاریێ و چاڤدێریا زەڤیێن عەردێ چاندنێ دكت هەر ژ جۆت و جۆباری و دروونا دەخلودانی و كێشانا شخرا و جەنجەرێ و بێلدانا گەنم و دانی ژبۆ كەتخودایەكی یان دەرەبەگەكی بەرامبەر بەشەكی ژ وی بەرهەمێ بخۆ دابین دكت دبێژنێ مرێبا، هەروەسا د بێژنە وان كەسان مرێبا ئەڤێن لسەر عەردێ خۆ و كەسەكی عەردێ وی ب زۆرداری ژێ وەرگرت بت و بۆ ژین و ژیارا خۆ جارەكا دی لسەر وی عەردی كار كەی بۆ بدەستڤەئینانا رسقەكی داكو پێ بژیت دبێژنا وان كەسا ژی مرێبا،وەكی لسەردەمێ رژێما گۆربەگۆرا بەعسیا ئەڤ زاراڤا لسەر مە ئێزدیان د هاتە گۆتن ئەم ئێزدی ل وی سەردەمی مرێبایێن عەرەبا بووین،رژێما بەعس عەردێن مە دەستەسەركرن و دانا عەرەبان ژ نەچاریا ژیانا قورسا وی سەردەمی مە ئێزدیان عەردێن خۆ ژ عەرەبان كرێ دكرن ئەو ل مالا خۆ ل داویا سالێ پشتی خەلكێ مە دەخلودان د چاند و هەتا دروونێ مە ئەو بەرهەمێ خۆ كۆمدكر دا عەرەب ئێنە سەر بێدەرێ و كۆما بەرهەمی ب نیڤی كن،مرێبا:نە (رێنجبەرە و نە شانە یە) مرێبایی پیشەیەكا گرێدای كێلانا عەردی یە بۆ كەسێن كەتخودا و مەلاك و ئاغایە و دەرەبەگا جۆت دكر و چاڤدێریا عەردێ وی دكت هەتا دئێتە دروونا پشتی هنگی د دروون و ب شخرا د كێشان و ل بێدەرێ كۆم دكن و جەنجەر دكن و بێلدەن و بێدەر ژێك ڤاڤارتن و پاقژ دكرن ئەڤە كارێ مرێبایایە،رێنجبەر:ئەو كەسێ رێنجبەریا كەتخودایەكی یان دەرەبەگەكی یان هەر كەسەكی خودان گای و مال و زەڤی بن دكت، بەلێ هەر كارەكێ هەی ل ناڤ مالێ و جۆت و جۆباریێ دكت ل ناڤ مالا وی دبت ب شەڤ و رۆژ بۆ ماوێ نەهـ هەیڤا ل خزمەتا كەتخودای دا دبت، دگۆتنێ رێنجبەرێ ناڤ مالا فلان كەسی و ئەڤ كارە دكر داكو رسقەكی دابین كت بۆ خێزانا خۆ و هندەك گەنج هەبوون رێنجبەریا بنەمالەكێ یان مەزنەكی كەتخودایەكی دكرن بۆ ماوێ هەفت سالان د بەرامبەردا ئەوی كەسی كچەكێ ب دەنە وی گەنجی یان نەختێ وی ب دەن ژبۆ پێكئینانا هەڤژینیی، شانە:ئەو كەسە د هاتە راسپاردن ژلایێ بەگی ڤە یان ئاغا و مەلاكی ل گوندی چاڤدێریا بەرهەمێ عەردی بكت ل هەر گوندەكی ئەگەر ئەو گوند ملكێ بەگی بت شانە دهاتە مالا موختاری و لسەر بێدەرا دگەریا دا كەس مالێ بەگی نەخۆت و هەر بێدەرەك نیشانەك لسەر گەنم و جەهی و نیسك و نۆكا وهتد دا دگۆتنێ(تەرخ) نیشانا شانەی،ژبەركو ئەو عەرد مەلاكا لسەر ناڤێ خۆ تاپۆ كربوون و خەلكێ گوندی دبوون مرێبایێن بەگی بەرهەمێ هەموو بەگی ب نیڤی بخۆ دبر د رێیا ڤێ شانەی ڤە خرڤەدكرن، شانەی چوو كار نەدكر بەس دخوار و ڤەدخوار و دگەریا لسەر بێدەرا خەلكێ ژی گەلەك رێز لێ دكر جار جارا گەندەلی دكر و هاریكاریا جۆتیارا دكر هەتا نهۆ دبێژن فلان كەس شانەیە چوو كار و عەمەلا ناكەت بەس دخۆت و ڤەدخۆت،ژلایەكێ دیڤە دئێتە گۆتن هەر كەسەكێ مایێ خۆ د كار و بارێن كەسەكی دا بكت دبێژنێ ما توو مرێبایێ وی یی،ل هێرە دئێتە دیاركرن مرێبای بتنێ مافێ كاری و جۆتیاریێ هەبوویە و لسەر زانینا وی د هاتە چاندن و سەخبێركرن(گای نەدكر مرێبای منێ دكر).
تُتاح هذه الصورة أيضا في: کوردی