لارا عاسم:دڤێت قوتابیان باوەری بخۆ هەبت و لسەر ئاستەنگ و بێ هیڤیبوونێ زال ببن
تۆرا لالش:
لارا عاسم قەوال خەلكا قەزا شنگالێ یە و نۆكە ل كۆمەلگەها شاریا ئاكنجی یە، ئیسالە ب كۆنمرا( 99.7 ) پلا دووێ لسەر ئاستێ هەرێما كوردستانێ ل قۆناغا دوازدێ پشكا زانستی بدەستڤەئینا و دبێژت:دڤێت قوتابیان باوەری بخۆ هەبت و چ بارودۆخا بخۆ نەكەنە ئاستەنگ و لسەر بێ هیڤیبوونێ زال ببن، هەروەسا خوازم ل كولیژا پزیشكی یا گشتی بێمە وەرگرتن.
پشتی بدەستڤەئینانا پلا دووێ ل ئاستێ هەرێما كوردستانێ(لارا عاسم)ب دلەكێ بەرفرەه خۆشحالیا خۆ دیاركر و بۆ رۆژناما دەنگێ لالش دبێژت:دەستپێكا پرۆسەیا خووندنێ تا پۆلا پێنجێ بنەرەتی ل قوتابخانا مارۆ یا كوردی ل كۆمەلگەها خانەسۆرێ ل شنگالێ خووندیە و ئەو قوتابخانە ژ ئاخێ هاتبوو چێكرن و زڤستانا دگەل هاتنا بارانێ دلۆپ د پۆلێ دە دهاتنە خوار لەورا داخواز دكەم ئەو قوتابخانە ب شێوەیەكێ سەردەمیانە بێتە چێكرن،ل رۆژا(3/8/2014)ێ شنگال ژلایێ تیرۆرستێن داعشێ ڤە هاتە داگیركرن و مالباتا مە ئاوارەی كۆمەلگەها شاریا بوون هەر وێ سالێ بەردەوامی دا قۆناغا بنەرەتی،ل سالا (2018)ێ ل قوتابخانا ئامادەیا شاریا یا زانستی یا تێكەل هاتمە وەرگرتن و ئیسالە پۆلا دوازدێ تەمامكر و كۆنمرەیا (99.7) پلا دووێ لسەر ئاستێ هەرێما كوردستانێ بدەستڤەئینا و دخوازم ل كولیژا پزیشكی یا گشتی بێمە وەرگرتن و گەلەك سوپاسیا هەموو مامۆستایێن ئامادەیا شاریا دكەم و هیڤی دكەم بەردەوام بن د كار و كاروانێ خۆ یێ زانستی دا.
لارایێ دیاركر،ل خانیەكێ ب كرێ دا دژین ژ سێ ژۆران پێكهاتیە، مە ژۆرەك بۆ خواندنێ هەبوو بەلێ نەیا وێ بتنێ بوو دۆتماما وێ ژی د وێ ژۆرێ دا د خووند، ئاوارەی بوو ئەگەر بتر بخوونم و سەربكەڤم،رۆژانە ئەركێن قوتابخانێ دخووندن ئانكو نەدهێلا چ وانە بێ خووندن لسەر دا دەربازبن و گرنگترین تشت ل پۆلا دوازدێ ئەوە كو كارێ ئیرۆ نەهێلە بۆ سبەی،هەروەسا هاتنا ڤایرۆسێ كۆرۆنایێ كارتێكرنەكا خراب هەبوو لسەر هەموو لایەنێن ژیانێ و بۆ مە قوتابیان ب تایبەتی ژبەركو دوو هەیڤان قوتابخانە هاتنە راگرتن و مە نزانی سال دێ چاوان دەربازبت،دیسان بۆ خووندنێ چ جیاوازیەكا وەسان نینە دناڤبەرا پۆلا دوازدێ و پۆلێن دیتر دا ئانكو پۆلا دوازدێ نەیا ب زەحمەتە وەكو هندەك دبێژن بەلێ دڤێتن مرۆڤ بتر ژ پۆلێن دی گرنگیێ پێ بدەت ژبەركو پۆلا دوازدێ پاشەرۆژا مرۆڤی تێدا دیار دبت،پەیاما وێ بۆ قوتابیێن دچنە پۆلا دوازدێ ئەوە باوەری بخۆ هەبت و چ بارودۆخا بۆ خۆ نەكەنە ئاستەنگ و هەردەم ئارمانجا وە بلا ل بیرا وەبت ب تایبەتی دەمێن بێ هیڤی دبن و هەول بدەن لسەر بێ هیڤی بوونێ زال ببن و هەردەم سەربكەڤن و ئەگەر وە تشتەك نزانی ب خۆ نەكەنە خەم،بەلكو ل ژێدەرێن زانیاریان بگەرن دێ زانن و داخوازا سەركەفتنێ بۆ قوتابیان دخوازم.
ل داویێ گۆت:گۆتژی گەلەكا دلخۆشم كو كاری ئێزدیان بڤی ئەنجامی خۆشحال بكەم و ب تایبەتی د هەیڤا تەباخێ دا،چنكو د ڤێ هەیڤێ دا ئێزدی تووشی كۆمكوژیان بووینە و گەلەك بیرهاتنێن نەخۆش مە دیتینە و ژبەر هندێ گەلەكا كەیفخۆشم كو كاری پچەكێ خەما مللەتێ خۆ كێم كەم،هەروەسا پەیاما وێ بۆ كچان و مالباتێن كچان تایبەت یێن ئێزدی ئەوە ب ئیرادە بن و پشتەڤانێن كچێن خۆبن،مالباتا وێ گەلەك پشتەڤانیا كر و ب راستی ئەوان رۆلەكێ هەرە گرنگ هەبوو د سەركەفتنا وێ دا.
تُتاح هذه الصورة أيضا في: کوردی