وهزارهتا ناڤخۆ:پشتى سالهكێ ژ رێكهفتنا شنگالێ چ گاڤهكا ب كریار لسهر ئهردى نههاتیه هاڤێتن
گاڤ نيوز:
وهزارهتا ناڤخۆیا ههرێما كوردستانێ راگههاندنهك ل دۆر دهربازبوونا سالهكێ بسهر ئیمزاكرنا رێكهفتنا شنگالێ دا بهلاڤكر و مخابنیا خۆ نیشاندا كو چ خالهكا رێكهفتنێ نههاتیه بجهئینان و رۆژ ب رۆژێ گرۆپێن سهر ب پهكهكێ ل شنگالێ بهێز تر دبن.
وهزارهتا ناڤخۆ د راگههاندنا خۆ دا دیار دكهت، د ئیمزاكرنا رێكهفتنا شنگالێ دا حكومهتا ههرێمێ گهلهك نهرمى نیشاندا پێخهمهت ئاساییكرنا رهوشا شنگالێ و رهخساندنا سهقایهكێ گونجاى بۆ ڤهگهڕیانا ئێزدیێن شنگالێ. ههر چهنده ل دهمێ ئێمزاكرنا رێكهفتنێ ئالیێ بهرانبهر هاته ئاگههداكرن كو پشتى بوویهرێن 16ى ئوكتوبهرێ شنگال كهفتیه ژێر دهسـتێ پهكهكێ و گرۆپێن پێڤه گرێداى، لێ پشتى سالهكێ ژ رێكهفتنێ دهێته دیتن كو ئهو دهڤهر پتر كهفتییه ژێر دهستێ وان گرۆپان.
وهزارهتا ناڤخۆیا ههرێمێ ئاماژه دایه رێگریكرنا چهكدارێن گرێداى پهكهكێ ژى ل بهربژارێن پارتى كو ل دهستپێكا ڤێ ههفتیێ رێك نهدایێ بچنه دهڤهرا شنگالێ. د راگههاندنا وهزارهتێ دا هاتییه “مخابن پشتى سالهكێ ژ رێكهفتنا شنگالی چ گاڤهكا ب كریار لسهر ئهردى نههاتییه هاڤێتن و رۆژ ب رۆژ پهكهكه ل پێش چاڤێ هێزێن ئیراقێ پێگههـ و دهستههلاتا خۆ ل دهڤهرێ بهێز دكهن.
ناڤخۆیا ههرێمێ بۆ رایا ناڤخۆ و جیهانێ دیار دكهت ژى، دهمێ بجهئینانا رێكهفتنا شنگالێ ههر هۆسا یێ ڤهكرى نابیت و ب ههروه دانا دهمى خزمهتا چ ئالیان ناكهت. داخواز ژى ژ حكومهتا فیدرال كرى یه ب ئهركێ خۆ رابیت و نهتهوهیێن ئێكگرتى و جڤاكێ نێڤدهولهتى ژى دیڤچونا بجهئینانا وێ رێكهفتنێ بكهن و مافێ ڤهگهڕیانا ئاوارهیێن شنگالێ بهێته گهرهنتیكرن، دویماهى ژى ب رهوشا سهپاندى بسهر دهڤهرێدا بهێته ئینان.
تُتاح هذه الصورة أيضا في: کوردی