شێرە ژنا قارەمان گوندیا خدر زیزەی
مەھدی حەسەن موراد
بمخابنی ڤە شەڤا ئینیێ رۆژا ٢لسەر ٣ی كانوونا ئێكێ ) د روی ب رویبوونەکا دی دا دگەل تیرورست و سەربر و کوژەکێن داعش دا هەژمارەکا عەزیزێن مە ل دەڤەرا مەخمور شەهید بوون ژ وانا سێ برایێن ئێكبوون، قەدەرا مە كوردا ئەڤەیە ژیانا مە گەلەك یە ب ئێش و ژان و دەردەسەری یە دەردێ مە دەردەكی گرانە كەس د ھاوارە مە ناھێت و كەس خۆ ل مە ناكەت خودان چ بھێت سەرێ مە، رژێما گوربەگورا بەعسیا كێمیا ل مەدا كەس د ھاوارا مە نەھات ئەم ئەنفال كرین كەسی ھەر بەحس نەكر ل بەر چاڤێن ھەمی دنیایێ ل ڤی سەردەمێ پێشكەفتی داعشا فەرمان سەرسەرێ ئێزدیان ئینان و خەلكێ شنگالێ بڕت و بەلا كر و ب ھەزارا ژن و كچ و بوكێن ئێزدیان رەڤاندن ھەمیا خو كەر و لالكرن، ئەڤەژی ڤەدگەرێت بۆ ڤێ نەدادپەروەریا ھەی ل جیھانێ ھەر كەس خودانێ بەرژەوەندیێن خو یە ھەگەر نە كێ دیتیە (٤٠) مەلیون كەس د بێ خودانبن چار دەولەت عەردێ وان مال و ملكێن وان ل سەر خو لێكەڤەكەن، ھەرۆژ وان ب كوژن سێدارەدەن زێندان كەن ئنكارا ھەبوونا مللەتێ كورد و كوردستانێ بكەن ھەر گاڤا دەلیڤە ھەبت دربا خۆ ڤەدوەشینن و مە د كوژن! ئەڤا بەری چەند رۆژا قەومی ل دەڤەرا سەرگەران و بنارێ چیایێ قەرچوغ ل گوندێ خدر زیزەی ل مەخمور ب راستی كارەساتەكا چەرگ بڕ بوو ، بەلێ قەدەرا مە كوردان ئەڤەیە رۆژ ئاڤا نابت ما ئەم گوھ ل سەرھاتیەكا خەمناك بین كو دلێ ھەمی كوردستانیا بھێت سۆتن، ئەی ھاوار ما ئەڤە دۆژمن و نەیارێن كوردان چەند زاڵمن تێرنابن ژ خوین ڕێتنا كوردان ما ئەڤە د كەر و لالن ئاگەھ ژ قیرێن و ھاوار و گازیێن دایك و خوشكێن مە نابن ما ئەڤە دكۆرەنە دیمەنێن كوشتیێن زارۆك و گەنج و پیر و كالێن مە نابن ما ئەڤە تێر نەبوون ژ سەربرین و كوشتنا كوردا ئەی ھاوار ما نەبەسە ئەڤ قیرێن و ھاوارا مە ل بەر ئەزمانا سەكنی چەرگێ دەیكەكێ ھەوە سۆت بێ سوچ و سەبەب سێ كورێن وێ شەھید كرن لڤێ شەڤا رەشا كانونێ تەرمێ سێ كورێن وێ ل بەر سنگێ دەیكا رەبەن درێژكرن ب راستی كارەساتە و كارەكی نامرۆڤایەتیە دەرھەقی كەسێن سڤیل و بێ گونەھ دھێتە ئەنجامدان دڤیا دنیا ھەمی بھێتە سەر ھێلێ و ھێدی زولم و و زورداری بەس بت، دیسا بمخابنیڤە پێشمەرگەھێ قارەمان ب لەز و بەز د ھاوارا وان چو بەرەڤ مەیدانا شەری بۆ تولڤەکرنا وان شەهیدا لێ جھێ داخێ بوو پێشمەرگەھ كەفتا كەمینەكا داعش و ژمارەكا پێشمەرگەھا شەھیدبوون ، لەوا ژی جنابێ سەرۆكێ حكۆمەتێ بەرێز مەسرور بارزانی ب راشكاوانە گۆتە كەس و كارێن شەھیدا ئەم ھەموو ژی بمرین ئەم رێبازە و ئەم خاكە انشاللە ئەبێت بەسەر بەرزی بمینت شەھیدێن ھەوە ھەر بەسەر بەرزی بمینە ڤە، ھەموو ژ مان كوری بەرێزتین و دێ ل خزمەتا جەنابتان بین ئەوەی پێشمان بكرێ بە ھەموو نەوعەك ئەوەی پێمان بكرێ وەكی كوری جەنابتان ل خزمەت دەبین، ب راستی ڤێ رویدانێ و ئەڤ كارەساتە ھاتیە سەرێ بنەمالا ئسماعیل عەبدوللە دلێ ھەمی خەلكێ مە یێ كوردستانێ سۆت و ب رۆندكێن چاڤا تەماشای ڤێ كارەساتێ دبین كو ڤێ دەرنگیا شەڤێ مە گوھ ل ڤێ خەبەرا دل تەزین بوو، گرۆپەكی تیرۆرستێن داعش ئەڤ ھێرشا ھۆڤانە كریە سەر ڤێ مالا سڤیل و ل ناڤ مالا خودا د رونشتی و ل سەر كار و عەملێ خۆ ئەڤ كارێ وەحشیانە دگەل ڤێ بنەمالێ ھاتە ئەنجامدان و ئەڤ كارێن ھۆڤانە د بەردەوامن ل ڤان ناوچێن ڤەقەتیایێ ژ ھەرێما كوردستانێ ئەڤە ژی ڤەدگەرێت بێ پوتەیا حكومەتا ئیراقێ ئەڤ عەربێن ب رۆژ خو د كەنا جوتیار و ب شەڤێ دبن داعش و د ئەنجام دا زەرەر و زیانێ د گەھینن خەلكێ مە یێ ناوچەیێن ماددێ ١٤٠ كو سستیا حكومەتا ئیراقێ و جیبەجی نە كرنا دەستورێ ئیراقێ و تایبەت ماددێ ١٤٠ كو ئەڤە ٣٠ سالا چارەنڤیسێ ڤان ناوچێن ڤەقەتیایێ ژ ھەرێما كوردستانێ بێ ئومێدبین ژ دەسھەلاتدارێن حكومەتا ئیراقێ و ژ دەستێ ڤان عەرەبێن فاشست كو رۆژانە پەلامارێن داعش بۆ ڤان دەڤەرێن ڤەقەتیایێ و سەر چەپەرێن پێشمەرگەھی دھێنە ئەنجام دان و خەلكێ مە قوربانیا دەت، ئەڤا د ھێتە كرن شاشیەك مەزنا لەشكەری ئیراقێ چاڤخشینێ د لڤلڤینێن داعش دا دكەن دڤیا ب جدی ھەماھنگیەكی دگەل پێشمەرگەھی ب كەن بۆ نەھێلانا ڤان گرۆپێن توند رەو ل ھەر جھەكی ھەین ھەكر ھاریكاریێ نە كەن بلا رێكێ بدەن پێشمەرگەھێ قارەمان دا ب ئەركێ خو رابن ژ بۆ قڕكرنا داعش ھەگەر نە پێویستە ئەمریكا بجێتە سەر ھێلێ و رێكێ بدەن پێشمەرگەھی بچتە جھێن ڤالاھیا ئەولەھی لێ ھەی، چونكی دەڤەرێن كوردستانیێن سنورێ مادەیا سەد و چلە و مافێ مەیە ، ژ لایەكی دیڤە ئەڤێ رویدانێ كارتێكرنەكا مەزن د نەفسا مرۆڤێ كورد كر ئێك قوربانیا سێ كورێن ژنە شێرەكا وێرەك و مێرخاس كو ئەو بەرەڤانی و بەرخودانا كورێن وێ كرین دەكمەن كەسێن وەسا ھەبن ل سەرتاسەری جیھانێ تەرمێ سێ كورێن وێ د خوینێ د گەڤزن ئەو نەھێلن داعش ب گەھن ناڤ مالێن وان و بەرخودانێ ب كەن وە دیارە شیرێ ڤێ دەیكێ شیرەكی حەلال بیە و ب دروستاھی ل سەر سنگێ ڤێ دەیكێ ئەڤ كور ھاتینە فرشكرن لەوا ژی ب وێرانە بەرامبەر كەنالێ راگەھاندنێ وەك شێرە ژنەك سەكنێ و خو كورێن خو ب قوربانی ئاخ و وەلات و سەرۆك بارزانی كر و شانازیێ ب كورێت خو د بەت كو ھەتا شەھید بوون بەرگری كرن، ئەڤە ل كیژ جھی ل كیژ وەلاتی ھەیە ژنەك مینا ڤێ ژنا شێرە كوردستانی بڤی رەنگی بەرسڤا داگیركەر و داعشا بدەت ، یان ژی گوھداریا برایێ سێ شەھیدا ب كەین ئەڤێ ھەتا فیشەكەكا وی مایی شەر كری و ل تەنشتا وی برایێن وی د خونێ د گەڤزن و داستان ب دوماھیك د ھێت و داعش د رەڤن و ھەر زو ئەڤ بنەمال بانگەوازا سەرۆكێ حكۆمەتێ د كەت و د بێژت بەھانا مە وەرن جھێ خۆشحالیا مە ھەمیا بو جەنابێ سەرۆكێ حكۆمەتێ رۆژا دی د گەھێت ناڤ مالا وان و برایێ ھەر سێ شەھیدا ئەڤێ گۆتنێ دبێژت سەرۆكێ حكۆمەتێ :
قسەکانی برای سێ شەهید وەک خۆی :-
( کاک مەسرور بەخێر بێی ، ئەمن برای هەر سێ شەهید ، هەتا ئێستا جلی بەخینی براکانم لەبەرنەکردتەوە بەس کە ئەتو هاتی ئەمن لەبەر دەکەمەوە چاوەڕێی جەنابت بووم ، دونێ شەوێ بانگم کردی، گۆتم وەرە دەست لە ملم کە برینێ درم ، برینێ درم گەلەک قۆرتە ، نالێ برایانم گەلە بە ئازارە ، هەر سێ برام لە تەنیشتە خۆم شەهید بوون بەس ئەمن هەر دەستم نەدا هەتا ئاخر فیشەک شەڕ م کرد ، سێ برام لە تەنیشت یەک درێژ بوون هەمووی بەقوربانی سەرۆکی بن ، ئەمە هەشت برا ماینە سێ هی ئەو دایکەی خۆم ، پێنج هی داکەکەی دیکەم ئامادەینە لە پێناو خاکی کوردستان ئاڵای کوردستان و سەرۆک بارزانی، هەر هەموومان خینی خۆمان برژێنین ، پێشەوا قازی محمد لە سەر ئاڵای کوردستان شەهید بوو ، ئێمەش لەسەر خاک و نیشتمان و شەرەف و ناموس و کەڕامەتێ خۆمان شەهید دەبین، براکانی من چوونە رێبازی رێی نەمران ،
بەخێر بێی ، زۆر پێخۆشحاڵم ، ئێستاش جلکی بەخینی براکانم لەبەر دەکەمەوە ، بەخێر بێی بەسەر چاوم ، چونکە نەبووە ۲٤ سەعات گەیشتیە من، شەوێ پێم گۆتی نەبووە ۲٤ سەعات گەیشیە من ، ئێستاش هەموو قوربانی سەرۆکی بن )
ئەڤی ھەلویستێ ڤێ خێزانێ و ھەستێ وسن یێ نەتەوەی و نیشتمان پەروەری مورالا خەلكێ كوردستانێ بەرز و بلند كر كو ھندی مە شێرە ژنێن وەسا ھەبن بڤێ جورئەتێ ژ مرنێ نەترسن و خۆ و كورێن خۆ گوری ئاخ وەلاتی بكەن دێ ھەر رۆژەكێ كوردستانێ ئازاد كەین و سەرفراز و ئازاد دێ ژین ل سەر ئاخا گەلێ كورد ب خوینا خو پاراستی و جھێ دوژمنا و داگیركەرا و داعش ل سەر ڤی عەردی نابت .
تُتاح هذه الصورة أيضا في: کوردی