مەسروور بارزانی: دادگەها فیدرال نەدەستووریە و داخوازا دوبارە پێکئینانا وێ دکەین
گاڤ نیوز
سەرۆکێ حکومەتا هەرێما کوردستانێ ئەڤرۆ د کۆنگرەیەکێ رۆژنامەڤانی دا دوماهی پیشهاتێن کێشەیێن حکومەتا هەرێما کوردستانێ ل گەل بەغدا و بریارا دادگەها فیدارال دەربارەی یاسایا هنارتنا نەفت و غازا هەرێمێ بەحس کرن.
مەسروور بارزانی، سەرۆکێ حکومەتا هەرێما کوردستانێ د کۆنگرەیی دا گۆت: بڕیارا دادگەها فیدرالی یا دژی یاسایا نەفت و غازێ یا بێ لایەن نەبوو و دەستەکێ سیاسی ل پشتە و رازی نەبوونا مە یا بریارا دادگەها فیدرالی پشتبەستنە لسەر دەستوورێ ئیراقێ.
هەروەسا گۆت: چ دادگەهان ل جیهانێ ماف نینە گۆهوڕینان د مادەیێن دەستووری دا بکەت و دوپات کر کو دادگەها فیدرال نەدەستووریە ژ بەرکو ل گۆرەی دەستووری نەهاتیە پێکئینان و داخواز کر دوبارە بهێتە پێکئینان.
سەرۆکێ حکومەتا هەرێمێ نامایەک ژی بۆ هەمی ئیراقیان هنارت و تیدا گۆت: حوکمرانێن ئیراقێ نەشیاینە خزمەتگوزاریان پێشکێشی خەلکێ خۆ بکەن و دخوازن وێ فەشەلا خۆ بێخنە سەر ملێن حکومەتا هەرێما کوردستانێ، لێ هەرێما کوردستانێ مافێن چ ئالیان نەخوارینە و قەبیل ناکەت ژی چ ئالی مافێن وێ بخون.
مەسروور بارزانی دەربارەی داهاتێ هەرێمێ یێ پەترۆلێ و بلندبوونا بهایێ پەترۆلێ د بازارێن جیهانی دا گۆت: ل کابینەیێن بەرێ 25-28٪ ژ داهاتێ فرۆشتنا نەفتێ بۆ مووچەی بوو، نوکە و پشتی چاکسازیکرنێ یێ بوویە 41٪ێ، لێ ل گۆرەی گرێبەستێن کابینەیێن بەرێ ل گەل کۆمپانیێن بەرهەمئینانێ، پتری ٪40 یا داهاتی بۆ خەرجیێن کۆمپانیان دچیت و راستە بهایێ پەترۆلێ بلندبوویە، لێ داهاتێ ناڤخۆیێ و یێ هندەک دەرگەهێن سنۆری کێم بوویە و ناهێتە خەزینەیا حکومەتێ، لەوار ئەو داهاتە تێرا مووچەیێن فەرمانبەران ناکەت.
تُتاح هذه الصورة أيضا في: کوردی