كچەكا رزگاربووی ب رێیا هۆنەری ئازارێن كچ و ژنێن ئێزدیان بەرچاڤ دكت
تۆرا لالش:
فریال سائیب،كچەكا رزگاربوویا ئێزدی یە ل سالا 2014ێ ژلایێ تیرۆرستێن داعشێ ڤە ل شنگال هاتە گرتن،ل سالا 2017ێ ل بن دەستێن داعش رزگاربوو،نۆكە كارێ هۆنەری دكت و بۆ باسنیوز دبێژت:ل بن دەستێن تیرۆرستان دا زۆر نەخۆشی دیتن و بزاڤێ دكەم ب رێیا هۆنەری ئازارێن خۆ و كچ و ژنێن ئێزدیان بۆ جیهانێ دیار و بەرچاڤ بكەم.
زێدەتر گۆت:هەستەكێ نەخۆش د دلێ مەدایە و نكارین ئەوی هەستێ نەخۆش بۆ كەسێن بەرامبەری خۆ دەرببرین،لەوران ب رێیا تابلۆیان نەخۆشێن ل بن دەستێن تیرۆرستێن داعشێ مە دیتین دیار دكەم، پشكەكا زۆر ژ كچ و ژنێن رزگاربوویێن ژ دەستێ تیرۆرستێن داعش سەرەدانا سەنتەرێ چارەسەریێ و پشتەڤانیا كچ و ژنان ل دهۆكێ دكن و د وی سەنتەری دا مژوولی كارێ هۆنەری دبین و ب وێ رێ دەمێ خۆ د بۆرینین، ب رێیا هۆنەری نەخۆشیان د دل و هزرێن خۆ دا دەردكەین.
ئاشكەراكر ژی ماوێ سێ سال و پێنچ هەیڤان ل بن دەستێ رێكخراوا تیرۆرستیا داعشێ دا بووم،ل وی دەمی هێشتا تەمەنێ من یێ بچوك بوو تیرۆرستان ژ خێزانێ خۆ ڤەقەتاندم و گرتم،هەموو رۆژێن ل بن دەستێ تیرۆرستێن داعش د نەخۆش بوون و پشتی رزگاربوویم بەردەوام ورە و هیڤی من ب خۆ ددا و هەردەم خۆ ب گەشبین دبینم و بزاڤێ دكەم ب رێیا هۆنەری نەخۆشیان ژبیر بكەم.
هەروەسا دیاركر،خێزانا مە ژ 40 كەسان پێكهاتبوو و تیرۆرستێن داعش ئەم هەموو پێكڤە دەستەسەر كرین و گرتین،نۆكە ژی هەشت كەس ژ خێزانا مە دیار نینن،لەورا داخوازێ دكەین چارەنڤیسێ كەسێن بێ سەر و شوون بێتە ئاشكەراكرن.
تُتاح هذه الصورة أيضا في: کوردی