شوونوارێن ئێزدیان دناڤبەرا پاراستن و وندابوونێ دا
بەختیار قادر
د درێژاهیا دیرۆكێ دا ئێزدی راستی ب دەهان هەوێن قركرنێ و فەرمانان بووینە و هەتا ئیرۆ رۆژ دبەردەوامن و ژ دەڤەرێن وان هاتینە دەربەدەركرن و دەرێخستن،ژبەر ڤێ چەندێ ئیرۆ دێ بینی شوونوارێن ئێزدیان چ یێن ئاینی پاشماوەیێن گوندێن وان ل چەندین دەڤەران هەنە ب تایبەت ل پارێزگەها دهۆكێ و مووسلێ و ژنەبوونا چاڤدانێ و پاراستنێ دنالن،رەنگە ل داهاتی ئەڤ شوونوار بێنە ونداكرن ئەگەر جیێن شۆلەژێ خۆ لێ نەكەنە خودان.
شوونوار دیرۆكا هەموو گەل و مللەتان ددەنە خویاكرن وەكو یا دیار نۆكە ل سەرانسەری جیهانێ شوونوارێن كەڤن یێن مللەتان دئێنە دیتن و ئاشكەراكرن و ژیانا وان یا بەری ب هەزاران سالان و گرێدانا وان ب داب و نەریتان ڤە بەرچاڤ دكن،دیرۆكا ئێزدیان ژی زۆر یا كەڤنارە و بۆ بەری ب هەزاران سالان ڤەدگەرت،ل چەرخێن بۆری دا هەژمارا ئێزدیان ل عێراقێ و هەرێما كوردستانێ زۆربوون و ل چەندین دەڤەران ژیان كرینە،بەلێ ژبەر فەرمانێن ب سەرێ وان دا هاتین ژ دەڤەرێن وان یێن رەسەن هاتنە دەرێخستن و دووركرن و نكارین دووبارە ڤەگەرنە سەر دەڤەرێن خۆ ڤە و ب تنێ شوونوارێن وان یێن ئاینی و مال و ئاڤاهی و مولكێ وان ل وێدەرێ مان،پشتی چەندەها ڤەكۆلەرێن ئێزدی ڤەكۆلین كرین ل ڤێ داویێ گەلەك شوونوارێن ئێزدیان ب تایبەت یێن ئاینی وەكو نیشانگەه و گۆڕستانان،هەروەسا ئەو كەلوپەلێن بۆ ژیانا خۆ یا رۆژانە بكاردئینایی ل هندەك دەڤەرێن پارێزگەهێن دهۆكێ و مووسلێ دیاربووینە ئەڤ یەك ژی وەكو بەلگەیەكە كو دیرۆكا دیرین یا ئێزدیان خویا دكە،هەڤدەم جیێ داخێ یە چەندەها گوندێن ئێزدینشین یێن كەڤن كو هنەك ژ شوونوارێن وان ماینە هەتا نۆكە بۆ ئێزدیان نەهاتینە ڤەگەراندن و مەترسیا ژ ناڤچوونێ ل سەر وان شوونواران هەیە.
ئیرۆ گرنگ و پێتڤیە ڤەكۆلەرێن ئێزدی ب كوری و هوری بتر دووڤچوونێ ل شوونوارێن ئێزدیان بكن،چنكو هێشتا شوونوار ل دەڤەرێن جودا جودا هەنە و نەهاتینە ئاشكەراكرن،ژبەركو ڤان شوونواران گرنگیا خۆ هەیە بۆ دیاركرنا هەبوونا ئێزدیان ل وان دەڤەران،دیسان خالا مە دڤێت ئاماژێ پێ بدەین ئەوە كو بتر چاڤدێریا جیێن شوونواری بێتە كرن و بێنە پاراستن ژ ناڤچوونێ.
تُتاح هذه الصورة أيضا في: کوردی