(ئیمان و باوەری) دناڤ ئێزدیان دا
مەھدی حەسەن
د باوەری یا مە ئێزدیان دا بەرێ كنیات نەبوو (ھەموو تاری و تاریستان بوو) نە عەرد ھەبوو نە عەسمان نە بەحر ھەبوو نە بنیان نە شەڤ ھەبوو نە رۆژ نە بەھشت ھەبوو نە دۆژ نە دەشت ھەبوو نە چیا نە مرۆڤ ھەبوو نە گیانەوەر بتنێ (خودێ مەزن ) ھەبوو .
لەوا مە ئێزدیان ئیمان و باوەریەكا موكم ب ئێكانیا خودێ ھەیە، كو یێ بێ شریكە و یێ بێ ھەڤالە و ئافرینەرێ ملیاكەت و عەرد عەسمان و ئادەم و ھەموو كنیاتێ یە،ئێزدیاتیا مە یە خویا یە و ھێز و شیانێت وی دزالن لسەر كنیاتێ .
ھەر ئاین و مللەتەكی ب باوەری ئیمان ب رێكەكێ ھەیە خو ب گەھین خودێ و بەھشتێ شادبن، ھەر وەسا بێ جیاوازی خودێ تەعالا ئەڤ بەشەر ھەمی یێ خولقاندی و ھەر كەس لدیف بیرۆباوەرێن خو پەروەستەی خودێ تەعالا دبن و ھەر ئاین و مەزھەبەك ل سەر بیرۆباوەرێن ڕاست و دروست و باقژ خەبات و تێكۆشینا خزمەتا مرۆڤاندا دكەن دا كو خودێ ژ خو رازی جەن و بچنە دیدارا خودێ ژبەر كو ب دیتنا ھەر ئاین و مەزھەبەكی
خودێ راستی و ئەڤینە، خودێ ئەخلاق و کریارا راستە، خودێ شەهامەت و مێرخاسی یە، خودێ چاڤکانیا رووناهیێ و ژیانێ یە، هەروەسا ژی هێشتا ژ ڤان هەمیا ژی باشتر و بلندترە. خودێ وژدانە، ئەو خودێ کافر و بێ دین و مولحدانە، چۆنکی لگەل ئەڤینا وی یا بێ سنوور دەرفەتێ دەتە کافران ژی ژین بکەن ئەو لێگەر و تێگەرێ دلانە. ژ سنووری زمان و مەنتقی دەرباز دکەت و هین وێڤەتر و بلنتر د چیت، ئەو مە باشتر ژ مە ناس دکەتن و هەرتشتەکێ د ناڤ دلێن مەدا دەرباز د بیت ژ مە باشتر پێ د زانیت، ژ گۆتنێت مە د بووری و ل مە ناگریت، چۆنکی دزانی ئەوا ژ دەڤێ مە دەرد کەڤیت – چ ئەم بزانین و چ نەزانین ئەو نینە ئەوا د ناڤا دلێ مەدا دەرباز دبیت. ژ بۆ کەسین پێویستیا وان ب بەرجەستە بوونا وی هەبیت، خودێ یەکێ بەرجەستەیە. ژ بۆ کەسێن کو هەبوونا وی یا بەرچاڤ و دیار د خوازن، مینا جسم خویا د بیت. ئەو پاکترین جەوهەرێ گەردوونێ یە. باوەرمەندن کو هەست ب هەبوونا وی دکەن. خودێ هەمی تشتەکێ هەمی مرۆڤانە.
لەوا ئەم ئێزدی د قەول و سەبەقێن خودا دەرھەقی خودێ دبێژین :
یا خودێ تو خودای تو یەزدای
تو خالقی تو پەدشای
تو نووری عەسلێ تە ژ نوورە
تو خودانێ مۆر و مای
یا خودێ تە ھەزار و ئێک ناڤ ل خۆ دانای
ناڤێ مەزن خودێ یە
ناڤێ تەمام خودێ یە
ناڤێ لایق خودێ یە.
باوەری سەرێ ھەموو خێرا
مەلەکا سەمایا قانونی ل عەزمانا د گێڕا ، مۆمن ب وێ باوەریێ گەھشتنە دیوانا جەبێرا .
***
چەند بیر و باوەر ل جەم مللەتێ ئێزدیان :-
١-مە ئێزدیان باوەری ب ئێكانیا خودێ ھەیە
چاكێ مە ب سەردا
مە ژ وەحدانیێ خەبەردا
زۆرا دنیا گرت و ئاخرەت بەردا
***
پەدشێ من رێبەرە
ئەوە ئێكی ئەكبەرە
سجوودەت ژێڕا فەرە
***
٢- مە باوەری ب رێ و رەسم و قەول و بەیت و قەسیدە و دوعایێن خۆ ھەیە .
قەولا بێژن ، بخوونن قەسیدە
باوەریا مە سلتان ئێزیدە
***
٣-مە باوەری ب ئۆل و ئەركانێن خۆ ھەیە.
ھەكە خودێ كر ئێزدیە
سەر ناڤێ سلتان ئێزی نە
ئەم ب ئۆل و ئەركانێت خۆ درازینە
***
٤- مە باوەری ب خاس و چاكێن خۆ ھەیە .
یا خاسا رەسلە
مە ل پێ فەسلە
نەقلا ل پێ نەقلە
***
٥- مە باوەری ب نەدر و خێر و خێراتە ھەیە .
خێرەكێ بكەن ژ خودێ ڕا
كارەكی بكەن ب رێ ڕا
دا نەی گیرۆ بن ب نەفسێ ڕا
***
٦- مە باوەری ب پیرۆزیا تاووسێ ھەیە.
ئێكە ژ نیشانێن پیرۆزێن مە ئێزدیان .
٧- مە باوەری ب خەرقەی ھەیە .
ژ ناڤا میھێ و زەرگووزێ دێ چێكەم خەرقەیە
فەقیر دێ كەتە بەر خۆیە
سوونەت خانە دێ پێ ئێت باوەری و شەھدەیە
***
پەدشێ من خەرقە تەفسیل دكرە
نازلی ئەردا تەسمیلی مەلك فەخرەدین دكرە
مەلك فەخرەدین تەسلیمی فەقیرا دكرە
سوونەت خانە پێ دئێت شەھدە و باوەرە
***
٨- مە باوەری ب پیرۆزیا رۆژێ و ئاگری ھەیە.
رۆژ قوبلەتا عەبادەتێ
رابە ل بەر خلمەتێ
ژ خودێ بخوازە تفاق رەحمەتێ
***
٩- مە باوەری ب پیرۆزیا رۆژا چارشەمبوویێ ھەیە.
چارشەمبوو رۆژەكە فادلە
مەلك فەخرەدین ئافراندبوو ژ دلە
ناس نەدكر رووحێت چوو غافلە
***
١٠- مە باوەری ب رۆژا ئاخرەتێ و بەھشت و دۆژێ ھەیە.
نەفسێ نەوەتا
چی كەسێ بخۆت لوقمەكا بێ رەدا
رۆژا ئاخرەتێ دێ ل پێشیێ بتە قەدا
***
ئەو شفاتا ب نیشانە
پڕا سەلاتێ ئالیەك بەھشتە و ئێك دۆژەیە و ئێك دوخانە
ھاوەكە یار و برێت ئاخرەتێ سەر گوننەھكارێت برا نە
***
ئاخرەت مالا ھەقە
مەلەك راوەستان ل چاردە تەبەقە
ژ ئێزدیا رە داھر كر گریڤانێ ھەقە
***
١١- مە باوەری ب مرن و كراس گوھۆرینێ ھەیە.
ژ بانا نازل بوو ئەو سوڕە
نەسیبەك ئافراند بوو ب مڕە
ئەمی درازینە ھەكە ھندەكە و ھەكە پڕە
***
١٢- مە باوەری ب سوڕ و كەرەمێت باتنێ ھەیە.
ژ ئێزدیارا ئانین علمێ باتنێ
پەدشا ئێكی ب تنێ
ھنجی ئێزدیێ نەی سافی بێ
دەرێ دۆژێ ژ وانرا ڤەكری بێ
***
یێ تەمام خودێ یە
ژێدەر:
– نڤیسینێن ماموستا خلمەتكار شەرو ابراھیم
– نڤیسینێن سادق سالح
تُتاح هذه الصورة أيضا في: کوردی