وهزارهتا نافخۆ چهند مهرج بۆ پێدانا مولهتا چهكى داناینه بهر كۆمپانییێن ئێمناهییێ
خانى نيوز:
وهزارهتا نافخۆ رێنمایێن پێدانا مولهتا چهكى بۆ كۆمپانییێن ئێمناهییێ بهلاڤكرن، و ئێدى كارمهندێن كۆمپانییێن ئێمناهییێ نهشێن چهكى ههلبگرن و ب تنێ زێرهڤانێن كۆمپانییان دێ مولهتا ههلگرتنا چهكى وهرگرن.
ل دووڤ رێنمایێن مولهتا چهكێ كۆمپانییێن ئێمناهییێ، پێدڤییه كارمهندێن كۆمپانییێن ئێمناهییێ ب شێوهیهكێ فهرمى هاتبنه دامهزراندن و ل وهزارهتا نافخۆ هاتبنه پهسهندكرن، و ل دووڤ قانوونا چهكى ژماره ( 2 ) یا سالا 2022ێ، مولهتا ههلگرتنا چهكى دێ تنێ ب بهشێ سكیورێتى یێ كۆمپانییێن ئێمناهییێ هێتهدان، و رێڤهبهر و ستافێ كارگێرى یێ كۆمپانییان مافێ ههلگرتنا چهكى نینه.
ههروهسا درێنمایێن وهزارهتا نافخۆ دا هاتییه، كارمهندێن بهشێ سیكورێتى یێن كۆمپانییێن ئێمناهییێ مافێ ههى ب تنێ ل دهمێ كاركرنێ ل كۆمپانییێ چهكى ههلبگرن، و ب كارئینانا چهكى ژ دهرڤهى كارێ زێرهڤانییێ، دێ وهكو ب كارئینانا بێى مولهت هێته هژمارتن و رێكارێن قانوونى ب دژى وێ چهندێ هێنه ب كارئینان.
ئاماژه ب هندێ ژى هاتییه دان، نابیت زێرهڤانێن كۆمپانییێن ئێمناهییێ چهكێ رێ پێداى دگهل خوه ببهته ژ دهرڤهى كۆمپانییێ، و پێدڤییه كارمهندێن كۆمپانییێن ئێمناهییێ ئهڤ مهرجه ههبن ههتا كو مولهتا ههلگرتنا چهكى وهربگرن.
1 – ژییێ كارمهندێ كۆمپانییێن ئێمناهییێ ژ ( 28 ) سالییێ كێمتر و ژ ( 50 ) سالییێ زێدهتر نهبیت.
2 – ژبهر چ تومهتان نههاتبیته جزادان یان چ ههتكبهرى نهبن.
3 – كێم ئهندام یان نهخۆشێ دهروونى نهبیت، و كێشه دچاڤێن خوهدا نهبن و بشێت چهكى ب كار بینیت.
4 پركرنا فۆرمهكا مولهتا چهكى یا تایبهت ب زانیاریێن كارمهندێ كۆمپانییا ئێمناهییێ.
جوورێن چهكى
وهزارهتا نافخۆ درێنماییێن خوهدا روونكرییه، كۆمپانییێن ئێمناهییێ دشێن ب تنێ ئهڤان جووره چهكان بدهنه كارمهندێن خوه.
1 – چهكێ ئاگرین ( دهمانجه ) قهبارێ فیشهكان ژ ( 9 ملم ) زێدهتر نهبیت.
2 – چهكێ ئاگرین قهبارێ فیشهكان ژ (39×7.62م ) زێدهتر نهبیت.
3 – قهدهغهیه كۆمپانییێن ئێمناهییێ چهكێ ئاگرین یێ بێ دهنگ ( كاتم ) و چهكێ ئاگرین ژ جوورێ سنایپهر ( قهناس ) ب كاربینن.
تُتاح هذه الصورة أيضا في: کوردی