سەرۆكێ بنگەهێ لالش:ناساندنا ئێزدیاتیێ بۆ جڤاكێن جیهانی دێ ئارمانجا بنگەهێ لالش بت
تۆرا لالش:
سەرۆكێ دەستەیا بلندا بنگەهێ لالش ئاشكەراكر كو ل بەرە پلانەكا سالانە یان سێ سالی دابرێژین،بۆ هندێ ئارمانج و پەیرەو و پرۆگرامێ بنگەهێ لالش بێتە بجهئینان و ب رژدی دێ كار ل سەر كەین،هەروەسا ناساندنا ئێزدیاتیێ بۆ جڤاكێن جیهانێ دێ ئارمانجا بنگەهێ لالش بت.
سەعید جردۆ،سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی،بۆ رۆژناما دەنگێ لالش راگەهاند،پشتی كۆنگرێ چاردێ باوەری دایە دەستەیا نوو یا بنگەهێ لالش ،هەروەسا ئەرك و كار ب سەر ئەندامێن دەستەكا نوو هاتینە دەستنیشانكرن و بەلاڤكرن،هەلبەت ئەم وەك تیما دەستەكا نوو دێ خزمەتكارێن ئارمانج و پەیرەو و پرۆگرامێ بنگەهی بین و ل تەخا رەوشەنبیری و جڤاكی دێ دناڤ جڤاكێن كوردستانێ ب گشتی و ئێزدیان ب تایبەتی دێ د خزمەتكار بین،دیسان وەكو بنگەهێ لالش مە ل بەرە پلانەكا سالانە یان سێ سالی دابرێژین داكو ئارمانج و پەیرەو و پرۆگرامێ بنگەهی بێتە بجهئینان و ب رژدی دێ كار ل سەر كەین هەلبەت ب هەڤكاری و پشتەڤانیا حكومەتا هەرێما كوردستانێ و سازیێن د ڤی بواری دا كار دكن.
ئاشكەراكر ژی ژ ئارمانجێن سەرەكی یێن بنگەهێ لالش ئەوە كار ل سەر فەلسەفە و كەلتۆر و قەول و بەیتێن ئێزدیان و فلكلۆرێ ئێزدیان كو پشكەكا هەرە دەولەمەندە ژ كەلتۆر و فلكلۆرێ مللەتێ كورد، ناساندنا ئێزدیاتیێ بۆ جڤاكێن كوردستانێ و عێراقێ و هەموو جیهانێ بكت و كاركرن ل سەر كۆمكوژیا ئێزدیان و سارێژكرنا برینێن رزگاربوویێن ئێزدی و هاریكاریكرنا قوتابیان و هەموو تەخ و چنێن جڤاكی.
سەرۆكێ بنگەهێ لالش دوپاتكر،ل دۆر تفاق و تەبایێ و رێكخستنا ناڤمالا ئێزدیان ب هەڤكاری دگەل میر حازم تەحسین بەگ میرێ ئێزدیان و سەماحەتا بابێ شێخ و جڤاتا رۆحانی ب گشتی و سازیێن ئێزدیان ،ئەم دێ بزاڤێ كەین نێزیكبوون دناڤ مەدا دروست ببت،داكو ئەم هەموو وەكو یەك كار ب كەین بۆ خزمەتكرنا جڤاكێ خۆ.
تُتاح هذه الصورة أيضا في: کوردی