دوو تیمێن ئاگرڤەمراندنێ و نقومڤانان ل ناحیا خانكێ هاتنە پێكئینان
تۆرا لالش:
ئیسالە بۆ وەرزێ دروتنا دەخل و دانێ جۆتیاران و پاراستنا وان ژ سۆتنێ و ژبەر پاراستنا گیانێ وەلاتیان دەما قەستا رووبارێ دجلە دكەن،دوو تیمێن ئاگرڤەمراندنێ و نقومڤانان ل ناحیا خانكێ یێن هاتینە پێكئینان.
ڕێڤەبەرێ ناحیا خانكێ زەردەشت شێخ شامۆ،بۆ دەنگێ لالش دیاركر،ل گۆڕەی بەرنامێ حكومەتا هەرێما كوردستانێ دارێژتی ژبۆ ناحیا خانكێ هەول و بزاڤان دكەت ببتە ناحیەكا نموونەیی ل سەرانسەری پارێزگەها دهۆكێ،ل ڤێ قۆناغێ ب فەر دیت دام و دەزگەهێن دیتر هەبن ل دەڤەرێ،یەك ژ وانا نهۆ پشكا سەخبێریا كارەبێ ب فەرمی هاتیە ڤەكرن و خزمەتەكا باش ئەنجام داینە و كێشەیا كارەبێ چارەكریە كو ئێدی وەلاتی سەرەدانا قەزایێ ناكەن،هەردیسان ژبەر هاتنا وەرزێ هاڤینێ و پاراستنا دەخل و دانێ جۆتیاران ژ سۆتنێ،مە داخاز كر ژبەرگیریا شارستانیا دهۆكێ كر و ئێكسەر تیمەكا بەروەخت بۆ ناحیێ هنارتن داكو د خزمەتا وەلاتیان دا بن ل دەمێ ڕوودانان دا،هەڤدەم ژی دبزاڤان داین بنگەهەكێ ئاگر ڤەمراندنێ ل خانكێ بێتە ڤەكرن،هەروەسا مە فەر زانی تیمەكێ نقومڤانان دامەزرینین و ب ڕەنگەكێ فەرمی دەست ب كاربوون و خودان پسپۆرینە دڤی بواریدا،ژبەر پاراستنا گیانێ وەلاتیان دەما قەستا ڕووبارێ دجلە دكەن.
زەردەشت شێخ شامۆ،ئەو ژی دیاركر،دەربارەی چێكرنا جاددەیێن ناڤخۆیی هەماهەنگیەكا باش دگەل باژێرڤانیا خانكێ هەیە و نۆكە كار بەردەوام دئێتە كرن ل جاددەیێن ناڤخۆیی، ئەو ژی هندەك د قۆناغا داویێ دانە و هندەك دەستپێكێ دانە و هەموو هەول و بزاڤان دكەین و د پلانا مەدا هەیە مە كار ل سەر كریە ڕێیێن گوندێن سەر ب ناحیێ ڤە بێنە چێكرن،هەر دیسان ب هەڤكاری دگەل باژێرڤانیا خانكێ پارچە ئەردێن تایبەت بۆ هۆلێن هەلكەفتان هاتینە دەست نیشانكرن داكو بێنە ئاڤاكرن.
ئاماژە ب وێ چەندێ دا ل گۆڕەی وێ خزمەت و پرۆژەیێن خزمەتگۆزاری یێن هاتینە ئەنجام دان،لێ دەڤەرا خانكێ هێشتا پێتڤی ب پرۆژەیانە و خەلكێ خۆ دلنیا دكەین دێ بزاڤێ كەین دگەل هەموو جیێن پەیوەندیدار پتر خزمەتا دەڤەرێ بێتە كرن.
تُتاح هذه الصورة أيضا في: کوردی