داعش و خرابكرنا مەزارگەها
خێری كودی قایدی 
داعش دوژمنێ مللەتێ كوردە،ب هەموو پێكهاتێن كوردستانێ ڤە ( ئێزدی،موسلمان،كرستیان) وگرنگە بزانین كو ئەڤە نە دوژمنێ ئێكێ یە ونەیێ دوماهیێ یە ، چنكو دوژمنێ هەموو دەستكەفتیێن كوردستانێ یە ودڤێن كوردا ژێك دوور كن وپارچە پارچە بكن وجوگرافی پێشكەفتن و پێكڤەژیانا ل كوردستانێ تێكبدەن وئایینی بكەنە مەرتالەك بۆ ڤێ چەندی،تاكو ئیرۆ ب هەزارەها كور وكچ وخەلكێ هەژار وبەلەنگاز نەك ئێزدی بتنێ بەلكو تەڤایا كێمینەیا بوونە قوربانی.
ژلایەكێ دی ڤە ئەوان دڤێت ئەوێ دیرۆكا رەش دوبارەكن وەكی حەلەبچە وئەنفالا ئیرۆ خەلكێ كوردستانێ تووشی ڤان كارەساتا بكن،داكو نەگەهنە چ ئارمانجا خۆ،ژبەر ڤێ چەندێ شنگال یا كو دەڤەرەكە پری كوردێن ئێزدی تووشی ڤێ كارەساتێ كرن،داكو دووبەرەكی و نەخۆشی ب كەفتە دناڤ هەموو پێكهاتێن كوردستانێ دە ،لێ هێزا مللەتی وپێشمەرگێ كوردستانێ ژڤێ چەندێ مەستر بوو تاكو ب خوونا خۆ كوردستان پاراست و بوو هێزەكە سەرەكی ژبۆ ژناڤبرن وبەرسینگرتنا مەزنترین رێكخراوا تیرۆری ل هەموو جیهانێ و كاری ب هەزاران كیلۆمەترا عەردێ كوردستانێ ژوان پاقژ بكن،ئاشكرایە هەر جهەكی داعش گەهشتیێ مەزارگەه وجهێن پیرۆز یێن موسلمان وئێزدی وكرستیان وكاكەیی وهەموو پێكهاتا یێن خرابكرین و هەرڤاندین،لێ پشتی پێشمەرگەی ئەو دەڤەرنە ئازادكرین ریهسپی و خەلكێ وان دەڤەرا دڤێن جارەكە دی وان مەزارگەها سەخبێركن.
ب دیتنا من ئەگەر ئەو جهە وەكی خۆ بمینت وناڤێ وی مەزارگەهی ل سەر تابلۆیەكێ بێتە نڤیسین ومێژوویا هەرڤاندنا وی،داكو ببتە بەلگە ددیرۆكێ دە و ئەگەر بڤێن بێتە چێكرن بلا ل جهەكی دی چێكەن دا بكارن رێ و رەسمێن خۆ ل بەر بگێرن وهندا نەبت و دەستكاری دجهێ خرابكری دە نەئێتە كرن دا د پاشەرۆژێ بێتە زانین كو ئەڤە كریارێن ڤێ رێكخراوا تیرۆری نە،،هەروەسا ببتە بەلگەكە باوەرپێكری كو ب جینۆساید بێتە هژمارتن ، وەكی حەلەبچە وئەنفالا وهەر كۆمكوژیەكە ژلایێ دوژمنی ڤە ب سەرێ كوردا هاتی ، ژلایەكێ دیڤە فەرە ئەم ب دەلیڤە ببینین كو ئیرۆ مێژوویا خۆ ب دەستێ خۆ تۆماركەین نەك سبەی ودپاشەرۆژێ دە دوژمنێن مە ب رەنگەكێ دی بنڤیسن و ب رەنگەكێ دی خەلكێ تێبگەهینن،چنكو ئەڤ مێژوویا ب خوونا شەهیدێن قارەمان ومێرخاسێن كوردستانێ یا هاتیە نڤیسین ودڤێت رۆلێ وان یێ مێرانە چ جارا نەئێتە ژبیركرن،بژیت پێشمەرگ بژیت یەكبوونا مللەتێ كورد.
تُتاح هذه الصورة أيضا في: کوردی