هیڤی و ئۆمێد ب حكوومەتا بەغدا نەماینە
خالد خدر 
ل دەمەكی بەری نۆكە سەرۆك وەزیرێن عیراقا فیدرال (حەیدەر عەبادی ) بریارا جاكسازیێن ریشەیی دابوو دناڤ هەموو دام ودەزگایێن حكومەتێ دا ، بێگومان ئەو بریارە هاتبوو دان ب ئاراستەیا مەزنە لێڤەگەرێ شیعەیان (علی سیستانی) و لبن فشارێن خۆپیشاندانێت گەلێ عیراقێ ، دەمەكی درێژ بۆری دسەر وان چاكسازیێن عەبادی را ، بەلێ جهێ مخابنیێ یە تانهۆ عەبادی وحكومەتا خۆ هیچ پێنگاڤەكە كارا نەهاڤێتینە دەربارەیی ڤان چاكسازیێن هەنێ ، ئانكو هەموو گۆتنن ودبێ كریارن، كو ب ملیارا ژ مالێ گشتی هاتینە دزین و بكارئینان بۆ كەسان و بەرپرسێن عێراقێ ژبلی دیاربوونا ب دەهان بادەكێن گەندەلیێ ژلایێ كۆمیتا دەستپاكیێ ڤە ، كو تا نۆكە هیچ كەیسەك ژوان نەهاتیە چارەسەركرن ونەداینە دادگەهێ ،ل بەرامبەر دا نەجێبەجێكرنا ڤان چاكسازیان دناڤ حكوومەتێ دا خۆپیشاندانێت جەماوەری دبەردەوامن ل دژی حكومەتێ.
ژلایەكی دیڤە عەبادی و حكوومەتا خۆ ئەو سۆزێن داینە حكوومەتا هەرێما كوردستانێ تانۆكە بجهنەئیناینە ،ب تایبەتی دەربارەی موچێن فەرمانبەرێن هەرێمی و بودجێ و هەموو پێتڤیێن دارایی یێن هەرێمێ لسەر حكوومەتا بەغدا، ژچارچووڤێ ڤی ماوەیێ بۆری ژ حكومەتا عەبادی دیار بوو كو چ جێوازی نینە دناڤبەرا عەبادی و مالكی دا ،ئانكو ئەو لسەر هەمان سیستەم و رێباز ب رێڤەدچن و هەلویستێ وان ئێك هەلویستە ل بەرامبەر حكومەت و گەلێ هەرێما كوردستانێ ، وەكی دبێژن ئەو هەردوو واتە عەبادی ومالكی دوو ڕووێن دراڤەكی نە ، هەرچەندە بەری دەمەكی كورت شاندەكی حكوومەتا هەرێما كوردستانێ ب سەرۆكاتیا رێزدار (نێچیرڤان بارزانی )سەرۆكێ جڤاتا وەزیران سەرەدانا بەغدا كربوو، ژبۆ چارەكرنا وان ئاریشێن دناڤبەرا هەردوو لایەنادا و ب تایبەتی گرفتا دارایی ونە پێگیریا لایەنێ عێراقی ل بەرامبەر حكوومەتا هەرێمێ ، تشتێ سەیر و جهێ سەرسۆرمانێ ! كو پشتی ڤەگەرینا شاندێ ناڤهاتی ژ سەرەدنا بەغدا حەیدەر عەبادی هندەك داخویانی دان دەربارەی حكوومەتا هەرێمێ كو چ بنەما و راستی بۆ وێ چەندێ نینن ئەوا عەبادی دایی خویاكرن دەربارەی دانا موچێن فەرمانبەرێن هەرێمێ ،ئانكو بابەت ئازراندنا راگەهاندنێ بوو نە زێدەتر ، كو وی ڤیایە بەرپرسایەتیێ بئێختە سەر حكوومەتا هەرێمێ و وێ ب كێمتر خەمیێ دیار بكت بەرامبەر گەلێ كورد و رایا گشتی كو داخویانیێن عەبادی سەرئێك كێمكرنەكا سیاسی یە.
بەلێ هەموو راستی د ئاشكەرانە و پێتڤی شرۆڤەكرنێن مەزن ناكن ، ئەم هەموو دزانین كو حكوومەتا عێراقێ هەر ژ سالا 2007 وتانۆكە ئەو سست وخەمساربوویە دبەرامبەر پێتڤیێن حكوومەتا هەرێمێ و مافێن وێ یێن دارایی و لەشكەری ب تەمامی نەداینە ،ل سالا 2014 وتا نۆكە بودجا هەرێمێ و موچێن فەرمانبەرا بڕینە و نەداینە ، ب كورت وكورمانجی چ هیڤی و ئۆمید ب حكوومەتا بەغدا نەماینە كو حكوومەتەكا خەندقی دناڤ گەندەلیێ و تائیفەگەریێ دایە ،ژلایەكی دیڤە شەرێ داعش و ململانێ یا سیاسی كو هەر گرۆپەك ب خۆ دكێشت ودبەت و باجا مەزن وەلاتیێ سادە و بێ گونەه ددەتن و دبتە قووربانی ،كو بێ كاری و هەژاری ب رێژەیێن مەزن بلندبووینە ل عێراقێ و رۆژ بۆ رۆژێ زێدەترە ،ل دەمێ كو بەرپرس وكاربدەستێن عێراقێ مژولی كۆمكرن و هەلگرتنا پارەی نە لسەر كیستێ پارە و سامانێ گەل و وەلاتی عیراقێ.
تُتاح هذه الصورة أيضا في: کوردی