ئێڤارا هیجرانێ 
سەكار كامل
* پێشكەشە بۆ روحا زارۆكێن گریا وان گەردوون هەژاندی و كەسێ هاژێ نەیی ( زارۆكێن شنگالێ ) !
ئێڤارەكە دەرەنگ ، هێش چیایی رۆژ هندا نەكری ، هێش پرتێن بایی سەما فرینێ ل سەر گرنژینا زارۆكان دكر و هێش پیرەمێران كۆچكا بنیا گوندی چۆل نەكری ، كەڤرێن چیایی و مستێن ئاخێ كەتن ناڤ هەڤ و دناڤ پرتێن عەوراندا بەر ب ئاپۆرایا هندابوونێ چۆن ، زارۆكان دەست ژ یاریا ڤەشارتۆكێ بەردان و بەر ب ڤەشارتنەكە راستەقینە كەتن مەشێ ، گری و هاوارا دێ و زارۆكان گوهێن خودێ سمتن و هێسترێن وان تێكەلی تۆزەكە ئەبەدی بوون ، قەی توو د فكری تاریستانەكە مژەویە هێش رۆژێ روویێ وێ ماچ نەكری ، ڤێ ئێڤارێ سترانێن زارۆكان بوونە نالینا برینداران ، گۆرەپان تژی خوون بوو مینا شەرێ مانێ ، كنارێن ئاخێ مشتی دیكۆلا ئاگری بوون ، چیایێ بلند و ب هێز داكەفتە ناڤ پێلێن دەریایێ سر و سار قەی توو دفكری تۆفانا نۆحی یە ، ل ڤێ ئێڤارا هاڤینێ هێش بێهنا مرنێ نەفری گیان مەستی پێكێ شەرابا مرنێ بوو ، وەی چ ئێڤارەكە سەیرە مینا شەڤا هیجران و چۆنێ یە.
لەشێ شەڤێ ئێڤار داپۆشی ، ئاخا ل سەر خاكێ رەسەن دەرزی ، چیایێ مێژوو چەماندی لڤ و هەركی ( هەرك- كی ) ، كەڤر و دار د هێسترێن دایكان دە نقۆ بوون ، ژیان كەتە لێوارێ نەمانێ و گریا زارۆكان بوو سەمایەكە تەراژیدی و هەلبەستەكە خەمگین ، باز ل شنگالێ بوونە بەنگی و د ئەشقا وێدە مان بەنگی .
كەڤالەك خەمناك ب رەنگێن تاری ل سەر دیوارێ فێرگەهێ هاتە نەخشاندن ئوو ل سەر رێكێن چۆنا گوندی و ل سەر پەلگێن دار هژیران و ل سەر ئاخ و ئاڤ و بەران ، زارۆكان ناڤێ خودێ ئینا ئوو نڤیسی ( كۆچۆ ) .
تُتاح هذه الصورة أيضا في: کوردی