پەرلەمانتارەك:هەتا نۆكە هەزار ژنێن ئێزدی هاتینە رزگاركرن 
تۆرا لالش یا راگەهاندنێ
هەول بۆ رزگاركرنا كوردێن ئێزدی ل ژێردەستێ داعشێ بەردەوامن و پەرلەمانتارەك دبێژت،هەتا نۆكە 2 هەزار و 587 ئێزدی هاتینە رزگاركرن، كو 934 ژێ ژنن.
ڤیان عەباس،ئەنداما پەرلەمانێ هەرێما كوردستانێ ل سەر لیستا پارتی دیموكراتی كوردستان ب (باسنیۆز) راگەهاند:”هەول بۆ دووڤچۆنا كچێن گرتی ژلایێ داعشێ ڤە بەردەوامن و كار ژی بۆ چارەسەركرنا كێشەیێن رزگاربوویان دئێتە كرن”.
ڤیان عەباس گۆتژی ژمارەیا ئێزدیان لە عێراقێ 550,000 كەسن، كو ژوێ ژمارێ 360,000 كەس ژبەر شەرێ داعشێ ئاوارەبوون و 1293وەلاتیێن كوردێن ئێزدی ل وی شەری دا شەهید بوون.
وێ ئەندام پەرلەمانێ دەربارەی ژمارەیا زارۆكێن بێ سەمیانێن ئێزدی ژئەنجامێ شەرێ داعش ب (باسنیۆز) گۆت:” 1759 زارۆكان بابێن خۆ ژ دەست داینە، 407 زارۆكێن ئێزدی دەیكێن خۆ ژ دەست داینە،هەڤدەم ژی 359 زارۆكان دەیك و بابێن خۆ ژدەست داینە و 220 زارۆكان دەیك و بابێن وان ژلایێ داعشێ هاتینە گرتن”.
دەربارەی ئامارا وان گۆرێن ب كۆم ژ ئەنجامیێ شەرێ داعشێ هاتینە دیتن ، ڤیان عەباس ئاشكەراكر، ل شنگال 22 گۆرێن ب كۆم هاتینە دیتن،هەڤدەم داعش ل وی ماوەی دا 44 مەزارگەه ژی پەقاندینە.
وێ ئەنداما لژنەیا پەیوەندی و كاروبارێن رەڤەندا كوردستان ل پەرلەمان،دەربارەی ئامارا وەلاتیێن گرتی ب دەستێ داعشێ گۆت:”6386 كەس هاتینە گرتن كو ژوێ ژمارێ 3527 ژن و 2859 كەس زەلام بوون”.
ب گشتی ژمارەیا كەسێن هاتینە رزگاركرن ژ دەستێ داعش 2587 كەسن كو ژ وێ ژمارێ 934 ژن و 325 زەلامن ،هەڤدەم ژمارەیەكا زارۆكان ژی هاتینە رزگاركرن كو 658 ب رەگەزێ كچ و 670 كورن.
دەربارەی ژمارەیا وان كەسێن كو هەتا نۆكە ل ژێر دەستێ داعشدا ماینە، ڤیان عەباس ئاماژە كرن كو ل دووڤ داوی ئامارا رێڤەبەریا گشتی یا كاروبارێن ل وەزارەتا ئەوقاف و كاروبارێن ئایینی كۆمكریە، 3799 كەسن كو ژوێ ژمارێ 1935 ژن و 1864 زەلامن.
ڤیان عەباس دەربارەی كەیسا كچێن ئێزدی یێن رزگاربووی ژدەستیێ داعشێ بەحسێ وێ چەندێ كر كو ” ل پارێزگەها دهۆكێ سەنتەرەكێ تایبەت ب كچێن رزگاركری ژ دەستێ داعش هاتیە ڤەكرن كو ژ هەموو رەخەكی ڤە ل خزمەتا چارەسەركرنا ئاریشێن وان كچان دایە”.
زێدەتر گۆت: “وەكو لژنەیا تایبەت ل پەرلەمانێ كوردستانێ سەرەدانا دەرڤەی وەلاتی كریە و كار مە كریە بۆ هندێ كەیسا كچێن ئێزدی ببتە كەیسەكا تایبەت و فشارەكا نێڤ دەولەتی ژی دروست بكەین بۆ كو بكارین هەول بۆ ئازادیا وان كچان بدەین،كو ل ژێر دەستێ داعش دا ماینە”.
تُتاح هذه الصورة أيضا في: کوردی