دانوستاندنەكا ڤەكری لگەل كۆمەكا زەلامێن ئاینی و ئەكادمیان ل بنگەهێ لالش ل دهۆك
تۆرا لالش یا راگەهاندنێ
ل بنگەهێ لالش ل دهۆكێ،دانوستاندنەكا ڤەكری دناڤبەرا رێكخراوا NPA یا نەرویجی و كۆمەكا زەلامێن ئاینی و ئەكادمیان،ل دۆر پاراستن و ساخلەمیا ژنا ئێزدی ب رێڤە چوو.
ژ چالاكیێن رێكخراوا NPA یا نەرویجی ل دۆر پاراستن و ساخلەمیا ژنا ئێزدی و چاوانیا بەرهەنگاربوونا توندوتیژیێ ل دژی وێ، دانوستاندنەكا ڤەكری لگەل كۆمەكا زەلامێن ئاینی و ئەكادمیان ل بنگەهێ لالش ل دهۆكێ هاتە كرن،كو چەند پرسیار یێن گرێدایی ب رۆلێ ژنا ئێزدی هاتن پێشنیاركرن،زێدەباری تووشبوونا وێ بۆ توندوتیژیا جەستەیی پشتی هێرشا داعشێ بۆ سەر شنگالێ.
هەر دڤێ دانوستاندنێ دا بەحسێ وان ئالاڤان هاتە كرن یێن تیرۆرستان بكارئینان ل دژی ژنا ئێزدی بۆ ژناڤچۆنا ورەیا وان،دیسان چ ئالاڤ هەینە بۆ چارەسەركرنا رزگاربوویان و چاوا سەرەدەری لگەل ڤان ژنان بێتە كرن یێن تووشی توندوتیژیێ بووین و دیتنا رێیا بۆ گونجاندنا وان لگەل جڤاكی و ئەو چ ئاستەنگن یێن تووش دبنێ.
بابەتێن دڤێ دانوستاندنێ دا هاتین بەحسكرن دێ ژ پرۆژەكێ مەزنێ رێكخراوا ناڤبرى بن كو پێ رابوویە ب هەڤكاری لگەل بنگەهێ لالش،بۆ پشتەڤانیكرنا ژنا ئێزدی و هۆشیاركرنا وێ ژلایێ ساخلەمی و جڤاكی ڤە.
ئەڤ جۆرە دانوستاندنانە دێ بەردەوام بن،هەتا چارەسەری دئێن دیتن.
تُتاح هذه الصورة أيضا في: کوردی